Joshua 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Mayma tetã ruvicha, umi Hetgua, Amorgua, Canaangua, Ferezgua, Hevgua ha Jebusguakuéragui oikóva Jordan rembe’y kuarahyresẽ guive yguasu ha Líbano retã rembe’y peve, taha’e ñu megua térã cérro pegua,

2oñemoĩ hikuái peteĩ ñe’ẽme oñorãirõmba hag̃ua Josue ha Israelguakuéra ndive.

3Ha umi Gabaongua, ohendúvo opaite mba’e Josue ojapova’ekue Jerico ha Hái rehe,

4oñeha’ã hikuái ombotavy hag̃ua Josuépe, upévare omondo hendápe ñe’ẽrerahahára ou gua’úva mombyryetégui, ha’ekuéra ogueraha vosa tujakue ibúrro ári ha víno ryru tymba pirekue tujávape, osoropyréva ha oñemyatyrõ jevýva,

5ha sapatu tuja oñembovyvy jo’a jo’áva ipykuéra rehe, ha omonde ijehe ao tuja; ha pe pan oguerúva hembi’urã ramo ituja ha havẽmbáma.

6Ha ou hikuái Josue rekohápe oĩva Gilgálpe, ha he’i hikuái ichupe ha Israelguakuérape: Ore roju tetã mombyryetereígui; peikéna orendive jekupytýpe.

7Ha Israelguakuéra he’i umi Hevguápe: Ikatu porãnte peẽ peiko orekuéra apyte rupínte. Mba’éicha piko roikéta penendive jekupytýpe.

8Ha he’i hikuái Josuépe: Ore ningo ne rembiguái. Ha Josue he’i ichupekuéra: Mavakuérapa peẽ, ha mamóguipa peju.

9Ha ha’ekuéra he’i jevy: Ne rembiguaikuéra ou tetã mombyryetereígui, oñemoherakuãguasu oréve pende Ruete réra ha opaite mba’e Ha’e ojapova’ekue Egíptope,

10ha opaite mba’e ojapova’ekue Amorgua retã ruvicha mokõivéva rehe, oikova’ekue Jordan mboypýri: Sehon, Hesbon ruvicha rehe, ha Og, Basan ruvicha rehe, oikova’ekue Astarótpe.

11Upéicharupi ore retã ruvicha ha mayma ore retãyguakuéra he’i oréve: Pegueraha pende rape rehe g̃uarã tembi’u, ha tapeho Israel rendápe, ha peje ichupekuéra: Ore ningo pene rembiguái, peikéna orendive jekupytýpe.

12Ko ore pan haku asy gueteri ore rosẽ ramoguare ore rógagui roju hag̃ua pene rendápe, ha péina ápe hatãmba ha havẽmbáma.

13Ore víno ryru kavara pirekueguiguáva avei ipyahu gueteri romyenyhẽvo; ha péina ápe osoróma; ha ore aokuéra ha ore sapatukuéra itujapáma ipukuetereígui ore rape.

14Ha Israelguakuéra oguerovia iñe’ẽ, ohechávo itujapamaha, nomba’eporandúi katu Ñanderuetépe.

15Josue ha Israel karai ancianokuéra oike hendivekuéra jekupytýpe ome’ẽvo ichupekuéra iñe’ẽ oikoveva’erãha.

16Oiko rire jekupyty pe ára mbohapyhápe oikuaa katu ha’ekuéra oikoha ipa’ũmekuéra, Canaan yvýpe.

17Ha Israel ñemoñarenguéra oikeve ohóvo Canaan retãme, ojohu itavakuéra pe ára mbohapyhápe Gabaon, Cafira, Beerot ha Quiriatjearim.

18Ha Israelguakuéra ndojukái ichupekuéra, Josue ha ancianokuéra ome’ẽ haguére iñe’ẽ oikoveva’erãha, upévare mayma Israelgua oñe’ẽguyguy vai imburuvichakuéra rehe.

19Josue ha ancianokuéra he’i katu mayma Israelguakuérape: Ore rome’ẽgui ore ñe’ẽ Ñanderuete, Israel Jára rérape ndaikatúi japoko hesekuéra.

20Kóicha jajapóta ichuguikuéra: Jahejáta toikove, ani hag̃ua ou ñandeári Ñanderuete pochy, ndajajapói ramo ñane ñe’ẽ,

21ha he’ive hikuái: Peheja toikove, ha jajapo ichuguikuéra jepe’a apoha ha y rerojaha mayma atyguápe g̃uarã, ore rome’ẽgui ore ñe’ẽ ndikatúi ñapyrũ hesekuéra.

22Ha Josue ohenóivo ichupekuéra, he’i: Mba’érehepa orembotavyra’e, pejévo: Roiko mombyryeterei pendehegui, peiko ramo ore apytépe,

23upévare ko’ág̃a peẽ peñemaldecipyre, ha peikova’erã ore rembiguái ramo peikytĩ hag̃ua jepe’a ha peguenohẽ hag̃ua y ore Jára rógape g̃uarã.

24Ha’ekuéra oñe’ẽ jevy Josuépe ha he’i: Ne rembiguaikuéra oikuaa voi pende Ruete, pende Jára he’i hague hembiguái Moiséspe ome’ẽtaha peẽme opaite ko’ã yvy, ha ohundipava’erãha opaite tetãyguakuéra oikóva guive ipype, ko’ã mba’égui ore rokyhyjeiterei ha upévagui rojapo ko’ã mba’e.

25Ha péina roñemoĩ nde pópe, ejapo orehegui iporãve háicha ndéve.

26Péicha Josue osalva ichupekuéra Israel ñemoñarenguéra pógui, ha ndohejái hetãyguakuéra ojuka Gabonguakuérape.

27Ha pe ára péva guive oiko hikuái jepe’a apoha ha y rerojaha ramo Israelguakuérape g̃uarã, ha kuave’ẽmby rembiapópe g̃uarã mamo Ñanderuete oiporavotahápe, ha péicha oiko ko ára peve.

← Chapter 8 Jump to: Chapter 10 →