Joshua 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Ñanderuete oñe’ẽ Josuépe, ha he’i:

2Eñe’ẽ Israel ñemoñarenguérape ha ere ichupekuéra: Peiporavo pende tavakuéra oñekañy hag̃ua, Che ha’eva’ekue peẽme Moises rupi,

3oñemohenda hag̃ua upépe upe oporojukáva oimo’ã’ỹ hágui ha ojapose’ỹre; ha oikóta peẽme g̃uarã mo’ãha ramo, pe ojejukava’ekue pehẽnguégui.

4Ha upe oikéva peteĩ ko’ã távape, oñembojava’erã umi karai anciáno rehe, oĩva pe táva rokẽme, ha omombe’u porãva’erã ichupekuéra ha tog̃uahẽ umi táva pegua apysápe pe ojehuva’ekue ichupe; ha ha’ekuéra omoingeva’erã itávape, ha omohendava’erã ichupe oiko hag̃ua ijapytépe.

5Ha pe ojejukava’ekue pehẽngue ou ramo hapykuéri, noñeme’ẽmo’ãi ichupe ipópe, ojukágui hapichápe ojapose’ỹre, ha ndoguerekóigui hendive mba’eveichagua ñe’ẽ’api, ha’e omano mboyve.

6Pe oporojukava’ekue opytava’erã pe távape oñembojovake peve ichupe ñembojovake rupi umi tavaygua renondépe, ha oikova’erã upépe omano meve pe pa’iguasu oikovahína umi árape, uperire ae ohokuaa jevy itáva ha hógape, pe távape ha’e okañy haguégui oúvo.

7Upevarã ojeporavo Cedes, Galiléape, Neftali cérrope; Siquem, Efrain cérrope, ha Quiriat-arba (pevahína Hebron), Juda cérrope.

8Ha Jordan mboypýri, Jericógui kuarahyresẽ gotýo, oiporavo hikuái Beser, pe desiértope, pe ñuguasu Ruben tríbu yvýpe; Ramot, Galaádpe, Gad tríbu yvýpe; ha Golan, Basánpe, Manases tríbu yvýpe.

9Ko’ãvahína umi táva ojeporavova’ekue mayma Israel tribukuéra ha tetã ambueyguápe g̃uarã oikóva ijapytepekuéra, ohokuaa hag̃ua ipype oimeraẽ ojukáva hapichápe ojukase’ỹre, ani hag̃ua omano ha’e pe ojejukava’ekue pehẽngue po rupi, oñembojovakeha ára peve ichupe, pe táva rokẽme, umi tavaygua renondépe.

← Chapter 19 Jump to: Chapter 21 →