1 Samuel 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Samuel he’i opaite Israelguápe: Péina ahendúma pene ñe’ẽ, umi mba’e pejeva’ekue chéve ha amoĩ peẽme pene retã ruvichaguasu ramo Saúlpe.

2Ko’ágã pene retã ruvicha penesãmbyhýta. Ha chetujáma ha che akãrague morotĩmbáma; ha che ra’ykuéra oĩmba penendive, Che poisãmbyhy che mitãrusu guive ko ára kóva peve.

3Ápe aĩ, peñe’ẽke cherehe Ñanderuete renondépe ha pe Ha’e oiporavova’ekue renondépe, omonávo ichupe acéitepe, oime ramo añemomba’e rei pende guéi térã pende búrro rehe térã oime ramo che añe’ẽ pohýi rei térã ajahéi rei peteĩva rehe, térã ajapyhy pirapire ajehesa mboty hag̃ua, umíva tou ha tomombe’u, ha che amyengoviapaitéta ichupekuéra.

4Upémaramo he’i hikuái: Araka’eve nereñe’ẽ pohýi reíri ha nderejahéi reíri orerehe, ha nderejapyhýiri mba’eve avaveichagua kuimba’e.

5Ha ha’e he’i ichupekuéra Ñanderuete ohecha ha ohendupa ha ko Ha’e oiporavova’ekuépe, oñemonávo ichupe acéitepe ohecha ha ohendupa avei umi mba’e ojehúva ko árape, ha ndapejohúi hague che pópe che mba’e’ỹva. Ha ha’ekuéra he’i jevy: Peichaite.

6Upéramo Samuel he’i hetãyguakuérape: Ñanderuete oiporavova’ekue Moises ha Aarónpe oguenohẽ hag̃ua pende rukuérape Egíptogui, Ha’e voi ohecha ha ohendupa avei.

7Ko’ág̃a peha’ãrõmi gueteri, tañe’ẽ peẽme Ñanderuete renondépe umi ñepytyvõ Ñanderuete ojapova’ekue penderehe ha pende rukuéra rehehápe.

8Jacóbo oike rire Egíptope, ha pende rukuéra omba’ejerure asýrõ Ñanderuetépe, Ha’e omondo Moises ha Aarónpe, ha’ekuéra oguenohẽ hag̃ua pende rukuérape Egíptogui, ha omoinge ichupekuéra ko tetã kóvape.

9Ha’ekuéra katu hesarái Ijarateégui, upévare Ha’e ome’ẽ ichupekuéra Sísara pópe, pe soldádo ruvicha Hazor peguápe, Filisteayguakuéra ha Moab retã ruvicha pópe, ha’ekuéra ombopoguy hag̃ua Israelguakuérape.

10Upéi ha’ekuéra omba’ejerure asy Ñanderuetépe, ha he’i hikuái: Ore roñemoangaipa, romboykégui ore Ruetépe, ha roiko Baal ha Astarot rembiguái ramo; Nde katu orerenohẽ orerehe ija’e’ỹva poguýgui, upévare roikose jevy ne rembiguaikuéra ramo.

11Upéramo Ñanderuete ombou Jerubaálpe, Barac, Jefte ha Samuélpe, penerenohẽ hag̃ua umi penderayhu’ỹva poguýgui ha umi oikóva pende jerekuévogui, peiko jevy hag̃ua py’aguapýpe.

12Peẽ pehechávo Nahas, Amon ñemoñare retã ruvicha ouva’ekue ojeity hag̃ua ñandeári, upérõ, pejékuri chéve: Taoresãmbyhýnte avei peteĩ tetã ruvicha, Ñanderuete ramojepe pene retã ruvichaguasu añeteguáva.

13Na’ápe pene retã ruvicha peipota ha pejerureva’ekue; ha pehecháma Ñanderuete omoĩmaha ichupe pene retã ári mburuvicha ramo.

14Tapekyhyje Ñanderuetégui, tapejapo iñe’ẽ ha tapeneñe’ẽrendu ichupe, ha ani pepu’ãtei Ñanderuete ñe’ẽ rehe, peẽ ni pene retã ruvicha, Ñanderuete voi penemboguata porãségui.

15Napehendúi ramo katu Ñanderuete ñe’ẽ ha pepu’ã ramo Ñanderuete ñe’ẽ rehe, Ha’e omopu’ãta avei penderehe ipo, Ha’e omopu’ã haguéicha ipo pende rukuéra rehe.

16Peha’ãrõ ha pehechava’erã umi mba’e tuichaitéva Ñanderuete ojapótava pende resa renondépe.

17Ko’ágã piko noñembyatýi pe trígo. Che ajeruréta Ñanderuetépe ha Ha’e omoingóta arasunu ha ama, peikuaa ha pehecha hag̃ua ituichaha pene ñañareko Ñanderuete renondépe, pejerurévo pene retã ruvicharã rehe.

18Ha Samuel omba’ejerure asy Ñanderuetépe, ha Ha’e omosunu ha omongy pe ára pévape; ha mayma tetãyguakuéra okyhyjeiterei Ñanderuete ha Samuélgui.

19Upémaramo opaite tetãyguakuéra he’i Samuélpe: Ejerure Ñanderuetépe ne rembiguaikuéra rehe, ani hag̃ua romanomba, péina opaite ore angaipa ári rombojo’ave ko mba’evaiete, rojerurévo ore retã ruvicharã rehe.

20Ha Samuel he’i jevy hetãyguakuérape: Ani pekyhyjétei, pejapo ramo jepe ko’ã mba’evaiete; ani pepiátei Ñanderuete rapégui, pejerovia uvei hese pende py’aite guive.

21Aníke pejerovia jára gua’u rehe, ndojeporukuaái ni noporopytyvõkuaái, umía mba’e výro reígui voi.

22Ñanderuete ndopoimo’ãi hetãgui, héra ituichaitégui: Ñanderuete voi pendeporavo oñemomba’e hag̃ua penderehe hetãtee ramo.

23Upéicha rupi tamombyry uvei chehegui añemoangaipa hag̃ua Ñanderuete ndivee, nañembo’evéivo penderehehápe; che pohekombo’éta avei peguata hag̃ua tape potĩ ha ikare’ỹva rehe.

24Pekyhyjénte Ñanderuetégui ha pejapo añetehápe iñe’ẽ pende py’aite guive, pehechakuaáke tuichaite mba’e Ha’e ojapomava’ekue penderehe.

25Peiko vai ramo, peẽ ha pene retã ruvicha, peñehundíta katuete.

← Chapter 11 Jump to: Chapter 13 →