2 Kings 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Sa ika-17 nga tuig sang paggahom ni Peca nga anak ni Remalias subong hari sang Israel, si Acaz nga anak ni Jotam nanginhari sang Juda.

2Nagaedad sia sing baynte ka tuig sang paghari niya sa Jerusalem sa sulod sang desi-sais ka tuig. Wala sia magsunod sang matarong nga ginhimo sang isa sang iya mga katigulangan nga si Haring David; sa baylo, naghimo sia sang malaut sa panulok sang Ginoo nga iya Dios,

3kag nagsunod sa mga ginhimo sang mga hari sang Israel. Ginhalad niya bisan pa ang iya kaugalingon nga anak nga lalaki sa mga diosdios subong halad nga sinunog, sa pagsunod sa mga makangilil-ad nga ginhimo sang mga tawo nga gintabog sang Ginoo pa gwa sa duta samtang nagapasulod ang mga Israelinhon.

4Sa mga lugar sa diin ginasimba ang mga diosdios, sa mga kabakuloran, kag sa idalom sang magapa nga kahoy, si Acaz nagdulot sing mga halad kag nagsunog sing insyenso.

5Si Haring Rezin sang Siria kag si Haring Peca sang Israel nagsalakay sang Jerusalem kag nagkibon sini, pero indi sila makalutos kay Acaz.

6Sa amo man nga tion, ang hari sang Edom nagbawi sang siudad sang Elat, kag gintabog paggwa ang mga taga-Juda nga nag-estar didto. Ang mga Edomnon nagkadto kag nag-estar sa Elat tubtob sini nga adlaw.

7Si Acaz nagpadala sing mga tawo nga may mensahe sa kay Tiglat-piliser, ang hari sang Asiria: “Ako imo matutom nga alagad. Dali kag luwasa ako sa mga hari sang Siria kag Israel, nga nagasalakay sa akon.”

8Ginkuha ni Acaz ang pilak kag bulawan sa Templo kag sa talaguan sa palasyo kag ginpadala ini subong nga dulot sa hari.

9Si Tiglat-piliser, sa sabat sang pangabay ni Acaz, naggwa upod sa iya mga hangaway sa pagsalakay sang Damasco, gin-agaw ini, ginpatay si Haring Rezin, kag gindala ang mga tawo pakadto sa Kir subong mga bihag.

10Sang pagkadto ni Haring Acaz sa Damasco sa pagsugata kay Haring Tiglat-piliser, nakita niya ang altar didto kag ginpadala niya sa kay Urias nga pari ang sulondan sini nga nagalakip sang bisan diutay nga bahin sang altar.

11Gani si Urias naghimo sang altar kaangay gid sini, kag gintapos ini sa wala pa magbalik si Acaz.

12Sang pagbalik ni Acaz halin sa Damasco nakita niya ang altar nga nahuman na,

13gani nagsunog sia sang mga halad nga sapat, kag mga halad nga kalan-on sa altar, kag nag-ula sia sa sini sang isa ka halad nga ilimnon kag sang dugo sang halad sang paghiambit.

14Ang altar nga bronsi nga ginhalad sa Ginoo yara sa ulot sang bag-o nga altar kag sang Templo kag ginhalin ini ni Acaz sa naaminhan nga kilid sang bag-o nga altar.

15Dayon ginsugo niya si Urias: “Gamita ining akon malapad nga altar para sa mga halad nga sinunog sa aga kag sa mga halad nga kalan-on sa hapon, sa mga halad nga sinunog kag mga halad nga kalan-on sang hari kag sang mga tawo, kag para sa mga halad nga ilimnon sang mga tawo. Iula sa sini ang dugo sang tanan nga mga sapat nga ginhalad. Pero gamiton ko ang altar nga bronsi para palamangkutan.”

16Gintuman ini ni Urias suno sa sugo sang hari.

17Ginguba ni Haring Acaz ang bronsi nga karo nga ginagamit sa Templo kag ginkuha ang mga labador nga yara sa ibabaw sini. Ginkuha man niya ang bronsi nga tangke nga natungtong sa likod sang dose ka saway nga mga toro, kag ginbutang ini sa sadsaran nga bato.

18Sa paglipay sang hari sang Asiria, ginkuha man ni Acaz halin sa Templo ang tulongtungan sang trono sang hari, kag ginsirahan ang alagyan sang hari pakadto sa Templo.

19Ang tanan nga ginhimo ni Haring Acaz nasulat sa Maragtas sang mga Hari sang Juda.

20Si Acaz napatay kag ginlubong sa lulobngan sang mga hari sa Siudad ni David, kag ang iya anak nga si Ezequias nagbulos sa iya subong hari.

← Chapter 15 Jump to: Chapter 17 →