Joshua 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Josue, Nun ra’y, omondo Sitim guive mokõi kuimba’e omaña ñemi hag̃ua ha he’i ichupekuéra: Tapeho Jericópe, pehecha ha peikuaa porã hag̃ua pe yvy péva. Ha’ekuéra oho ha oike peteĩ kuña reko vaíva rógape, héra Rahab, ha opyta hikuái upépe.

2Ha oñemombe’u Jerico ruvichápe, oje’évo ichupe: Péina ápe, kuimba’ekuéra Israel pegua oúkuri ko pyharépe Rahab rógape, omaña ñemi hag̃ua ñande yvy rehe.

3Upéramo Jerico ruvicha he’iuka Rahábpe: Eguenohẽ umi kuimba’e ouva’ekue ne rendápe ha oikeva’ekue nde rógape; oúgui hikuái omaña ñemi hag̃ua ñande yvy tuichakue rehe.

4Ha pe kuña oñomiva’ekue umi kuimba’épe, he’ívo: Añetehápe oúkuri mokõi kuimba’e che rendápe, che katu ndaikuaáikuri ichupekuéra.

5Ha pe táva rokẽ oñemboty mboyve, ko ka’arupytũme, umi kuimba’e osẽma, ha ndaikuaái mamópa ohóra’e hikuái; pya’éna tapeho hapykuéri, pehupity hag̃ua ichupekuéra.

6Ha’e katu oñongatu ichupekuéra hóga ape ári, ha oñomi ichupekuéra ka’avo inimborã jokuapy guýpe, omoĩva’ekue upépe ombokuarahy hag̃ua.

7Ha Jerico soldadokuéra oho hapykuerikuéra Jordan rape rehe, pe y ojehasaha peve (páso); oñemboty riréma pe táva rokẽ osẽ hikuái omuña hag̃ua Israelgukuérape.

8Umi Israelgua oke mboyve, pe kuña ojupi hendapekuéra, hóga ape ári, ha he’i ichupekuéra:

9Aikuaa pende Jára ome’ẽtaha peẽme ko yvy kóva; rokyhyjepágui pendehegui ha mayma ko’ã tetãygua ipy’a kangypáma okyhyjégui pendehegui.

10Rohendúma pende Jára omokã hague Yguasu Pytã (Mar Rójo) pene renonderãme, pesẽ ramoguare Egíptogui, ha umi mba’e pejapova’ekue mokõi Amor retã ruvicha rehe, oikova’ekue Jordan mboypýri, pehundívo Sehon ha Ógpe.

11Rohendupa rire ko’ã mba’e, orepy’a kangypa ha peẽ rupi opaite kuimba’e naikyre’ỹvéi, pende Ruete voi ningo yvága ha yvy Jára.

12Upévare ajerure peẽme peme’ẽ chéve pene ñe’ẽ pende Ruete renondépe, che poiporiahuvereko háicha peẽme, péicha peẽ pejapo jevytaha che ru róga rehe, ha upevarã peme’ẽ chéve peteĩ techaukaha aikuaa porã hag̃ua;

13peẽ pesalvataha che ru ha che sy rekove, che kyvy ha che kypy’ykuéra, ha ore rogayguakuérape; peguenohẽ ore rekovekuéra ñemanógui.

14Upérõ Israelgua he’i ichupe: Ore rekove romoĩta pende rekove rehe, napemombe’úi ramo mba’eve; ha ág̃a ore Ruete ome’ẽvo oréve ko yvy kóva, ore añetehápe poiporiahuverekóta.

15Upémaramo pe kuña omboguejy ichupekuéra peteĩ sã reheve hovetã rupi; hóga oĩgui pe táva tápia yvate rehe, ha pe kuña oiko voi upépe.

16Ha pe kuña he’i ichupekuéra: Tapeho pe cérrope, ani hag̃ua pendejohu umi ohova’ekue pende rapykuéri; ha pekañy upépe mbohapy ára, umi ohova’ekue pende rapykuéri ou jevy peve; uperire tapeho pende rape rehe.

17Upéi ha’ekuéra he’i ichupe: Ore rojapopáta hekoitépe rome’ẽgui ndéve ore ñe’ẽ.

18Péina ág̃a ore roikévo ko yvýpe, eñapytĩ ko pióla (sã) pytãva ne rovetãre nde oremboguejytaha rupi, ha embyatypa nde rógape nde ru ha nde sy, nde kyvy ha nde ru rogayguakuérape.

19Oime ramo osẽva nde róga rokẽgui oka gotýo, huguy oĩta iñakã ári, ha ore orepotĩta. Ha oimeraẽ oĩva nde rogapýpe nendive, huguy oĩta ore akã ári, sapy’a oĩ ramo pe opokóva hesekuéra.

20Ha nde remombe’u ramo ore rembiapo, ore ropytáta sã’ỹre ko ne ñe’ẽ nde oremoñe’ẽme’ẽva’ekuégui.

21Ha pe kuña he’i: Tojehu peje háicha. Upéi omomaitei paha ichupekuéra ha oho hikuái; ha ha’e oñapytĩ pe sã pytã hovetã rehe.

22Ha og̃uahẽ hikuái pe cérrope ha opyta upépe mbohapy ára pukukue, ojevy peve umi osẽva’ekue penderekávo; ha umi imuñahare oheka umi tape rupi, ndojohúi katu ichupekuéra.

23Upémaramo umi mokõi kuimba’e ojevy avei; oguejy pe cérrogui, ohasa pe Jordan, ha ou hikuái Josue, Nun ra’y rendápe, ha omombe’u ichupe opaite mba’e ojehuva’ekue ichupekuéra.

24Ha he’i hikuái Josuépe: Ñanderuete omoĩmbáma pe yvy ñande pópe; ha mayma hetãygua ipy’a kangýma ñane renondépe.

← Chapter 1 Jump to: Chapter 3 →