2 Kings 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Sang pagkahibalo ni Atalia nga iloy ni Haring Ocozias nga ang iya anak ginpatay, nagsugo sia sa pagpamatay sa tanan nga mga katapo sang panimalay sang hari.

2Si Joas lamang nga anak ni Ocozias amo ang nakapalagyo. Kuntani palatyon na sia upod sa iban, pero ginluwas sia sang iya tiya nga si Josaba. Si Josaba anak ni Haring Jehoram nga utod sa amay ni Ocozias. Gindala niya sia upod ang iya manugtatap sa isa ka kwarto sa Templo, kag gintago sia agod indi makita ni Atalia, kag indi mapapatay.

3Sa sulod sang anom ka tuig gin-atipan ni Josaba ang bata nga lalaki kag gintago sa Templo, samtang si Atalia naggahom subong rayna.

4Pero sa ikapito ka tuig, si Joiada nga pari nagpatawag sing mga opisyales nga gintugyanan sang mga gwardya sang hari kag sang mga gwardya sang palasyo, kag ginpakadto sila sa Templo, sa diin ginpasumpa sila sa pagsugot sa iya plano. Dayon ginpakita niya sa ila si Joas nga anak ni Haring Ocozias,

5kag ginmanduan sila nga nagasiling: “Kon magkadto kamo sa paggwardya sa Adlaw nga Inugpahuway, ang ikatlo nga bahin sa inyo magbantay sa palasyo.

6Ang isa pa gid ka tatlo ka bahin sa inyo magbantay sa Pwerta sang Sur, kag isa pa gid ka bahin magbantay sa pwerta sa likod sang mga gwardya.

7Ang duha ka grupo nga wala nagagwardya sa Adlaw nga Inugpahuway magabantay sa Templo sa pag-apin sa hari.

8Ihanda ang inyo mga espada sa pagbantay kay Haring Joas, kag sundon ninyo sia bisan diin sia magkadto. Ang bisan sin-o nga magpalapit sa inyo pagapatyon.”

9Ang mga opisyales nagtuman sang mga sugo ni Joiada, kag gindala nila ang ila mga tinawo sa iya—ang mga wala nagabantay sa Adlaw nga Inugpahuway kag ang mga nagabantay.

10Ginhatagan niya ang mga opisyales sing mga bangkaw kag mga taming nga iya ni Haring David, nga gintago sa Templo,

11kag ginbutang niya ang mga tawo nga may mga espada, sa palibot sang atubangan sang Templo, sa pag-apin sa hari.

12Dayon gindala ni Joiada si Joas sa gwa, ginkoronahan sia kag ginhatagan sia sang kopya sang mga kasugoan nahanungod sang pagkahari. Dayon ginhaplasan si Joas kag ginpakilala nga hari. Ang mga tawo nagpamalakpak kag nagsinggit, “Mabuhay ang hari!”

13Nabatian ni Atalia nga rayna ang ginahod sang mga gwardya kag sang mga tawo, gani nagdalidali sia pakadto sa Templo, sa diin nagatipon ang mga tawo.

14Didto nakita niya ang bag-o nga hari nga nagatindog sa tupad sang haligi sa salamputan sang Templo, suno sa kinabatasan. Ginalibutan sia sang mga opisyales kag mga manugtrumpeta, kag ang mga tawo nagahilinugyaw kag nagapatunog sang mga trumpeta. Gingisi ni Atalia ang iya bayu sa kaakig kag nagsinggit, “Pagluib! Pagluib!”

15Indi luyag si Joiada nga patyon si Atalia sa sakop sang Templo, gani nagsugo sia sa mga opisyales sang mga hangaway: “Dalha ninyo sia paggwa nga ginapatung-an sang duha ka kubay sang mga gwardya, kag patya ninyo ang bisan sin-o nga magtinguha sa pagluwas sa iya.”

16Gindakop nila sia, gindala sa Pwerta sang Kabayo pakadto sa palasyo, kag didto ginpatay nila sia.

17Gani si Joiada nga pari naghimo sing kasugtanan sa tunga sang Ginoo kag ni Haring Joas kag sang mga tawo nga sila mangin-iya sang Ginoo nga mga tawo. Naghimo man sia sing kasugtanan sa tunga sang hari kag sang mga tawo.

18Ang mga tawo nagkadto sa templo ni Baal kag ginguba ini, ginguba man nila ang mga altar kag mga diosdios didto, kag ginpatay si Matan, ang pari ni Baal, sa atubangan sang mga altar. Nagbutang si Joiada sang mga gwardya sa pagbantay sang Templo,

19kag dayon sia, ang mga opisyales, ang mga gwardya sang hari, kag ang mga gwardya sang palasyo nag-upod sa hari halin sa Templo pakadto sa palasyo, nga ginasunod sang tanan nga mga tawo. Nagsulod si Joas sa Pwerta sang Gwardya, kag nagpungko sa trono.

20Ang tanan nga mga tawo napun-an sing kalipay, kag ang siudad naglinong, sa tapos ginpatay si Atalia sa palasyo.

21Nagaedad si Joas sing pito ka tuig sang maghari sia sa Juda.

← Chapter 10 Jump to: Chapter 12 →