2 Kings 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Sa ikatatlo nga tuig sang paggahom ni Oseas nga anak ni Ela subong hari sang Israel, si Ezequias nga anak ni Acaz nanginhari sang Juda.

2Nagaedad sia sing baynte-singko ka tuig kag naggahom sia sa Jerusalem sa sulod sang baynte-nwebe ka tuig. Ang iya iloy amo si Abia nga anak ni Zacarias.

3Naghimo sia sing matarong sa panulok sang Ginoo, nga nagsunod sang ginhimo sang isa sang iya mga katigulangan nga si Haring David.

4Ginguba niya ang mga lugar sa diin ginasimba ang mga diosdios, gintumba niya ang mga haligi nga bato kag ginpulod ang mga imahen sang diosa nga si Asera. Gindugmok man niya ang bronsi nga man-og nga ginhimo ni Moises, nga ginatawag Nehustan. Tubtob sa sadto nga tion ang mga tawo sang Israel nagsunog sing insyenso sa pagpasidungog sini.

5Si Ezequias nagsalig sa Ginoo, ang Dios sang Israel. Ang Juda wala gid sang hari kaangay niya, halin sang una tubtob sang ulihi.

6Nagmatutom sia sa Ginoo, kag wala gid magbiya sa iya; gintuman niya ang tanan nga mga sugo nga ginhatag sang Ginoo kay Moises.

7Gani ang Ginoo nag-upod sa iya, kag nagmainuswagon sia sa tanan nga iya ginhimo. Nagrebelde sia batok sa hari sang Asiria, kag wala magpasakop sa iya.

8Ginlutos niya ang mga Filistinhon, kag ginsalakay ang ila mga ginaestaran, halin sa pinakadiutay nga barangay tubtob sa pinakadaku nga siudad, lakip ang Gaza kag ang iya kadutaan sa palibot.

9Sa ikap-at nga tuig sang paggahom ni Ezequias—nga amo ang ikapito nga tuig sang paggahom ni Haring Oseas sang Israel—si Hari Salmanasar sang Asiria nagsalakay sa Israel kag ginkibon ang Samaria.

10Sa ikatlo nga tuig sang pagkibon, ang Samaria napukan. Ini amo ang ikan-om nga tuig sang paggahom ni Ezequias, kag ikasiyam nga tuig sang paggahom ni Oseas.

11Ang hari sang Asiria nagdala sang mga Israelinhon subong mga bihag sa Asiria kag ginpaestar ang iban sa ila sa siudad sang Hala, ang iban malapit sa Suba sang Habor nga sakop sang Gozan kag ang iban sa mga siudad sang Media.

12Ang Samaria napukan tungod kay ang mga Israelinhon wala magtuman sa Ginoo nga ila Dios, sa baylo ginlapas nila ang kasugtanan nga iya ginhimo upod sa ila kag wala magtuman sang tanan nga mga sugo nga ginhatag paagi kay Moises nga alagad sang Ginoo. Indi sila magpamati, kag indi sila magtuman.

13Sa ika-14 nga tuig sang paggahom ni Haring Ezequias, si Senaquerib nga hari sang Asiria, nagsalakay kag nag-agaw sang napamakuran nga mga siudad sang Juda.

14Si Ezequias nagpadala sing mensahe kay Senaquerib nga yadto didto sa Lakis, nga nagasiling: “Nakahimo ako sing sayop, kon mahimo untata ang imo pagsalakay, kag magabayad ako sang imo ginapangayo.” Ang hari nagsabat nga si Ezequias magpadala sa iya sing napulo ka tonelada nga pilak kag isa ka tonelada nga bulawan.

15Si Ezequias nagpadala sa iya sang tanan nga pilak sa Templo kag sa talaguan sang manggad sa palasyo.

16Ginkakas man niya ang mga bulawan nga nagatapik sa mga pwertahan sang templo, kag ang mga bulawan nga iya ginhaklap sa mga haligi sang pwertahan, kag ginpadala ini tanan kay Senaquerib.

17Ang hari sang Asiria nagpadala sing madamo nga mga hangaway halin sa Lakis sa pagsalakay kay Ezequias sa Jerusalem. Ginpangulohan ini sang iya tatlo ka matag-as nga mga opisyales. Sang pag-abot nila sa Jerusalem, nagdulog sila sa dalan sa diin nagaobra ang mga manughabol sang bayu, sa higad sing kalog nga ginailigan sang tubig halin sa naibabaw nga punong.

18Dayon ginpatawag nila si Haring Ezequias, pero ang tatlo sang iya mga opisyales amo ang nagsugata sa ila: si Eliaquim nga anak ni Helkias, nga amo ang gintugyanan sang palasyo; si Sebna, ang sekretaryo sa korte: kag si Joa nga anak ni Asaf, nga amo ang gintugyanan sang mga papeles.

19Ang isa sang mga opisyales nga taga-Asiria nagsiling sa ila nga ang hari luyag makahibalo kon ngaa si Haring Ezequias nagasalig gid sa iya kaugalingon.

20Nagsiling ang hari para kay Haring Ezequias, “Nagahunahuna ka bala nga ang mga pulong makatal-os sang abilidad kag gahom sang mga hangaway? Sin-o gid bala ang imo ginasaligan sa pagbulig sa imo sa pagsumpong sa Asiria?

21Nagapaabot ka nga ang Ehipto magabulig sa imo. Pero kaangay lang ini nga nagagamit ka sang baston nga tabun-ak, mabaak ini kag magapilas sang imo kamot. Pareho sina ang hari sang Ehipto kon magsalig sa iya ang bisan sin-o.”

22Nagpadayon ang opisyal sang Asiria, “Ukon nagasiling ka bala sa akon nga nagasalig ikaw sa Ginoo nga imo Dios? Ginpangguba ni Ezequias ang mga ginasimbahan kag mga altar sang Ginoo kag dayon nagsiling sia sa mga tawo sang Juda kag Jerusalem nga magsimba lamang sila sa altar sa Jerusalem.

23Magapusta ako sa imo sa ngalan sang hari: hatagan ko ikaw sing 2,000 nga kabayo, kon makakita ka sang amo man kadamo nga mga tawo nga magasakay sa sini!

24Indi gani ikaw makatupong sa labing kubos nga opisyal sang Asiria, kag nagapaabot pa ikaw nga ang Ehipto magapadala sa imo sing mga karwahi kag mga manugkabayo!

25Nagahunahuna ka bala nga ginsalakay ko ang imo pungsod kag ginlaglag ini nga wala sing bulig halin sa Ginoo? Ang Ginoo gid ang nagsiling sa akon sa pagsalakay sang imo pungsod kag laglagon ini.”

26Dayon si Eliaquim, si Sebna, kag si Joa nagsiling sa opisyal, “Sir, hambal ka sa amon sa Aramico. Mahangpan namon ina. Indi ka maghambal sing Hebreo. Ang tanan nga mga tawo sa ibabaw sang pader nagapamati.”

27Nagsabat sia, “Nagahunahuna bala kamo nga ginpadala ako sang hari nga kamo lang kag ang hari ang akon pagahambalan sini nga mga butang? Indi, nagahambal man ako sa mga tawo nga nagapungko sa pader, nga magakaon sang ila kaugalingon nga higko kag magainom sang ila kaugalingon nga ihi, subong sang inyo pagahimuon.”

28Dayon nagtindog ang opisyal nga taga-Asiria kag nagsinggit sa Hebreo, “Pamati kamo sa ginasiling sang hari sang Asiria!

29Nagapaandam sia sa inyo nga indi kamo magpadaya kay Ezequias. Indi sia makaluwas sa inyo.

30Kag indi ninyo sia pagpabay-i nga piliton niya kamo sa pagsalig sa Ginoo. Indi kamo maghunahuna nga ang Ginoo magaluwas sa inyo kag indi magtugot nga ang amon hangaway nga Asirianhon mag-agaw sang inyo siudad.

31Indi kamo magpamati kay Ezequias. Ang hari sang Asiria nagamando nga maggwa kamo sa siudad kag mag-ampo. Tugotan kamo tanan sa pagkaon sang bunga sang inyo kaugalingon nga mga talamnan sang ubas, kag mga higos gikan sa inyo mga kakahuyan, kag sa pag-inom sang tubig gikan sa inyo kaugalingon nga mga bubon—

32tubtob nga ang hari magpaestar sa inyo sa pungsod nga kaangay sang inyo kaugalingon nga pungsod, sa diin may mga talamnan sang ubas nga magahatag sang bino, kag may trigo nga pagahimuon nga tinapay. Duta ini sang mga olivo, sang lana sang olivo, kag sang dugos. Kon tumanon ninyo ang iya ginasugo, indi kamo mapatay kundi magakabuhi kamo. Indi kamo magpadaya kay Ezequias sa paghunahuna nga ang Ginoo magaluwas sa inyo.

33Naluwas bala sang mga dios sang iban nga mga pungsod ang ila mga nasyon gikan sa hari sang Asiria?

34Diin na bala karon ang mga dios sang Hamat kag Arpad? Diin na bala ang mga dios sang Sefarvaim, Hena kag Iva? Wala sing isa nga nagluwas sang Samaria.

35San-o bala naluwas sang mga dios sining mga pungsod ang ila mga nasyon gikan sa amon hari? Karon ngaa nga nagahunahuna kamo nga ang Ginoo makaluwas sang Jerusalem?”

36Naghipos ang mga tawo, suno sa ginsiling ni Haring Ezequias sa ila, kag wala gid sila magsabat.

37Dayon gingisi ni Eliaquim, ni Sebna, kag ni Joa ang ila mga bayu sa kasubo, kag naglakat kag nagsugid sa hari sang ginsiling sang opisyal sang Asiria.

← Chapter 17 Jump to: Chapter 19 →