2 Kings 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Sa ikapito nga tuig sang paggahom ni Haring Jehu sang Israel, si Joas nanginhari sang Juda, kag naggahom sia sa Jerusalem sing kwarenta ka tuig. Ang iya iloy amo si Sibia nga nagikan sa siudad sang Beerseba.

2Sa bug-os niya nga kabuhi naghimo sia sing matarong sa panulok sang Ginoo, tungod kay si Joiada nga pari nagtudlo sa iya.

3Pero ang mga altar sa diin ginasimba ang mga diosdios wala malaglag, kag ang mga tawo nagpadayon sa pagdulot sing mga halad kag pagsunog sing insyenso sa sini nga mga altar.

4Si Joas nagpatawag sang mga pari kag ginsugo sila sa pagtipon sang kwarta nga ginbayad sa kaangtanan sang mga halad sa Templo: ang kwarta nga ginabayad sang mga tawo subong buhis, kag ang kwarta nga ginahatag subong kinabubot-on nga mga dulot.

5Ang tagsa ka pari amo ang magadumala sang kwarta nga ginadala sa ila sang mga tawo nga ila ginaalagaran, kag ang kwarta gamiton sa pagpakaayo sang Templo, suno sa kinahanglanon.

6Pero nakalambot na sa ika-23 ka tuig ang paghari ni Joas, ang mga pari wala pa makapakaayo sang Templo.

7Gani ginpatawag niya si Joiada kag ang iban nga mga pari kag ginpamangkot sila, “Ngaa bala nga wala ninyo ginapakaayo ang Templo? Sugod karon indi na ninyo pagtaguon ang kwarta nga inyo ginabaton, kinahanglan itugyan na ninyo ini agod masugoran ang pagpakaayo.”

8Ang mga pari nagpasugot sini, kag nagpasugot man nga indi na pagkaayuhon ang Templo.

9Dayon si Joiada nagkuha sing isa ka kaban, ginbuhoan ini sa takop, kag ginbutang ini sa altar sa tuo nga kilid kon magsulod ka sa Templo. Ang mga pari nga nagaalagad sa pwerta nagbutang sa kaban sang tanan nga kwarta nga ginhatag sang mga sumilimba.

10Kon madamo na gani ang kwarta sa kaban, ang sekretaryo sang hari kag ang Pinakamataas nga Pari nagaabot kag ginaisip ang kwarta kag ginasulod sa sako kag ginahigtan.

11Sa tapos maisip ang kwarta, ginahatag nila ini sa mga tawo nga ginatugyanan sang obra sa Templo, kag ginabayaran nila ang mga panday, ang mga nagapatindog sang Templo,

12ang mga kantero, ang mga nagatihab sang bato, kag nagapamakal sang mga tablon kag sang mga bato nga ginagamit sa pagkaayo, kag sa pagbayad sang tanan nga kagastohanan nga may kaangtanan sini.

13Pero wala sing kwarta nga ginagamit sa pagbayad para sa paghimo sing mga kupa nga pilak, mga labador, mga trumpeta, ukon mga gamit para sa mga suga, ukon sang bisan ano nga sulodlan nga pilak ukon bulawan.

14Ginagamit ini tanan sa pagsweldo sa mga nag-ulobra kag sa pagbakal sang mga galamiton nga ginagamit sa pagkaayo.

15Ang mga tawo nga gintugyanan sang obra masaligan, gani, wala na sing kinahanglan ang paghusay sang kwarta.

16Ang kwarta nga ginahatag tungod sa mga halad nga bayad kag mga halad tungod sa sala, wala ginabutang sa kaban, kay iya ini sang mga pari.

17Sa sadto nga tion si Haring Hazael sang Siria nagsalakay sang siudad sang Gat kag nag-agaw sini, dayon nagpamat-od sia sa pagsalakay sang Jerusalem.

18Si Haring Joas sang Juda nagkuha sang tanan nga mga dulot nga ginhalad sa Ginoo sang mga hari nga una sa iya nga amo sanday Josafat, Jehoram kag Ocozias lakip ang iya kaugalingon nga dulot, kag sang tanan nga bulawan nga yara sa talaguan sang Templo kag sang palasyo, kag ginpadala ini tanan kay Haring Hazael subong regalo, kag dayon ginpahalin ni Haring Hazael ang iya mga hangaway sa Jerusalem.

19Ang tanan nga ginhimo ni Haring Joas nasulat sa Maragtas sang mga Hari sang Juda.

20Ang mga opisyales ni Haring Joas nagplano batok sa iya, kag ang duha sa ila, si Josacar nga anak ni Simeat kag si Jozabad nga anak ni Somer, nagpatay sa iya sa balay nga ginpatindog sa duta nga gintampok sa nasidlangan nga bahin sang Jerusalem, sa dalan padulhog sa Silla. Si Joas ginlubong sa mga lulobngan sang hari sa Siudad ni David, kag ang iya anak nga si Amasias nagbulos sa iya subong hari.

← Chapter 11 Jump to: Chapter 13 →