1 Samuel 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Ha Samuel omysaĩ Ñanderuete ñe’ẽ opaite Israelguápe. Umi árape Israel oñorairõ Filisteayguakuéra ndive, ha oñembyaty hikuái Eben-ha-ézerpe, ha Filisteayguakuéra oñembyaty Afécpe.

2Ha Filisteayguakuéra ojeity Israel ári, Israel katu ndaipu’akái Filisteayguakuéra rehe, ha ohundi oiméne 4.000 kuimba’e pe ñúme.

3Ha Israelguakuéra oupa jevývo icampaméntope umi karai anciáno he’i: Mba’érehepa ko árape Ñanderuete ñanemoĩ Filisteayguakuéra pópe. Jagueru ñande apytépe Sílogui Ñanderuete karameg̃ua, ha ou vove ñande apytépe ñandepu’akáta ñanderehe ija’e’ỹva rehe.

4Ha omondo hikuái tetãyguakuéra ijapytégui, ogueru hag̃ua pe karameg̃ua, oĩva yvága atykuéra Jára querubinkuéra (angelkuéra) ra’ãnga mbytépe ha mokõive Eli ra’y, Ofni ha Finees, omoirũ pe karameg̃ua.

5Ha Ñanderuete karameg̃ua og̃uahẽvo ijatyhápe opaite Israelgua hatãiterei vy’apópe osapukái, omboryrýi peve pe yvy.

6Filisteayguakuéra ohendúvo Israelguakuéra ovy’aite ha osapukái hatãvo he’i hikuái: Mba’épa ojehu Israelguakuéra atyhápe ha mba’épa he’ise péva. Upéi oikuaa hikuái ojegueru hague Ijára karameg̃ua ijatyguasuhápe.

7Upévare Filisteayguakuéra okyhyjepa, ha he’i hikuái: Ijára og̃uahẽma ijapytépe. Ha he’ive hikuái: Angái, angái ñandehegui, koichagua mba’e ndojehúi gueteri ñañorãirõ jave.

8Ái, ái, ñandehegui. Mávapa ikatu ñandesalva ko Jára ipu’akapávagui. Ha’e voi ohundipava’ekue Egiptoyguakuérape mba’evaieta rupi pe desiértope.

9Peñemombaretéke, peẽ Filisteayguakuéra, ha peñemokuimba’e rekóke ani hag̃uátei peiko Israelguakuéra rembiguáirõ, ha’ekuéra oiko haguéicha pene rembiguái ramo; peneñemokuimba’e rekóke ha peñorãirõ mbaretéke.

10Ha umi Filisteaygua ipu’aka jevy Israelguakuéra rehe, ha oñanimba hikuái hekohápe; ha oiko jejuka ndetuichaitereíva Israelguakuéra apytépe, 30.000 kuimba’e yvy rupigua omano.

11Ha Filisteayguakuéra ogueraha avei Ñanderuete karameg̃ua, ha ojejuka avei mokõive Eli ra’ýpe, Ofni ha Finees.

12Peteĩ kuimba’e Benjamingua oñani ñorãirõ hágui, ijao soropa reheve ha yvy iñakãre,

13og̃uahẽ pe araitépe Sílope, Eli oguapy aja iguapyhápe, pe táva rokẽ ykére, oma’ẽvo tape rehe ipy’a ryryihápe Ñanderuete karameg̃ua rehe, upérõ pe Benjamingua omombe’upa umi mba’e ojehúva Siloguakuérape ha ohendupa rire osapukái hatãiterei hikuái.

14Ha Eli ohendúvo pe ayvu oikóva, oporandu: Mba’e tyapu pororo rehegua piko aipóva. Ha pe Benjamingua pya’e ou hendápe ha omombe’u Elípe opaite mba’e ojehuva’ekue.

15Upejave Eli oguerekóma 98 áño ha hesa iñypytũmbáma ha ndohechavéima.

16Upérõ pe Benjamingua he’i Elípe: Che aju ñorãirõ hágui, ko árape akañy ñorãirõgui, ha Eli oporandu: Mba’épa ojehúra’e, che ra’y.

17Ha pe ñe’ẽ reruhára he’i ichupe: Israelguakuéra okañy Filisteayguakuéra renonderãgui, ha oiko avei jejukaguasu ñane retãyguakuéra apytépe; ha nde ra’y mokõivéva, Ofni ha Finees, ojejuka avei, ha Ñanderuete karameg̃ua ho’a avei Filisteayguakuéra pópe.

18Ha Eli ohendúvo Ñanderuete karameg̃ua oñehundi hague ho’a ovayvávo iguapyhágui, pe táva okẽguasu ykére, ha oso ijatúa sã ha omano; ha’e kuimba’e itujaitémava ha ipohyietereíva. Ha’e 40 áño aja oiko Israel mbojovakehára ramo.

19Ha ita’ýra Finees rembireko, hyeguasuete ha imembypotaitéva, ha ha’e ohendúvo ojegueraha hague Ñanderuete karameg̃ua, iména ha iména ru omano hague, ojayvy ha imemby; oha’ãrõ’ỹre ou hasy imemby hag̃ua ha imemby.

20Ha omanóvo, he’i hikuái ichupe umi oĩva hendive, ani rekyhyjétei, kuimba’ehína ko ne memby. Ha’e katu okirirĩ ha nopenái hesekuéra.

21Upéi oñembohéra pe mitãme Icabod, he’iséva: Israel reko mimbipa opáma, ojeguerahágui Ñanderuete karameg̃ua, ha omano haguére iména ha iména ru.

22Ha he’i jevy: Israel reko mimbipa opáma, ojeguerahágui Ñanderuete karameg̃ua, ha omano.

← Chapter 3 Jump to: Chapter 5 →