2 Kings 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Si Josias nagaedad sang walo ka tuig sang paghari niya sa Juda, kag naggahom sia sa Jerusalem sa sulod sing trayntay uno ka tuig. Ang iya iloy amo si Jedida nga anak ni Adaya, halin sa banwa sang Boskat.

2Ginhimo ni Josias ang matarong sa panulok sang Ginoo. Ginsunod niya ang ginhimo sang isa sang iya mga katigulangan nga si Haring David, kag nagtuman gid sang tanan nga mga kasugoan sang Dios.

3Sa ika-18 nga tuig sang paggahom ni Haring Josias, ginpadala niya si Safan nga sekretaryo sang korte nga anak ni Azalias kag apo ni Mesullam sa Templo nga may sugo:

4“Kadto ka sa Pinakamataas nga Pari nga si Helkias kag tan-awa kon pila ang kabilogan nga kwarta nga naghalin sa mga tawo nga gintipon sang mga pari nga nagaalagad sa pwerta sang Templo.

5Singgana sia nga ihatag ang kwarta sa mga tawo nga gintugyanan sa pagkaayo sang Templo. Suholan nila

6ang mga panday, mga manugpatindog kag ang mga kantero, kag magbakal sing mga tablon kag mga bato nga ginagamit sa pagkaayo.

7Ang mga tawo nga gintugyanan sa pag-obra masaligan, gani wala na sing kinahanglan nga isipon pa ang kwarta.”

8Gindala ni Safan ang sugo sang hari kay Helkias, kag si Helkias nagsiling sa iya nga nakita niya ang Libro sang Kasugoan sa Templo. Ginhatag ni Helkias ang libro kay Safan kag ginbasa niya ini.

9Dayon nagbalik si Safan sa hari kag nagsugid: “Ang imo mga alagad nagkuha sang kwarta sa Templo kag ginhatag ini sa mga tawo nga gintugyanan sa pagpakaayo sang Templo.”

10Kag dayon nagsiling pa gid sia. “Yari ang libro nga ginhatag sa akon ni Helkias.” Kag ginbasa niya ini sing mabaskog sa hari.

11Sang pagkabati sang hari sang nasulat sa libro, gingisi niya ang iya bayu sa kasubo.

12Ginpatawag niya si Helkias nga pari, si Ahikam nga anak ni Safan, si Acbor nga anak ni Micaya, si Safan nga sekretaryo sang korte, kag si Asaya nga nagaalagad sa hari, kag ginsugo sila:

13“Lakat kamo kag magpamangkot sa Ginoo para sa akon kag para sa tanan nga mga katawhan sang Juda nahanungod sa mga pagtudlo sini nga libro. Ang Ginoo naakig sa aton, tungod kay ang aton mga katigulangan wala magtuman sang dapat nila buhaton suno sa ginsiling sini nga libro.”

14Sanday Helkias, Ahikam, Acbor, Safan, kag Asaya naglakat sa pagpamangkot sa isa ka propeta nga babayi nga ginhingalanan kay Hulda nga nag-estar sa bag-o nga bahin sang Jerusalem. Ang iya bana nga si Sallum, anak ni Tikva kag apo ni Harhas, amo ang gintugyanan sang mga bayu sa Templo. Ginsaysay nila sa iya ang natabo,

15kag ginsingganan niya sila nga magbalik sa hari kag ipahibalo sa iya

16ini nga mga pulong halin sa Ginoo: “Silutan ko ang Jerusalem kag ang tanan niya nga mga pumoluyo suno sa nasulat sa libro nga ginbasa sang hari.

17Ginsikway nila ako kag nagdulot sing mga halad sa iban nga mga dios, gani ang tanan nila nga ginhimo nagpaakig sa akon. Naakig gid ako sa Jerusalem, kag indi ini mag-untat.

18Ako, ang Ginoo nga Dios sang Israel nagasiling sa hari: Nagpamati ikaw sa ginsulat sa libro,

19kag naghinulsol ka kag nagpaubos sang imo kaugalingon sa akon presensya, gingisi mo ang imo bayu kag naghibi, sang mabatian mo ang akon tuyo sa pagsilot sang Jerusalem kag sang iya mga pumoluyo. Himuon ko ini nga isa ka makakulogmat nga talan-awon, isa ka lugar nga ang iya ngalan gamiton sang mga tawo sa pagpakamalaut. Pero ginpamatian ko ang imo pangamuyo,

20kag ang silot nga akon ipadala sa Jerusalem indi magaabot tubtob indi ikaw mapatay. Mapatay ikaw nga may kalinong.” Ang mga tawo nagbalik kay Haring Josias nga may dala sini nga mga pulong.

← Chapter 21 Jump to: Chapter 23 →