Joshua 18

Guarani 2015 (Ñanderuete Ñe’ẽ Porã 2015)

← Chapter 17 Jump to: Chapter 19 →

1Mayma Israel ñemoñarenguéra oñembyaty Sílope, peteĩ atyguasúpe ha omopu’ã hikuái upépe pe óga jojohuha ombopoguy haguére Canaan retãnguérape.

2Ha Israel tríbu apytépe hemby gueteri 7 tríbu oguereko’ỹva ijyvyteéva.

3Ha Josue he’i Israelguakuérape: Araka’e pevépa peneate’ỹta peñemomba’e hag̃ua pende yvyrã rehe, Ñanderuete, pende rukuéra Jára ome’ẽmava’ekue peẽme.

4Peiporavo mbohapy kuimba’e peteĩteĩva pende tríbu apytégui, che amondo hag̃ua ichupekuéra omaña porã hag̃ua pe yvýre, ha tohai mba’eichaitépa ñamboja’ova’erã pe yvy umi 7 tríbupe g̃uarã imba’etee ramo.

5Ha omboja’óta hikuái pe yvy 7 hendápe; ha Juda opytáta ijyvýpe sur gotýo, ha umi Jose róga reheguáva opytáta hikuái imba’ekuérape nórte gotýo.

6Peẽ pehaíta kuatia rehe mba’eichaitépa pemboja’óta ha moõite rupípa ohasáta ko’ã 7 yvy pehẽngueguasu rembe’y, ha che aitýta peẽme po’a jeporavo, Ñanderuete, Ñandejára renondépe.

7Ha Leviguakuérape katu noñeme’ẽmo’ãi yvy pehẽngueguasu pende apytépe, pa’ikuéra oguerekóva Ñanderuete ndive g̃uarã imba’eteéva; Gad, Ruben ha Manases tríbu mbyterépe, Moises, Ñanderuete rembiguái ome’ẽma ijyvy Jordan mboypýri, kuarahyresẽ gotýo.

8Ha umi kuimba’e umíva opu’ã oho hag̃uáicha, ha Josue he’i ichupekuéra: Tapeho ha pehecha porã pe yvy ha pemboja’o, ha peju jevy che rendápe, che aity hag̃ua peẽme po’a jeporavo Ñanderuete renondépe, Sílope.

9Umi kuimba’e oho ohecha hag̃ua pe yvy, ha omboja’o hikuái 7 hendápe itavakuéra rupi ha omoĩ rire peteĩ kuatiápe, ou jevy hikuái Sílo rekohápe, Josue oĩháme.

10Ha Sílope Josue oity ichupekuéra g̃uarã po’a jeporavo Ñanderuete renondépe; opaite tríbu ohupity hag̃ua ijyvyteerãva.

11Ha Benjamin yvy oñeguenohẽ po’a jeporavo rupi hogaguasu oĩ heta háicha; ha ijyvy opyta Juda ha Jose ñemoñarenguéra yvypa’ũme.

12Ijyvy rembe’y nórte gotýo osẽ Jordan guive, ha ojupi Jerico yvate gotýomi, og̃uahẽ meve kuarahyreike gotyogua cérrope, ha ou Bet-aven desiértope,

13upégui ohasa Luz (péva hína Betel) sur gotýomi, ha oguejy Atarot-adárgui pe cérro opytáva sur gotýo, Bethoron yvy gotyogua peve.

14Ha ojere kuarahyreike gotýo pe cérro opytáva Bethoron rovái sur gotýo ha ou osẽ Quiriat-baálpe (pevahína Quiriat-jearim), ko táva Juda ñemoñarenguéra mba’e, kóa ningo kuarahyreike gotyogua yvy rembe’y.

15Ha hembe’y sur gotyogua opyta Quiriat-jearim apýra guive, ha osẽ kuarahyreike gotýo, Neftoa yvukuéra oĩháme.

16Upéi oguejy Hinom ñuguasu rovaigua cérro apýra peve, péva opyta Refaim ñuguasu yvatévo ha upéi oguejy Hinom ñúme, Jebusguakuéra yvy gotýo, upéi og̃uahẽ Rogel pegua yvukuéra peve.

17Upégui oñemboyke yvate gotýo ha osẽ En-seméspe, ha upéguive Gelilot peve, opytáva Adumin yvy ijyvatévape ha upégui oguejy Bohan itaguasúpe, Bohan, Ruben ra’y yvy.

18Upéi oho Arabágui yvatéomi, ha oguejy Jordan yvypépe.

19Ha ohasa Bet-hoglágui, Yguasu Jukyry apýra peve pe Jordan oikehápe Mar Muértope, kóa ningo ijyvy rembe’y sur gotyogua.

20Ha pe Jordan ijyvy rembe’y kuarahyresẽ gotýo opyta Benjamin ñemoñarenguéra yvy rembe’ykuéra ijerekuévo, hogaguasu heta háicha.

21Ko’ãva ningo Benjamin táva, hogaguasukuérape g̃uarã: Jerico, Bet-hogla, Emec-casis,

22Betaraba, Zemaraim, Betel,

23Avim, Para, Ofra,

24Quefar-haamoni, Ofni ha Gaba; 12 táva, itava’ikuéra reheve;

25Gabaon, Rama, Beerot,

26Mizpa, Quefira, Mosah,

27Réquem, Irpeel, Tarala,

28Zela, Elef, Jebus (pevahína Jerusalen), Gibea ha Quiriat; 14 táva itava’ikuéra reheve. Ko’ã táva hogaguasukuérape g̃uarã.

← Chapter 17 Jump to: Chapter 19 →