Joshua 24

Guarani 2015 (Ñanderuete Ñe’ẽ Porã 2015)

← Chapter 23 Jump to:

1Josue ombyatyuka Siquémpe mayma Israel tribukuérape, ha ohenói opaite mburuvicha’ípe, mburuvicha, mbojovakehára ha karai ancianokuérape oñemboja hag̃ua hikuái Ñanderuete renondépe.

2Ha Josue he’i mayma hetãyguakuérape, péicha he’i Ñanderuete, Israel Jára: Pende ru, Tare, Abraham ha Nacor ru, oikomiva’ekue hikuái ambue jára rembiguái ramo ysyry Éufrates mboypýri.

3Che katu aiporavo pende ru Abrahámpe, ysyry Éufrates mboypýrigui, ha agueru ichupe Canaan yvy tuichakuépe ame’ẽvo ichupe ita’ýra Isaac, ha ambohetávo iñemoñarenguérape.

4Ha Isaácpe ame’ẽ Jacóbo ha Esaúpe. Esaúpe ame’ẽ Seir cerrokuéra, imba’erã ramo; ha Jacóbo ha ita’yrakuéra katu oho Egíptope.

5Ha Che amondo Moises ha Aarónpe ahavira hag̃ua Egíptope, ijapytépe ajapo sarambiguasu poguenohẽ hag̃ua.

6Aguenohẽ rire pende ypykuérape Egíptogui, og̃uahẽ hikuái Yguasu Pytã rembe’ýpe; umi Egiptoygua katu ou pende ypykuéra rapykuéri Yguasu Pytã meve icárro ha ikavaju árigua reheve.

7Pesapukáigui chéve, Che amoypytũ pe ára peẽ ha Egiptoyguakuéra pa’ũme, ha penderupitypota jave, pe yguasu ojaho’i ichupekuéra; ha pende resa ohechapa ajapova’ekue Egiptoyguakuéra rehe. Ha uperire pepyta heta ára pe desiértope.

8Che pomoinge Amorguakuéra yvýpe, oikomiva’ekue Jordan mboypýri, ha oñorãirõva’ekue hikuái penendive; Che katu amoĩ ichupekuéra pende pópe, ha ijyvy peguereko ko’ág̃a pene mba’e ramo, Che ahundígui ichupekuéra pene renonderãgui.

9Upéi Balac, Zipor ra’y, Moabguakuéra retã ruvicha oñemoĩ penderehe ohenoiukávo Balaam, Beor ra’ýpe, penemaldeci hag̃ua,

10ha Che ndajapysakái Balaam rehe, Che pehovasaukava’ekue uvei jevy jey, ha Che posalva ipógui.

11Pehasa pe Jordan ha peju Jericópe peñemomba’e hag̃ua itávare; ha Che amoĩ pende pópe: Amorgua, Ferezgua, Canaangua, Hetgua, Gergesgua, Hevgua ha Jebusguakuérape,

12Che amondo pene renonderãme káva pytã (ñemondýi), umíva omosẽ umi mokõi Amorgua ruvichakuérape pene renonderãgui, ndaha’éi pende kyse puku rupi, ha ndaha’éi pende guyrapa rupi.

13Che ame’ẽ peẽme ijyvy pemba’apo’ỹre ha itavakuéra peẽ pemopu’ã’ỹva peiko hag̃ua ipype; iparral ha ijolivotykuéra peñotỹ’ỹva, ko’ág̃a pe’upeína hi’akuéra.

14Upévare pekyhyjéke ko’ág̃a pende Ruetégui ha peiko hembiguái ramo pende py’a potĩ porãme ha hekoitépe; ha peipe’a pende apytégui umi jára gua’u pende rukuéra omomba’eguasúmiva pe ysyry Éufrates mboypýri ha Egíptope; ha peñeme’ẽmba pende Ruete pópe.

15Ha ivai ramováicha peẽme peiko hag̃ua pende Ruete rembiguái ramo, peiporavóke mávapepa peikose tembiguái ramo: Pende ru jára gua’u ysyry Éufrates mboypýri guarépe, térãpa Amorgua jarakuérape, ijyvýpe peikopeína. Che ha che róga katu roikóta Ñanderuete rembiguái ramo.

16Upémaramo Israelguakuéra he’i ichupe: Araka’eve ndoropoimo’ãi Ñanderuetégui roiko hag̃ua ambue jára rembiguái ramo.

17Ñanderuete, ore Jára voi oreguenohẽva’ekue oréve ha ore rukuérape Egípto retãgui, tembiguái reko poguýgui; Ha’e ojapova’ekue ko’ã techaukahaguasuetéva, ha oñangareko orerehe tape pukukue javeve mamo roiko hague rupi, ha mayma umi tetãygua mamo jahasa haguérupi.

18Ha Ñanderuete omosẽ ñane renonderãgui mayma tetãyguakuérape ha Amorguakuérape oikova’ekue ko yvýpe; upévare ore avei roikóta Ñanderuete rembiguái ramo, Ha’égui ore Jaraite.

19Upéramo Josue he’i hetãyguakuérape: Ndapeiko pukumo’ãi Ñanderuete rembiguái ramo, Ha’égui peteĩ Jára heko porãva, ha heko hakate’ỹva, ndoheja reimo’ãi pende reko ñepu’ã ha peikose ramo pene angaipápe.

20Pepoi ramo Ñanderuetégui ha peiko ramo ambue jára rembiguái ramo, Ha’e oñemomombyrýta pendehegui ha ojapóta penderehe mba’e ivaíva, ha penehundiva’erã, ojapo rire heta mba’e porã penderehe.

21Upémaramo Israelguakuéra he’i Josuépe: Nahániri, katuete roikóta Ñanderuete rembiguái ramo.

22Ha Josue he’i jevy hetãyguakuérape: Peẽ voi chéve techahare, peẽ peiporavo haguére Ñanderuetépe peiko hag̃ua hembiguái ramo, ha ha’ekuéra he’i jevy: Techahare ningo ore.

23Peipe’áke ko’ág̃a opaite ambue jára oĩva guive pende apytépe, ha pemboyke pene ñe’ã Ñanderuete, Israel Járape g̃uarãnte.

24Ha umi tetãygua he’i jevy Josuépe: Ñanderuete, ore Jára rembiguái ramónte roikóta ha iñe’ẽme oreñe’ẽrendúta.

25Upéramo Josue he’i hetãyguakuérape oñeme’ẽmba hag̃ua pe araitépe Ñanderuete pope; ome’ẽ ichupekuéra tekombo’e ha tembiapoukapykuéra Siquémpe.

26Ha Josue ohai ko’ã ñe’ẽ Ñanderuete kuatiañe’ẽme oĩháme hembiapoukapykuéra; ha ojapyhy peteĩ ita tuicháva, omopu’ã pe encína (yvyra) rakã guýpe, oĩva Ñanderuete róga jojohuha ypýpe.

27Ha Josue he’i mayma tetãyguápe: Péina ápe ko ita ndetuicháva oikóta peẽme techahare ramo. Ha’e ohendúgui opaite Ñanderuete ñe’ẽ, Ha’e he’iva’ekue guive ñandéve; ko ita kóva opytáta techahare ramo peẽme g̃uarã, ani hag̃ua pendejapútei Ñanderuetépe.

28Ha Josue omondo hetãyguakuérape, peteĩteĩvape ijyvyteépe.

29Ko’ã mba’e rire omano Josue, Nun ra’y, Ñanderuete rembiguái, oguerekóma ramo 110 áño.

30Ha’ekuéra oñotỹ ichupe ijyvyteépe, Timnatserápe, opytáva Efrain cérrope, Gaas cérro nórte gotýo.

31Ha Israel ojerovia Ñanderuetére, Josue oikove aja pukukue, ha oikove aja avei umi karai ancianokuéra oipytyvõva’ekue Josuépe oisãmbyhy hag̃ua Israel retãme, umía oikuaapágui avei opaite mba’e Ñanderuete ojapomava’ekue Israel rehe.

32Siquémpe Israelguakuéra oñotỹ avei Jose kanguekue, Israel ñemoñarenguéra ogueruva’ekue Egíptogui, pe ñu Jacóbo ojoguava’ekue Hamor ñemoñarenguéragui, Siquem ru, 100 pirapire akytã rehe; ha péva opyta Jose ñemoñarenguéra yvytee ramo.

33Omano avei Eleazar, Aaron ra’y, ha oñotỹ hikuái ichupe Gibéa, ita’ýra Finees yvyteépe, Efrain cérrope.

← Chapter 23 Jump to: