Joshua 8

Guarani 2015 (Ñanderuete Ñe’ẽ Porã 2015)

← Chapter 7 Jump to: Chapter 9 →

1Ñanderuete he’i Josuépe: Ani rekyhyje ha ani ndepy’akangýtei; eraha nendive opaite kuimba’e oñorãirõkuaáva, epu’ã ha tapeho Háipe. Ema’ẽke, Che amoĩma nde pópe Hái ruvichápe, hetãyguakuérape, itáva ha ijyvy.

2Ha pejapóta Hái ha hetã ruvicha rehe pejapo haguéicha Jerico ha hetã ruvicha rehe; imba’e ha hymbakuéra katu pejapyhýta pene mba’erã. Pemoñuhã pe táva ikupe gotýo.

3Upéramo opu’ã Josue ha mayma soldádo, ojeity hag̃uáicha Hái ári; ha Josue oiporavo 30.000 kuimba’e imbaretéva, ha omondo ichupekuéra pyharekuépe.

4Ha he’i ichupekuéra: Peñangareko porãke, pemoñuhã pe táva ikupéguio; ha napeñemomombyrymo’ãi pe távagui, ha ñembosako’ípe peimetapeína.

5Ha che ha mayma ambue soldádo chendive oĩva roñemoag̃uíta henondéguio pe táva rehe; ha osẽvo hikuái ojeity hag̃ua oreári, ko kuehe ojapo haguéicha, rokañy jevýta henonderãme.

6Ha ha’ekuéra osẽta oremuñávo ha ore roñemomombyry porã ramo itávagui, he’íta hikuái: Okañy jevy hikuái ñandehegui tenondeveguaréicha, jaha ñamuña jevy ichupekuéra.

7Ha upévo peẽ pepu’ãta peñemoñuhã hágui ha pembopoguýta pe táva, Ñanderuete, pende Jára, ome’ẽtava pende pópe.

8Ha pejapyhy rire, pemyendýta tatápe, pejapopa Ñanderuete ñe’ẽ he’i haguéicha peẽme, peñangarekóke che ha’éva guive rehe ha pejapopa hekópe.

9Upéramo Josue omondo ichupekuéra, ha oho hikuái ñuhãrãme, ha oñemoĩ hikuái Betel ha Hái pa’ũme, Háigui kuarahy reike gotýo; ha Josue opyta pe pyharépe isoldadokuéra apytépe.

10Josue opu’ãvo pyharevete oipapa isoldadokuérape, ha hendivekuéra oho avei Israel karai ancianokuéra, isoldadokuéra renonderãme ojeity hag̃ua Haiguakuéra ári.

11Ha Josue mayma ikuimba’ekuéra ndive, oho oñemoag̃ui meve pe táva renondépe, ha opyta hikuái Háigui yvate gotýo; pe ñu opyta Josue ha Hái pa’ũme.

12Josue oiporavo oiméne 5.000 kuimba’e rupi ha omoĩ ñuhã ramo Betel ha Hái pa’ũme, pe távagui kuarahyreike gotýo.

13Péicha omohenda isoldadokuéra: Isoldádo atyguasu omohenda pe távagui yvate gotýo, ha iñuhãnguéra pe távagui kuarahyreike gotýo; Josue katu oho pe pyharépe pe cerrokuéra pa’ũ mbyte peve.

14Ha Haigua ruvicha ohechávo ichupekuéra, ha’e hetãyguakuéra ndive oñembopya’e pya’e ha opu’ã pyharevete; ha upejave umi kuimba’e táva pegua osẽ ondyry hag̃ua Israelguáre, pe Araba rovái, ndoikuaái katu oñemoñuhãha pe táva ikupéguio.

15Upéramo Josue ha mayma Israelgua oguevi ndaipu’akavéi ramoguáicha ha okañy gua’u hikuái henonderãgui pe desiérto pegua tape rehe.

16Ha opaite kuimba’e Hái pegua oñembyaty oho hag̃ua Josue ha Israelguakuéra rapykuéri; oñemomombyry ohóvo itávagui.

17Ha nahembýi kuimba’e Hái ha Betel peguáva, osẽ’ỹva Israel rapykuéri; itáva rokẽguasu katu oheja nandi.

18Upéramo Ñanderuete he’i Josuépe: Eipyso nde yvyra puku akua (lánza) reguerekóva nde pópe Hái gotýo, Che ame’ẽma ichupekuéra nde pópe, ha Josue oipyso pe yvyra puku akua oguerekóva ipópe Hái gotýo.

19Ha umi kuimba’e oĩva ñuhã ramo pya’e opu’ã ha oñani hikuái, ha’ekuéra ohechágui Josue omopu’ã hague ijyvyra puku akua, ha oike hikuái pe távape, ha omoĩ ipoguýpe, ha pya’e pya’e omyendy.

20Ha umi kuimba’e Hái pegua oma’ẽ hapykuere gotýo, ha ohechávo pe tatatĩ opu’ãva itávagui ára rehe, ndaikatúi okañy mamove gotýo, ha Israelguakuéra okañy gua’uva’ekue desiérto gotýo ojere sapy’a imuñaharakuéra gotýo.

21Josue ha mayma isoldádo ohechávo umi ñuhã ramo oĩva’ekue ombopoguymaha pe táva, ha pe tatatĩ opu’ãva, ojere avei ha ondyry Haiguakuérare.

22Ha umi Israelgua osẽ jevýva pe távagui ou avei ondyry hag̃ua Haiguakuérare, péicha Israelguakuéra omongora Haiguakuérape, ha ojukapa ichupekuéra hemby’ỹre avave.

23Israelguakuéra oapresa Hái ruvichápe ha ogueru ichupe Josue rendápe.

24Ha Israelguakuéra ojukapa rire Haiguakuérape osẽva’ekue ñúme mamo omuña hague rupi ichupekuéra, ha ho’apa kyse puku rãimbekuépe oñehundipa peve, upérõ mayma Israelgua oike jevy Háipe, ha upépe ojuka avei kyse puku hãimbépe oĩvape gueteri.

25Ha upe árape umi omanova’ekue, kuimba’e ha kuña, oĩkuri 12.000 Haigua meme.

26Josue nomboguejýi pe yvyra puku akua ijyva oĩháme, ohundipa peve Haiguakuérape.

27Ha Israelguakuéra ogueraha imba’ekuéra ha hymbakuéra ojohúva guive itávape, Ñanderuete he’i haguéicha Josuépe.

28Ha Josue ohapy Hái ha ojapo ichugui ita atýra, ojeikove’ỹ hag̃uáicha ipype ko ára kóva peve.

29Ha Hái retã ruvichápe oñemosãingo peteĩ yvyra rehe ka’aruete peve; ha pe kuarahy oikévo, Josue oipe’auka hetekue pe yvyrágui ha omombouka pe táva rokẽme, ha omopu’ã hi’ári peteĩ ita atýra ndetuicháva, oĩva gueteri ko árape.

30Upéramo Josue omopu’ã peteĩ kuave’ẽmby renda Ñanderuete, Israel Járape, Ebal cérrope.

31Moises, Ñanderuete rembiguái, he’i haguéicha Israel ñemoñarenguérape, Moises rembiapoukapy kuatiañe’ẽme ojehai haguéicha, peteĩ kuave’ẽmby renda ita oñekytĩ’ỹvagui ha avave nomopu’ãiva’ekue hesekuéra hiérro, ha oikuave’ẽ hikuái hi’ári kuave’ẽmby ojehapypáva ha kuave’ẽmby py’aguapy reheguáva Ñanderuetépe g̃uarã.

32Ha ohai peteĩ itaguasúre Ñanderuete rembiapoukapy, Israel ñemoñarenguéra rovake.

33Ha mayma Israelgua, umi karai ancianokuéra, mburuvichakuéra, mbojovakehára, ambue Israelguakuéra ha tetã ambueyguakuéra oñembo’y joa hikuái pe karameg̃ua yke mokõive gotýo, pa’i Leviguakuéra ogueraháva ijapére. Peteĩ Israelgua atyguasu oñemoĩ Gerizim cérro gotýo, ha pe ambue atyguasu oñemoĩ Ebal cérro gotýo, Moises, Ñanderuete rembiguái he’i haguéicha ichupekuéra, ojehovasa hag̃ua Israel retãyguakuérape.

34Ha ã mba’e rire, Josue omoñe’ẽmbaite umi tembiapoukapy oĩva pe kuatiañe’ẽme, umi ñe’ẽ jehovasapyrã ha umi ñe’ẽ ñemaldecipyrãva.

35Upéicha Josue omoñe’ẽ opaite ko’ã tembiapoukapy Moises ohaiva’ekue, mokõi Israel atyguasúpe, opaite kuimba’e, kuña, mitã ha tetã ambueyguáva renondépe.

← Chapter 7 Jump to: Chapter 9 →