2 Kings 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sa ika-18 nga tuig sang paghari ni Josafat sa Juda, Si Joram nga anak ni Acab nanginhari sa Israel, kag naggahom sia sa Samaria sa sulod sang dose ka tuig.

2Nagpakasala sia batok sa Ginoo, pero indi sia subong kalaut sang iya amay kag iya iloy nga si Jezebel. Ginpangguba niya ang imahen ni Baal nga ginhimo sang iya amay.

3Pero, kaangay kay Haring Jeroboam nga anak ni Nebat nga una sa iya, gindala niya ang Israel sa pagpakasala, kag wala magbiya sini.

4Si Haring Mesa sang Moab may madamo nga mga karnero, kag kada tuig nagahatag sia sa hari sang Israel sing 100,000 ka mga kordero, kag bulbol halin sa 100,000 ka mga karnero.

5Pero sang mapatay si Haring Acab sang Israel, si Mesa nagrebelde batok sa Israel.

6Sa gilayon si Haring Joram naggwa sa Samaria kag gintipon ang tanan niya nga mga hangaway.

7Nagpadala sia sini nga pahibalo kay Haring Josafat sang Juda: “Ang hari sang Moab nagrebelde batok sa akon, magabulig ka bala sa akon pagpakig-away batok sa iya?” Nagsabat si Haring Josafat, “Huo, buligan ko ikaw, ang akon mga hangaway kag mga kabayo handa na.

8Diin bala kita maagi sa pagsalakay?” Si Joram nagsabat, “Maagi kita sa dalan sa desierto sang Edom.”

9Gani si Haring Joram, kag ang hari sang Juda kag ang hari sang Edom naglakat. Sang nakapanglakaton sila sing pito ka adlaw, nawad-an sila sing tubig, kag wala na sing imnon ang mga soldado kag mga sapat nga nagadala sang ila mga karga.

10Si Haring Joram nagsiling, “Tapos na kita, gintugyan kita nga tatlo sang Ginoo sa kamot sang hari sang Moab!”

11Si Haring Josafat nagpamangkot, “May isa bala diri ka propeta nga paagi sa iya makapamangkot kita sa Ginoo?” Nagsabat ang isa ka opisyal sang mga hangaway ni Haring Joram, “Si Eliseo nga anak ni Safat yari diri. Sia ang kabulig anay ni Elias.”

12Si Haring Josafat nagsiling, “Matuod sia nga propeta.” Gani ang tatlo ka mga hari nagkadto kay Eliseo.

13Si Eliseo nagsiling sa hari sang Israel, “Ngaa magbulig ako sa imo? Lakat ka kag magpamangkot sa mga propeta nga ginapamangkutan sang imo amay kag iloy.” Si Joram nagsabat, “Indi! Ang Ginoo amo ang nagtugyan sa amon nga tatlo sa kamot sang hari sang Moab.”

14Si Eliseo nagsabat, “Ginasumpa ko sa buhi nga Ginoo nga akon ginaalagad, kon indi lang tungod sa hari sang Juda nga si Haring Josafat nga ginataha ko indi ako magsapak sa imo.

15Karon dalhi ako sing isa ka musikero.” Samtang ang musikero nagatukar sang arpa, ang gahom sang Ginoo nag-abot kay Eliseo,

16kag nagsiling sia, “Amo ini ang ginasiling sang Ginoo: ‘Magkutkot kamo sing kanal sa palibot sining mamala nga sapa.

17Bisan nga wala kamo sing makita nga ulan ukon hangin, ining mamala nga sapa mapuno sing tubig, kag kamo, ang inyo mga baka, kag ang inyo mga sapat nga nagadala sing inyo mga karga may madamo nga tubig nga imnon.’”

18Kag si Eliseo nagpadayon, “Pero mahapos ini nga butang nga himuon sang Ginoo; magapadaog man sia sa inyo batok sa mga Moabnon.

19Agawon ninyo ang ila matahom nga mga siudad nga napamakuran, panapson ninyo ang ila nagapamunga nga mga kahoy, tabunan ninyo ang ila mga tuboran, kag pierdihon ninyo ang ila mapatubason nga mga uma paagi sa pagtabon sing mga bato sa sini nga mga uma.”

20Sang pagkaaga, sa tion sang kinaandan nga paghalad, ang tubig nag-ilig halin sa Edom, kag nalapawan ang duta.

21Sang mabatian sang mga Moabnon nga ang tatlo ka mga hari nag-abot sa pagsalakay sa ila, gintipon nila ang tanan nga mga lalaki halin sa pamatan-on tubtob sa labing tigulang nga sarang makadala sing mga hinganiban, kag ginpahamtang sila sa dulonan.

22Sang pagbangon nila sang madason nga aga, ang adlaw nagsilak sa tubig kag nakita nila nga mapula ini nga daw dugo.

23Nagsininggit sila, “Dugo! Ayhan ang tatlo ka grupo sang mga hangaway nag-ilinaway kag nagpinatyanay! Dali, kuhaon naton ang ila mga pagkabutang sa ila kampo!”

24Pero sang pag-abot nila sa kampo, ang mga Israelinhon nagsalakay sa ila kag ginlagas sila. Ang mga Israelinhon nagpadayon sa paglagas, nga nagapamatay sang mga Moabnon

25kag nagapangguba sang ila mga siudad. Ang tagsa ka Israelinhon nagahaboy sing bato sa mapatubason nga duta nga ila maagyan, tubtob nga ang tanan nga uma natabunan sang bato. Gintabunan man nila ang mga tuboran kag ginpanapas ang nagapamunga nga mga kahoy. Sang ulihi ang nabilin amo na lang ang kapital nga siudad sang Kir-hareset, kag ginkibon ini sang mga manuglabyog sang bato kag ginsalakay.

26Sang matalupangdan sang hari sang Moab nga daw malutos sia sa inaway, nagkuha sia sing 700 ka mga tawo nga may mga espada sa pag-upod sa iya, kag nagtinguha sia sa paglusot sa mga kaaway sa tuyo nga malagyo sia pakadto sa hari sang Siria, pero napaslawan sia.

27Gani ginkuha niya ang iya kamagulangan nga anak nga lalaki, nga amo ang magabulos sa iya subong hari, kag gindulot sia subong halad sa dios sang Moab sa pader sang siudad. Hinadlukan ang mga Israelinhon gani naghalin sila sa siudad kag nagbalik sa ila kaugalingon nga pungsod.

← Chapter 2 Jump to: Chapter 4 →