Joshua 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Peteĩ Israelgua katu opyrũ Ñanderuete ñe’ẽ rehe, oñongatu ijupe g̃uarãnte umi mba’e oñemaldeci mbyrévagui: Acan, Carmi ra’y, Zabdi ra’yre, Zera ra’yre, Juda tríbu reheguáva, ojapyhy pe oñemaldeci mbyrévagui, upévare Ñanderuete ipochy Israel retã rehe.

2Upéi Josue omondo kuimba’ekuéra Jerico guive Háipe, opytáva Betaven ypýpe, Betélgui kuarahyresẽ gotýo; ha oñe’ẽ ichupekuéra he’ívo: Tapeho ha pehecha porã pe yvy péva. Ha ha’ekuéra oho ha omaña porã hikuái Hái rehe.

3Ha ou jevývo Josue rendápe, he’i hikuái: Anítei ohopa pe soldádo aty, tovénte toho 2.000 térã 3.000 kuimba’e, umía ombopoguykuaáma Haiguakuérape; ani remokane’õmba rei tetãyguakuérape ojehóvo upépe, Haiguakuéra imbovýgui.

4Ha Josue omondo 3.000 kuimba’e, ha’ekuéra katu okañy Haiguakuéra renonderãgui.

5Ha umi Haigua ojuka ijapytégui oiméne 36 kuimba’épe ha omuña ichupekuéra itáva rokẽ guive Sebarim peve oñeguenohẽháme ita, ha sarambi ojapo ijapytepekuéra; ha upévagui Israelguakuéra ipy’a kangypa.

6Upémaramo Josue ha Israel karai ancianokuéra omondoro ijaokuéra, ha ojeity hováre, Ñanderuete karameg̃ua renondépe ka’aruete peve, ha omombo iñakã ári yvytimbo.

7Ha Josue he’i: Che Jára, ore Ruete mba’upépa rembohasa Israélpe Jordan rupi, oremoĩ hag̃ua Amorguakuéra pópe, orehundi hag̃ua, ropytánteva’erãmo’ã Jordan mboypýri.

8Ore Jaratee, mba’épa ha’éta, Israel okañýma hese ija’e’ỹvagui.

9Umi Canaangua ha opaite tetãyguakuéra oikóva upérupi ohendu ramo ko’ã mba’e oúta oremongora ha ombogue ore réra yvy árigui; ha upéicharamo, mba’épa Nde rejapóta nde réraguasuetépe g̃uarã.

10Ha Ñanderuete he’i Josuépe: Epu’ã, mba’érehepa reñesũ péicha, nde rova yvy rehe.

11Israel oñemoangaipa ha opyrũ che ñe’ẽme’ẽ rehe, ha’eva’ekue ichupekuéra, ha ojapyhy ha omonda mba’e oñemaldeci pyrévagui, omokañy hag̃ua imba’ekuéra apytépe.

12Ko’ã mba’e rupi Israel ñemoñarenguéra ndaikatumo’ãi oñemoĩ hese ija’e’ỹva rehe, ha upévare okañy hikuái ichuguikuéra ho’águi hikuái avei maldicion poguýpe; ha naimemo’ãvéima pende apytépe, napehundíri ramo pe oñemoangaipávape pende apytégui.

13Epu’ã emboheko potĩ tetãyguakuérape, ha ere: Peñemboheko potĩ ko’ẽ ramog̃uarã; pende Ruete, Israel Jára péicha he’i: Oĩ ningo pe oñemoangaipáva pende apytépe, upévare Israel ndaikatumo’ãi oñemoĩ hese ija’e’ỹva rehe, pehundi peve pende apytégui pe ho’ava’ekuépe maldicion poguýpe.

14Ko’ẽ ramo peñemboja joáta pende tríbu rupi; ha pe tríbu pende Ruete omboykéva, toñemboja hogaguasukuéra rupi; ha pe ogaguasu pende Ruete omboykéva, toñemboja hogakuéra rupi; ha pe óga Ñanderuete omboykéva, toñemboja ikuimba’ekuéra ndive.

15Ha pe kuimba’e oguerekóva pe mba’e oñemaldecipyréva, ojehapyva’erã, ha’e ha opaite mba’e oguerekóva reheve, opyrũgui Ñanderuete ñe’ẽme’ẽ rehe, ha oñemoangaipa haguére Israelguakuéra apytépe.

16Ha Josue opu’ã pyhareve, omog̃uahẽ hag̃ua Israelguakuérape itribukuéra rupi, ha pe po’a ho’a Juda tríbu rehe.

17Ha Josue omog̃uahẽvo Juda tríbupe, pe po’a ho’a Zéra rogaguasu rehe, ha omog̃uahẽvo Zéra rogaguasu hogakuéra rupi, pe po’a ho’a Zabdi róga rehe.

18Ha Josue omog̃uahẽvo Zabdi róga ikuimba’ekuéra rupi, pe po’a ho’a Acan rehe, Carmi ra’ýpe, Zabdi ra’yre, Zera ra’yre, Juda tríbu reheguáva.

19Upémaramo Josue he’i Acánpe: Che ra’y, emboete Ñanderuete, Israel Járape, ha emomba’eguasu ichupe, eikuaaukávo chéve mba’épa rejapora’e; ani reñomítei chehegui mba’evete.

20Ha Acan he’i Josuépe: Añetehápe che añemoangaipa Ñanderuete, Israel Jára ndive g̃uarã, péicha ha péicha ajapókuri:

21Ahechákuri umi Jericoygua mba’ekuéra apytépe peteĩ póncho iporãitereíva, ha 2,23 kílo pláta, ha peteĩ óro pehẽngue puku ipohýiva 558 grámo. Ha umíva aipotaitereígui ajapyhy ha amokañy che róga mbyte píso guýpe, ha pe pirapire oĩ avei upépe.

22Upémaramo Josue omondo omba’erecha hag̃ua, ha oho hikuái ñaniháme hóga peve; ha péina oĩmba umi mba’e oñeñomimbyre hógape, ha pe pirapire oĩ avei upépe.

23Ha ojapyhy hikuái umi mba’e hógagui ogueru hag̃ua Josue ha mayma Israel ñemoñarenguéra rendápe, ha omoĩ hikuái Ñanderuete renondépe.

24Upémaramo Josue ha mayma Israelgua, ojapyhy Acan, Zéra ra’ýpe, pe pirapire, pe póncho, pe óro pehẽngue puku, ita’yrakuérape, itajyrakuérape, hymba gueikuéra, iburrokuéra, ijovechakuéra, hóga tymba pireguigua ha opaite oguerekóva guive ha oguerahapa hikuái Acor vállepe.

25Ha Josue he’i ichupe: Mba’érehepa oremyangekõira’e, Ñanderuete tanemyangekõi avei ndéve ko árape. Ha mayma Israelgua ojapi ichupekuéra itápe omano meve, ha omanomba rire ohapy ichupekuéra.

26Hi’arikuéra omopu’ã hikuái peteĩ ita atýra ndetuicháva, ha péva oĩ gueteri ko ára kóva peve. Ha Ñanderuete pochy ogue, upévare pe valle péva oñehenói Acor válle, ko ára kóva peve (he’ise: po’a’ỹ válle).

← Chapter 6 Jump to: Chapter 8 →