2 Kings 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Si Eliseo nagsabat, “Pamatii ang ginasiling sang Ginoo! Buas sa amo man sini nga tion ang isa ka gantang sang pinakamaayo nga trigo ukon duha ka gantang sang sebada sarang mabakal sing isa ka bilog nga pilak sa balaligyaan sang Samaria.”

2Ang opisyal nga nagaupod sa hari nagsiling kay Eliseo, “Indi ina matabo—bisan ang Ginoo gid magpaulan sa gilayon!” Nagsabat si Eliseo, “Makita mo ini nga matabo, pero indi ka makatilaw sini nga pagkaon.”

3Sa gwa sang mga pwerta sang Samaria may apat ka mga tawo nga aruon, nga naghambalanay, “Ngaa bala magtener kita diri tubtob magkalamatay kita?

4Wala sing pulos nga magkadto kita sa siudad, tungod kay mapatay kita didto sa gutom, pero kon magpabilin kita diri mapatay man kita gihapon. Gani makadto kita sa kampo sang mga Sirianhon. Ang labing malain nga ila himuon amo ang pagpatay sa aton, pero basi pa man indi nila kita pagpatyon.”

5Gani, sang sirom na, nagkadto sila sa kampo sang mga Sirianhon, pero sang pag-abot nila wala sing tawo didto.

6Ginhimo sang Ginoo nga ang mga Sirianhon makabati sang ginahod kasubong sang nagapadulong nga madamo nga mga hangaway nga may mga kabayo kag mga karwahi. Naghunahuna ang mga Sirianhon nga ang hari sang Israel nagsuhol sa mga hari sang Hethanon kag Ehiptohanon kag sang ila mga hangaway sa pagsalakay sa ila.

7Gani ang mga Sirianhon nagpalagyo sadto nga gab-i sa pagluwas sang ila kabuhi. Ginbayaan nila ang ila mga tolda, mga kabayo, kag mga asno, kag ginbayaan nila ang ila kampo nga wala gid sing dala.

8Sang pag-abot sang apat ka mga tawo sa kilid sang kampo, nagsulod sila sa isa ka tolda, nagkaon kag nag-inom, ginpanguha ang pilak, bulawan kag mga bayu nga ila makita, kag naglakat sila kag gintago ini. Dayon nagbalik sila, nagsulod sa isa pa gid ka tolda kag amo man ang ila ginhimo.

9Pero nagsinilingay sila, “Indi maayo ining aton ginahimo! May maayo kita nga balita kag indi naton ini pagtaguon sa aton lamang kaugalingon. Kon maghulat kita tubtob mag-aga kag amo ang pagsugid sini, pat-od gid nga pagasilutan kita. Malakat kita subong, kag sugiran ta ang mga opisyales sang hari!”

10Gani naghalin sila sa kampo sang mga Sirianhon, nagbalik sa siudad kag nagpanawag sa mga gwardya sa mga pwerta: “Nagkadto kami sa kampo sang mga Sirianhon kag wala didto sing tawo, ang mga kabayo kag ang mga asno nagaid pa, kag ang mga tolda ginbayaan nila nga wala gid sila sing dala.”

11Ang mga gwardya nagsugid sini nga balita, kag ginsugid ini sa palasyo.

12Gab-i pa sadto, pero ang hari nagbangon kag nagsiling sa iya mga opisyales, “Sugiran ko kamo sang plano sang mga Sirianhon! Nahibal-an nila nga may gutom diri, gani ginbayaan nila ang ila mga tolda kag naglakat sa pagpanago sa latagon. Nagahunahuna sila nga bayaan naton ang siudad kag magpangita sing kalan-on, kag dayon dakpon nila kita nga buhi kag agawon ang siudad,”

13Ang isa sang iya mga opisyales nagsiling, “Ang mga tawo diri sa siudad magakalamatay gid man, kaangay sadtong nagkalamatay na. Gani ipadala naton ang pila ka mga tawo agod mahibal-an naton kon ano ang natabo. Sarang nila magamit ang lima ka kabayo nga nabilin diri.”

14Nagpili sila sing pila ka mga tawo, kag ang hari nagpadala sa ila nga nagasakay sa duha ka mga karwahi kag ginmanduan sila sa paglakat kag sa pag-usisa kon ano ang natabo sa mga hangaway nga Sirianhon.

15Ang mga tawo nakalambot tubtob sa Jordan, kag sa dalanon nakita nila ang mga bayu kag mga gamit nga ginpangwigit sang mga Sirianhon samtang nagapalagyo sila. Dayon nagbalik sila kag nagsugid sa hari.

16Ang mga tawo sang Samaria naggwa kag ginpanguha ang mga gamit sa kampo sang mga Sirianhon. Kag suno sa ginsiling sang Ginoo, ang isa ka gantang nga pinakamaayo nga trigo ukon duha ka gantang nga sebada nagabili lang sang isa ka bilog nga pilak.

17Natabuan nga ang hari sang Israel nagpili sang iya salaligan nga opisyal nga magdumala sa pagbantay sang pwerta sang siudad. Ang opisyal gintapak sang mga tawo didto tubtob napatay sia, suno sa gintagna ni Eliseo sang ang hari nagkadto sa pagpakigkita sa iya.

18Si Eliseo nagsiling sa hari nga sa amo man nga tion sa madason nga adlaw ang isa ka gantang sang pinakamaayo nga trigo ukon duha ka gantang nga sebada magabili sing isa ka bilog nga pilak sa balaligyaan sang Samaria,

19kag ginsabat ini sang opisyal nga nagasiling, “Indi ina matabo—bisan ang Ginoo gid magpaulan sa gilayon!” Kag si Eliseo nagsabat, “Makita mo ini nga matabo, pero indi ka makatilaw sini nga pagkaon.”

20Kag amo gid ini ang natabo sa iya—napatay sia, gintapak sang mga tawo tubtob napatay sia sa pwerta sang siudad.

← Chapter 6 Jump to: Chapter 8 →