1 Samuel 8

Guarani 2015 (Ñanderuete Ñe’ẽ Porã 2015)

← Chapter 7 Jump to: Chapter 9 →

1Ojehu Samuel itujáma ramo omoĩ ita’yrakuérape ombojovake hag̃ua Israelguakuérape.

2Ha ita’ýra ypykue héra Joel, ha pe mokõiha Abías. Ha’ekuéra ombojovake Beersébape.

3Ita’yrakuéra katu ndoguatái itúva rape rehe, ha’ekuéra ipirapire potágui omokarẽ pe justícia rape.

4Upéramo opaite Israel karai anciáno oñembyaty ha ou Ramápe Samuel rendápe,

5ha he’i hikuái ichupe: Eikuaa porãke, nde ndetujáma, ha nde ra’ykuéra ndoikói nde rape rehe; upévare emoĩ ko’ág̃a oréve peteĩ tetã ruvicha oresãmbyhy hag̃ua, ambue tetãnguéra oguereko háicha avei.

6Umi mba’e nombohorýi Samuélpe, he’ígui hikuái: Emoĩ oréve peteĩ tetã ruvichaguasu oresãmbyhy hag̃ua. Ha Samuel oñembo’e Ñanderuetépe.

7Ha Ñanderuete he’i Samuélpe: Ejapo katu ne retãyguakuéra ñe’ẽ, opaite mba’e he’íva guive ndéve, nandévei nemboyke, chévente chemboyke, anive hag̃ua aiko Ijára ramo.

8Péichante voi hembiapokuéra anohẽ ypy guive Egíptogui ko’ág̃a peve, chereja hikuái chéve, oiko hag̃ua umi jára gua’u rembiguáirõ, péicha ojapo avei ko’ág̃a nderehe.

9Ejapo hembipota, eavisa porã katu ichupekuéra ha ehechauka mba’eichagua teko ha pu’akápa ome’ẽva’erã hetã ruvicharãme.

10Ha Samuel omombe’u opaite Ñanderuete ñe’ẽ hetãyguakuérape, ojerureva’ekue ichupe tetã ruvicharãre.

11Ha he’i: Kóva ningo pene retã ruvicharã reko ha pu’aka: Oguerahava’erã pende ra’ykuérape hembiguairã ramo oñani hag̃ua icárro ha henda kavajukuéra renondépe ha oho hag̃ua henonderãme ñorãirõme.

12Ha’e omoĩva’erã ichupekuéra isoldádo aty ruvichakuéra poguýpe, oisãmbyhýva 50 térã 1000 soldádope, ha’e omondóta pende ra’ykuéra ikokuépe oñotỹ ha omono’õ hag̃ua imba’éva térã ojapoukáta iñorãirõme g̃uarã carrorã térã iñorãirõ rembiporukuéra.

13Ha’e oguerahava’erã avei pende rajykuérape ojapo hag̃ua mba’e mohyakuãharã, hi’upy mbojyharã ha pan apoharã ramo.

14Ha’e oipe’ava’erã avei pendehegui pende yvy iporãvéva, pende parralty, pende olivoty ha ome’ẽva’erã hembiguaiguasukuérape g̃uarã.

15Ha pene ñemitỹ ra’ỹinguégui ha parraltýgui oipe’ava’erã 10 por ciénto (cáda 10 kílogui oipe’áta imba’erã ramo 1 kílo), opaga hag̃ua imburuvicha ha hembiguaiguasukuéra.

16Oipe’ava’erã pendehegui pene rembiguái kuimba’e ha kuñáva, pene mitãrusu iporãvéva, ha pende búrro avei, ojapo hag̃ua hembiapo.

17Pene rymbakuéragui oipe’ava’erã avei 10 por ciénto (10 tymbágui, 1 tymba ichupe g̃uarã), ha peẽ voi peikova’erã hembiguái ramo.

18Ha pesapukái pyahẽ asy ramojepe pene mburuvichaguasu peiporavova’ekuépe, Ñanderuete nopenamo’ãi penderehe upe ára upévape.

19Ha umi tetãygua katu nohenduséi Samuel ñe’ẽ, ha he’i: Nahániri, oĩva’erã ore ári avei peteĩ tetã ruvicha.

20Ha ore roikóta avei ambue tetãnguéraicha, ha ore retã ruvicha oresãmbyhýta, ha osẽta ore renonderãme, ha ha’e oremoakãta oĩ ramo ñorãirõ ambue tetã ndive.

21Samuel ohendupaite hetãyguakuéra ñe’ẽ, ha omog̃uahẽ Ñanderuete apysápe.

22Ha Ñanderuete he’i Samuélpe: Ejapopa he’íva guive ndéve, ha emoĩ tetã ruvicha hi’arikuéra. Uperire Samuel he’i Israel kuimba’ekuérape: Tapeho joaite pende tavakuérape.

← Chapter 7 Jump to: Chapter 9 →