Joshua 22

Guarani 2015 (Ñanderuete Ñe’ẽ Porã 2015)

← Chapter 21 Jump to: Chapter 23 →

1Upéramo Josue ohenói Rubengua, Gadgua ha Manases tríbu mbyterépe,

2ha he’i ichupekuéra: Peẽ pejapo opaite mba’e Moises, Ñanderuete rembiguái he’iva’ekue peẽme, ha peneñe’ẽrendu avei che ha’éva guive peẽme.

3Ndapeheja reíri pene pehẽnguekuérape ko’ã jasy pukukue javeve ko ára peve, ha pejapopa Ñanderuete, pende Jára rembiapoukapy.

4Ko’ág̃a, Ñanderuete, pende Jára ome’ẽma pytu’u pene pehẽnguekuérape, Ha’e he’i haguéicha, upévare pejevy ha tapeho pende rógape, pende yvyteépe, Moises, Ñanderuete rembiguái, ome’ẽmava’ekue peẽme Jordan mboypýri.

5Peñangarekóke pejapo hag̃ua kyre’ỹpópe, Ñanderuete ñe’ẽ ha hembiapoukapykuéra Moises, hembiguái, he’iva’ekue peẽme pejapo hag̃ua: Pehayhu Ñanderuete, pende Járape, peiko mayma hapekuéra rehe, pejapopa hembiapoukapykuéra, peiko hapykuéri, pejerovia hese pende py’aite ha pene ánga mbytete guive.

6Josue ohovasa rire ichupekuéra, omomaitei paha ichupekuéra, ha oho hikuái hogakuérape.

7Ha Manases tríbu mbyterépe Moises ome’ẽ ijyvy Basánpe; ha ambue Manases mbyterépe Josue ome’ẽ ijyvy ambue ipehẽnguekuéra apytépe Jordan ágotyo, kuarahyreike gotýo; ha ãvape avei Josue omondo hogakuérape, ohovasapa rire ichupekuéra.

8Ha oñe’ẽ ichupekuéra he’ívo: Tapeho pende rogakuérape heta mba’erepy reheve, pene rymbakuéra reheve, pláta, óro ha brónce reheve, ha heta ao hepy reheve; ha pemboja’o pene pehẽnguekuéra ndive penderehe ija’e’ỹva mba’ekue.

9Péicha umi Rubengua, Gadgua ha Manases tríbu mbytere ojei ambue Israel ñemoñarenguéra apytégui, Sílo guive, opytáva Canaan yvýpe, oho hag̃ua ijyvyteépe, upépe oñemomba’eva’ekue hikuái Galaad yvýre, Ñanderuete he’i haguéicha Moiséspe.

10Ha og̃uahẽvo hikuái Jordan rembe’ýpe opytáva gueteri Canaan yvýpe, umi Rubengua, Gadgua ha Manases tríbu mbytere omopu’ã peteĩ kuave’ẽmby renda ndetuicháva.

11Ha umi ambue Israel ñemoñare ohendúrõ umi Rubengua, Gadgua ha Manases tríbu mbytere omopu’ã hague hikuái peteĩ kuave’ẽmby renda Jordan rembe’ýpe, Canaan yvýpe, ha’ekuéra (umi 9,5 tríbu) oikohápe,

12upévare opaite ambue Israelgua oñembyaty Sílope ojeity hag̃ua hi’arikuéra.

13Ha Israelguakuéra omondo Finees, pa’i Eleazar ra’ýpe, ha 10 mburuvicha hendive Rubengua, Gadgua ha Manasesgua tríbu mbytere rendápe,

14ko’ã 10 mburuvicha oiko itríbu ruvicha ramo, omoakã hogaguasukuérape ha itríbu 1.000 soldádo atykuérape.

15Ha’ekuéra oho Rubenguakuéra, Gadguakuéra ha Manases tríbu mbyteregua rendápe, Galaad yvýpe, ha oñe’ẽ ichupekuéra he’ívo:

16Mba’eichagua tembiapo vai piko pejapopeína pepyrũvo Israel Jára ñe’ẽ rehe ha peñemboykévo Ñanderuete rapégui, pemopu’ãvo pendejupe g̃uarã peteĩ kuave’ẽmby renda peñemoĩvo Ñanderuete rehe.

17Napenemandu’ái piko pe ñañareko Peor peguare rehe, ichugui ne’ĩra gueteri ñañemopotĩ ko ára kóva peve, ha upévarupi og̃uahẽva’ekue ñemano guasu Ñanderuete retãme.

18Ha peẽ avei peñemboyke ko ára kóvape Ñanderuete rapégui peñemoĩ hag̃ua hese, ha ko’ẽ ramo ára Ha’e ipochýta mayma Israelguakuéra rehe.

19Oime ramo peimo’ã pe yvy penemba’éva iky’aha, pehasapa avei Jordan mboypýri oĩháme Ñanderuete róga ha pejapyhy pene rendag̃ua ore apytépe; anínte pepu’ã Ñanderuete rehe, ni orerehe, pemopu’ãvo pendejupe g̃uarã pene kuave’ẽmby renda, Ñanderuete kuave’ẽmby renda ykére.

20Acan, Zera ra’ýpa ndojapóira’e mba’evai ogueraháva umi mba’e oñemaldeciva’ekue ha Ñanderuete pochy ou mayma Israelguakuéra ári, ha pe kuimba’e péva nomanói ha’eño heko ñaña rupi, (oguerahávo heta ambue Israelgua iñemanóme, Jos. 7, 1-26).

21Upéramo umi Rubengua, Gadgua ha Manases tríbu mbyteregua oñe’ẽ ha he’i Israel ruvichakuérape:

22¡Ñanderuete, pe Jaraitéva (ha’e) Jahve! ¡Ñanderuete, pe Jaraitéva (ha’e) Jahve! Ha’e oikuaa ha oikuaaukapa Israélpe: Oime ramo romopu’ã ko kuave’ẽmby renda kóva py’a vai reheve térã noromomba’eguasusevéigui Ñanderuetépe, Ha’e anítei oresalva ko ára kóvape (pende pógui).

23Oime ramo romopu’ã ko kuave’ẽmby renda kóva romboyke hag̃ua Ñanderuetépe térã roikuave’ẽ hag̃ua kuave’ẽmby ojehapypáva térã tembi’u reheguáva térã agradecimiénto reheguáva, hi’ári Ñanderuete voi taorehundi.

24Ore romopu’ã uvei rokyhyjégui ko’ẽ ramo ára pende ra’yrekuéra he’i ramog̃uarã ore ra’yrekuérape: Mba’éiko peẽ peguereko Ñanderuete, Israel Jára, ndive.

25Ha’e voi omoĩma pe Jordan ore yvy ha pende yvy rembe’y ramo, ha peẽ Rubengua ha Gadgua ndapeguerekói mba’eve Ñanderuete ndive; ha péicha pende ra’ykuéra ojapokuaa ore ra’ykuéra ndojeroviavéi hag̃ua avei Ñanderuete rehe.

26Upévare ro’ékuri: Ñamopu’ã peteĩ kuave’ẽmby renda, ndaha’éiva kuave’ẽmby ojehapypava’erã ni ambue kuave’ẽmbýpe g̃uarã.

27Oiko hag̃uánte techaukaha ramo (techahare) ore ha pene ñemoñarenguéra apytépe, ikatuha ore roikuave’ẽ avei Ñanderuete renondépe (Jerusalénpe) ore kuave’ẽmby ojehapypáva ha ore kuave’ẽmby py’aguapy reheguáva; ani hag̃ua he’ítei ko’ẽrõ pende ra’ykuéra ore ra’ykuérape: Peẽ ndapeguerekoiha mba’eve Ñanderuete ndive.

28Upevaguínte ore ro’e: Ojehu ramo ko’ã mba’e oréve térã ore ñemoñarenguérape, upéicharamo ro’éta ichupekuéra: Pema’ẽ Ñanderuete kuave’ẽmby renda joguaha rehe, ore rukuéra omopu’ãva’ekue, ndaha’éi kuave’ẽmby ojehapypáva ni ambue kuave’ẽmbýpe g̃uarã, techaukaha (techahare) ramónte toiko ore ha pene pa’ũme.

29Añetehápe ore noroñemoĩséi Ñanderuete rehe, ni noroñemboykeséi Ñanderuetégui, ore katuete roikuave’ẽse avei ore kuave’ẽmby ojehapypáva, tembi’u reheguáva ha ambue kuave’ẽmby Ñanderuete kuave’ẽmby renda ári oĩvahína hóga jojohuha rendápe.

30Ohendúvo pa’i Finees, tríbu ruvichakuéra ha soldádo ruvichakuéra, umi ñe’ẽ Rubengua, Gadgua ha Manasesguakuéra he’íva, ho’a porãmba ichupekuéra.

31Ha Finees, pa’i Eleazar ra’y he’i, umi Rubengua, Gadgua ha Manasesguakuérape: Ko árape roikuaa porã Ñanderuete oĩha ñande apytépe, ha napeñeha’ãi pepu’ã hag̃ua Ñanderuete rehe, pesalva katu Israel ñemoñarenguéra Ñanderuete pochýgui.

32Ha Finees, pa’i Eleazar ra’y, ha umi mburuvicha ojei hikuái Rubengua, Gadgua ha Manasesguakuéragui ojevy hag̃ua hikuái Canaan yvýpe, ambue Israel ñemoñarenguéra rendápe, ha omombe’u ichupekuéra opaite ñe’ẽ ohenduva’ekue.

33Ha umi ñe’ẽ ho’a porã Israel ñemoñarenguérape, ha omomba’eguasu hikuái Ñanderuetépe ha noñe’ẽvéima ohundiseha Rubengua, Gadgua ha Manasesguakuérape.

34Ha Rubengua, Gadgua ha Manasesguakuéra ombohéra ko kuave’ẽmby renda kóva: Techahare añeteguáva ñande Israel tríbu apytépe, Ñanderuete ningo Ñandejarateéva.

← Chapter 21 Jump to: Chapter 23 →