2 Kings 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Sang pagkabati ni Haring Ezequias sang ginsugid sang iya mga opisyal, gingisi niya ang iya bayu sa kasubo, nagsuksok sang bayu nga sako, kag nagkadto sa Templo sang Ginoo.

2Ginpadala niya si Eliaquim, ang opisyal nga gintugyanan sang palasyo, si Sebna, ang sekretaryo sa korte, kag ang tigulang nga mga pari kay Isaias nga propeta nga anak ni Amoz. Sila man nagbayo sang sako.

3Nagsiling sia nga amo ini ang ila ihambal kay Isaias: “Sa sini nga adlaw amo ang adlaw sang pag-antos. Ginasilutan kita kag yara sa kahuloy-an. Kaangay kita sang isa ka babayi nga manugbata, pero tama kaluya sa pagpanganak.

4Ang hari sang Asiria nagpadala sang iya pinakamataas nga opisyal sa pagpakahuya sa buhi nga Dios. Kabay ang Ginoo nga imo Dios makabati sining pagpakahuya kag magsilot sadtong naghambal sini. Gani pangamuyo sa Dios para sadtong aton mga tawo nga nagkalabilin nga buhi.”

5Sang pagkabaton ni Isaias sang mga pulong ni Haring Ezequias,

6amo ini ang iya sabat: “Ang Ginoo nagasiling sa imo nga indi ka magkahadlok sa mga taga-Asiria nga nagasiling nga indi sia makaluwas sa imo.

7Ang Ginoo magatuga sing sugidsugid nga kon mabatian ini sang hari magapabalik ini sa iya, sa iya kaugalingon nga pungsod, kag ang Ginoo magapapatay sa iya didto.”

8Ang opisyal nga Asirianhon nakahibalo nga ang hari naghalin sa Lakis kag nagapakig-away sa malapit nga siudad sang Libna, gani nagkadto sia didto sa pagpakighinun-anon sa iya.

9Nakabati ang mga taga-Asiria nga ang mga hangaway nga Ehiptohanon nga ginapangulohan ni Haring Tirhaca sang Etiopia, nagapakadto sa pagsalakay sa ila. Sang mabatian ini sang hari, nagpadala sia sang sulat kay Haring Ezequias sang Juda

10sa pagsiling sa iya, “Ang dios nga imo ginasaligan nagsiling sa imo nga indi ikaw mahulog sa akon mga kamot, pero indi ina pagtugoti nga magpatalang sa imo.

11Nahibal-an mo kon ano ang ginahimo sang hari sang Asiria sa pungsod nga iya luyag laglagon. Nagahunahuna ka bala nga makapalagyo ikaw?

12Ang akon mga katigulangan nagpangguba sang mga siudad sang Gozan, Haran, kag Resef, kag ginpamatay ang mga tawo sang Beteden nga nagaestar sa Telassar, kag wala sing isa sang ila mga dios nga nakaluwas sa ila.

13Diin bala ang mga hari sang mga siudad sang Hamat, Arpad, Sefarvaim, Hena, kag Iva?”

14Ginkuha ni Haring Ezequias ang sulat gikan sa mga nagdala kag ginbasa ini. Dayon nagkadto sia sa Templo, ginbutang niya ang sulat didto sa presensya sang Ginoo,

15kag nagpangamuyo, “O Ginoo, ang Dios sang Israel, nga nagapungko sa imo harianon nga trono, sa ibabaw sang mga kerubin. Ikaw lamang amo ang Dios, nga nagagahom sa tanan nga mga ginharian sang kalibutan. Gintuga mo ang langit kag ang duta.

16Karon, O Ginoo, tan-awa ang nagakatabo sa amon. Pamatii ang tanan nga ginsiling ni Senaquerib sa pagpakahuya sa imo, ang buhi nga Dios.

17O Ginoo, nahibal-an namon tanan nga ang mga hari sang Asiria naglaglag sang madamo nga mga pungsod, ginhimo ang ila mga duta nga mamingaw,

18kag ginsunog ang ila mga dios—nga indi matuod nga dios, mga diosdios lamang nga kahoy kag bato nga ginhimo sang mga kamot sang tawo.

19Karon, O Ginoo nga amon Dios, luwasa kami gikan sa mga Asirianhon, agod nga ang tanan nga mga kapungsoran sang kalibutan makakilala nga ikaw lamang, O Ginoo, amo ang Dios.”

20Dayon si Isaias nagpahibalo kay Haring Ezequias nga nagasiling nga ang Ginoo nakabati sang iya pangamuyo kag nagsabat sini.

21Ang Ginoo nagsiling, “Ang siudad sang Jerusalem nagakadlaw sa imo, Senaquerib, kag nagayaguta sa imo.

22Sin-o bala ang ginahunahuna mo nga imo ginapakahuy-an kag ginayaguta? Wala ikaw nagatahod sa akon, ang balaan nga Dios sang Israel.

23Ginpadala mo ang imo mga opisyales sa pagpabugal sa akon, nga upod sa imo tanan nga mga karwahi, gintaklad mo ang pinakamataas nga bukid, bisan pa ang putokputokan sang kabukiran sang Libano. Nagpabugal ka nga ginpulod mo didto ang pinakamataas nga mga kahoy nga sedro, ang labing maayo nga mga kahoy nga sipre, kag nalambot mo ang pinakamalayo nga bahin sang mga kagulangan.

24Nagpabugal ka nga nagkutkot ka sang mga bubon kag nag-inom sang tubig sa iban nga duta, kag ang Suba sang Nilo nagmala sa agi sang imo mga hangaway.

25“Wala bala nimo mabatii nga ginplano ko ini sang una pa? Kag karon akon ini ginhimo. Ginhatagan ko ikaw sing gahom sa paglaglag sang mga napamakuran nga mga siudad.

26Ang mga tawo nga nag-estar didto wala sing gahom. Hinadlukan sila kag naurongan. Kaangay sila sang hilamon sa latagon ukon hilamon nga nagatubo sa atop, nga ginhuyop sang mainit nga salatan.

27“Pero nahibal-an ko ang tanan nahanungod sa imo, ang imo ginahimo kag kon diin ikaw nagakadto. Nahibal-an ko ang imo kaakig batok sa akon.

28Nakabati ako sang sugid nahanungod sang imo kaakig kag sang imo bugal, kag karon butangan ko sing tungatunga ang imo ilong kag busal ang imo baba, kag pabalikon ko ikaw sa dalan nga imo gin-agyan sang imo pag-abot.”

29Dayon si Isaias nagsiling kay Haring Ezequias, “Yari ang tanda sang matabo. Karon nga tuig kag sa madason magakaon ka lang sang trigo nga wala masab-og, pero sa masunod nga tuig sarang na ikaw makasab-og sang trigo kag makaani sini, kag makatanom sing ubas kag makakaon sang iya bunga.

30Ang tanan nga mabilin nga buhi sa Juda magauswag kaangay sang mga tanom nga makapanggamot sing madalom kag magapamunga.

31May mga tawo sa Jerusalem kag sa Bukid sang Sion nga mabilin nga buhi, tungod kay ang Ginoo nagpat-od sini nga matabo.

32“Amo ini ang ginsiling sang Ginoo nahanungod sa hari sang Asiria: ‘Indi sia makasulod sa sini nga siudad ukon makapana sing bisan isa ka baslay batok sini. Wala sing mga soldado nga may mga taming nga makapalapit sa siudad, kag wala sing mga trinsera nga mapatindog sa palibot sini.

33Magabalik sia sa amo man nga dalan nga iya gin-agyan sang iya pag-abot, kag indi sia makasulod sa sini nga siudad. Ako, ang Ginoo, naghambal sini.

34Apinan ko kag bantayan ini nga siudad, tungod sa akon kadungganan kag tungod sang ginsaad ko kay David nga akon alagad.’”

35Sadto nga gab-i ang anghel sang Ginoo nagsulod sa kampo sang mga taga-Asiria kag nagpatay sang 185,000 ka mga soldado. Sang kaagahon sa madason nga adlaw, didto nagahamyang sila tanan nga patay!

36Dayon si Senaquerib nga hari sang Asiria nalagyo kag nagbalik sa Ninive.

37Isa ka adlaw, sang nagasimba sia sa templo sang iya dios nga si Nisroc, ang duha sang iya mga anak nga lalaki nga amo sanday Adramelec kag si Sarezer, nagpatay sa iya paagi sa ila mga espada, kag dayon nagpalagyo sila sa duta sang Ararat. Ang isa sang iya mga anak nga lalaki nga si Esarhadon nagbulos sa iya subong hari.

← Chapter 18 Jump to: Chapter 20 →