2 Kings 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Karon may setenta ka mga kaliwat ni Haring Acab nga nagaestar sa siudad sang Samaria. Si Jehu nagsulat kag ginpadala ini sa mga pangulo sang siudad, sa mga kinilala nga mga pumoluyo, kag sa mga manugtatap sang mga kaliwat ni Acab. Ang sulat nagasiling:

2“Kamo ang gintugyanan sang mga kaliwat sang hari, subong man sang mga karwahi, mga kabayo, mga hinganiban kag mga siudad nga napamakuran. Gani sa inyo pagbaton sini nga sulat,

3magpili kamo sing labing maayo kag makasarang nga tawo sa mga kaliwat sang hari; himua ninyo sia nga hari, kag magpakig-away kamo sa pag-apin sa iya.”

4Ang mga pangulo sang Samaria hinadlukan gid. Nagsiling sila, “Ano ang pagkabato naton kay Jehu, nga bisan gani si Haring Joram ukon si Haring Ocozias indi makasarang sa iya?’

5Gani ang opisyal nga gintugyanan sang palasyo kag ang opisyal nga gintugyanan sang siudad, upod sa kinilala nga mga pumoluyo kag mga gwardya, nagpadala sini nga mensahe kay Jehu: “Kami imo mga alagad, kag handa kami sa paghimo sang bisan ano nga imo ginasiling. Pero indi kami maghimo kay bisan sin-o nga manginhari. Himua ang labing maayo nga ginahunahuna mo.”

6Si Jehu nagsulat sa ila sang isa pa gid ka sulat: “Kon nagaapin kamo sa akon, kag handa sa pagtuman sang akon mga sugo, dalha ninyo ang mga ulo sang mga kaliwat ni Haring Acab sa akon sa Jezreel sa sini nga tion buas.” Ang setenta ka mga kaliwat ni Haring Acab yara sa idalom sang pag-atipan sang kinilala nga mga pumoluyo sang Samaria, nga amo ang nagsagod sa ila.

7Sang mabaton ang sulat ni Jehu, ang mga pangulo sang Samaria nagpamatay sang setenta ka mga kaliwat ni Acab, ginbutang ang ila mga ulo sa mga alat kag ginpadala ini sa kay Jehu sa Jezreel.

8Sang masugiran si Jehu nga ang mga ulo sang mga kaliwat ni Acab gindala, nagsugo sia sa ila nga tumpokon ini sa duha ka tumpok sa pwerta sang siudad, kag ibilin ini didto tubtob mag-aga.

9Sang pagkaaga, naggwa sia sa pwerta, kag nagsiling sa mga tawo nga yadto didto, “Ako amo ang nagplano batok kay Haring Joram kag nagpatay sa iya. Wala kamo sing salabton sina. Pero sin-o ang nagpatay sini tanan?

10Ini nagapamatuod nga ang tagsa ka butang nga ginsiling sang Ginoo nahanungod sa mga kaliwat ni Acab matuman. Gintuman sang Ginoo ang iya ginsaad paagi kay Elias nga propeta.”

11Dayon ginpamatay ni Jehu ang nabilin nga mga pariente ni Acab nga nagaestar sa Jezreel, ang tanan niya nga mga opisyales, ang suod nga mga abyan, kag ang mga pari, kag wala sing nabilin sa ila nga buhi.

12Naghalin si Jehu sa Jezreel kag nagkadto sa Samaria. Sa dalanon, sa lugar nga ginatawag “Kampo sang mga Manugbantay sang mga Karnero,”

13nasugata niya ang iban nga mga pariente sang napatay nga hari nga si Ocozias sang Juda, kag nagpamangkot sia sa ila, “Sin-o bala kamo?” Nagsabat sila, “Mga pariente kami ni Ocozias. Nagapakadto kami sa Jezreel sa pagbisita sang mga anak sang rayna nga si Jezebel kag sang iban nga mga panimalay sang hari.”

14Si Jehu nagsugo sa iya mga tinawo, “Dakpa ninyo sila nga buhi!” Gindakop nila sila, kag ginpamatay sila didto malapit sa buho. Mga kwarentay dos sila tanan, kag wala sing isa sa ila nga nabilin nga buhi.

15Nagpadayon liwat si Jehu sa paglakat, kag sa iya dalanon nasugata niya si Jonadab nga anak ni Recab. Gin-abiabi sia ni Jehu kag nagsiling, “Pareho ang aton panghunahuna. Magasakdag ka bala sa akon?” Nagsabat si Jonadab, “Huo, magasakdag ako sa imo.” Si Jehu nagsabat, “Kon amo, idaho sa akon ang imo kamot.” Nagkamustahanay sila, kag si Jehu nagpasaka sa iya sa karwahi,

16nga nagasiling, “Upod ka sa akon kag makita mo kon daw ano ang akon katutom sa Ginoo.” Kag nag-upod sila sakay pakadto sa Samaria.

17Sang pag-abot nila didto, ginpamatay ni Jehu ang tanan nga mga pariente ni Acab nga wala sing ginbilin nga buhi bisan isa. Amo ini ang mahanabo suno sa ginsiling sang Ginoo kay Elias.

18Gintawag ni Jehu sing tingob ang mga tawo sang Samaria kag nagsiling, “Si Haring Acab nagsimba sing pasapayan sa diosdios nga si Baal, pero magaalagad ako sa iya sing sobra pa.

19Tawga ninyo sing tingob ang tanan nga mga propeta ni Baal, ang tanan nga nagasimba sa iya, kag ang iya tanan nga mga pari. Kinahanglan ang tanan mag-abot, kay magahalad ako sing isa ka daku nga halad kay Baal, kag ang bisan sin-o nga indi mag-abot pagapatyon.” Amo ini ang pahito ni Jehu agod mapamatay niya ang tanan nga mga nagasimba kay Baal.

20Dayon si Jehu nagsugo, “Maghiwat kamo sing isa ka adlaw nga pagsimba sa kadungganan ni Baal!” Gintuman nila ini,

21kag si Jehu nagpadala sing pahibalo sa bug-os nga duta sang Israel. Ang tanan nga mga nagasimba kay Baal nag-abot, kag wala gid sing isa sa ila nga wala mag-abot. Nagsulod sila tanan sa templo ni Baal kag napuno gid ini.

22Dayon ginsugo ni Jehu ang pari nga gintugyanan sang balaan nga mga bayu nga dalhon ini pa gwa kag ihatag sa mga sumilimba.

23Pagkatapos sini, si Jehu mismo nagsulod sa templo upod kay Jonadab nga anak ni Recab, kag nagsiling sa mga tawo didto, “Pat-ura ninyo nga mga sumilimba lamang ni Baal ang yari diri, kag wala sing sumilimba sa Ginoo nga nakasulod.”

24Dayon sia kag si Jonadab nagsulod sa pagdulot sang mga halad kag mga halad nga sinunog kay Baal. Ginbutangan niya sang otsenta ka tawo sa gwa sang templo, kag ginsingganan sila: “Pamatyon ninyo ini tanan nga mga tawo: ang bisan sin-o nga magpapalagyo sang bisan isa sa ila pagabayaran niya sang iya kaugalingon nga kabuhi!”

25Sa tapos nga makadulot si Jehu sang mga halad, nagsiling sia sa mga gwardya kag sa mga opisyales, “Sulod kamo kag pamatyon sila tanan. Indi ninyo pagtugoti nga may makapalagyo!” Nagsulod sila nga may mga espada, ginpamatay sila tanan, kag ginguyod ang mga bangkay pa gwa. Dayon nagsulod sila sa nasulod nga bahin sang templo,

26gindala pa gwa ang balaan nga haligi nga yadto didto, kag ginsunog ini.

27Gani ginguba nila ang balaan nga haligi kag ang templo, kag ginhimo ini nga palamus-onan, tubtob sini nga adlaw.

28Sa sini nga paagi gindula ni Jehu ang pagsimba kay Baal sa Israel.

29Pero ginsunod niya ang sala ni Haring Jeroboam, nga nagdala sa Israel sa pagsimba sa mga baka nga bulawan nga ginpatindog niya sa Betel kag sa Dan.

30Ang Ginoo nagsiling kay Jehu, “Gintuman mo ang tanan nga ginsiling ko sa imo sa mga kaliwat ni Acab. Gani nagasaad ako sa imo nga ang imo mga kaliwatan, tubtob sa ikap-at ka kaliwatan magahari sa Israel.”

31Pero si Jehu nagpatumbaya sa bug-os niya nga tagipusoon sa pagtuman sang Kasugoan sang Ginoo, ang Dios sang Israel, sa baylo nagsunod sia sa ginhimo ni Jeroboam, nga nagdala sa Israel sa pagpakasala.

32Sa sadto nga tion ang Ginoo nagsugod sa pag-iban sang kadutaan sang Israel. Si Haring Hazael sang Siria nagpangagaw sang tanan nga sakop sang Israel

33sa nasidlangan sang Jordan, tubtob sa nabagatnan sang banwa sang Aroer sa Suba sang Arnon—ini nagalakip sang mga sakop sang Galaad kag Basan, sa diin nagaestar ang mga tribo ni Gad, ni Ruben, kag ni Manases sa Sidlangan.

34Ang tanan nga mga ginhimo ni Jehu, lakip ang iya bantog nga mga binuhatan, nasulat sa Maragtas sang mga Hari sang Israel.

35Napatay sia kag ginlubong sa Samaria, kag si Joacaz nga iya anak nagbulos sa iya subong hari.

36Naggahom si Jehu sa Samaria subong hari sang Israel sing baynte otso ka tuig.

← Chapter 9 Jump to: Chapter 11 →