2 Kings 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Ang tion nag-abot nga ang Ginoo magadala kay Elias sa langit paagi sa buhawi. Si Elias kag si Eliseo naglakat halin sa Gilgal,

2kag sa dalan si Elias nagsiling kay Eliseo, “Pabilin ka diri kay ang Ginoo nagmando sa akon sa pagkadto sa Betel.” Pero nagsabat si Eliseo, “Nagasumpa ako tungod sa akon pag-unong sa buhi nga Ginoo kag sa imo nga indi ko ikaw pagbayaan.” Gani nagkadto sila sa Betel.

3Ang isa ka grupo sang mga propeta nga nag-estar didto nagkadto kay Eliseo kag nagpamangkot sa iya, “Nakahibalo ka bala nga ang Ginoo magakuha sang imo agalon sini nga adlaw?” Nagsabat si Eliseo, “Huo nahibal-an ko, pero indi naton paghambalan ina.”

4Dayon si Elias nagsiling kay Eliseo, “Karon pabilin ka diri kay ang Ginoo nagsugo sa akon sa pagkadto sa Jerico.” Pero si Eliseo nagsabat, “Nagasumpa ako tungod sa akon pag-unong sa buhi nga Ginoo kag sa imo nga indi ko ikaw pagbayaan.” Gani nagkadto sila sa Jerico.

5Ang isa ka grupo sang mga propeta nga nag-estar didto nagkadto kay Eliseo kag nagpamangkot sa iya, “Nakahibalo ka bala nga ang Ginoo magakuha sang imo agalon sini nga adlaw?” Si Eliseo nagsabat, “Huo nahibal-an ko, pero indi naton paghambalan ina.”

6Dayon si Elias nagsiling kay Eliseo, “Karon pabilin ka diri kay ang Ginoo nagsugo sa akon sa pagkadto sa Suba sang Jordan.” Pero si Eliseo nagsabat, “Nagasumpa ako tungod sa akon pag-unong sa buhi nga Ginoo kag sa imo nga indi ko ikaw pagbayaan.” Gani naglakat sila,

7kag ang singkwenta ka mga propeta nagsunod sa ila sa Suba sang Jordan. Nagdulog si Elias kag si Eliseo sa pangpang sang suba, kag ang singkwenta ka mga propeta nagtindog sa unhan nila.

8Dayon gin-uba ni Elias ang iya kunop, ginlukot ini kag ginhampak sa tubig. Ang tubig napihak, kag sia kag si Eliseo nag-agi sa mamala nga duta sa pagtabok sa pihak.

9Didto si Elias nagsiling kay Eliseo, “Sugiri ako kon ano ang luyag mo himuon ko sa imo sa wala pa ako makuha palayo sa imo.” Si Eliseo nagsabat, “Hatagi ako sang doble sang imo gahom nga magahimo sa akon nga tal-os mo.”

10Si Elias nagsabat, “Mabudlay ihatag ang imo ginapangayo, pero mabaton mo ini kon makita mo ako nga ginakuha na palayo sa imo; kon indi mo ako makita, indi mo ini mabaton.”

11Nagsugilanon sila samtang nagalakat sila kag sa hinali lang ang isa ka karwahi nga kalayo nga ginaguyod sang mga kabayo nga kalayo nag-abot sa tunga nila, kag si Elias gindala sa langit paagi sa isa ka buhawi.

12Nakita ini ni Eliseo kag nagsinggit sia kay Elias, “Amay ko, amay ko! Gamhanan nga mangangapin sang Israel! Wala na ikaw!” Kag wala na niya makita si Elias liwat. Sa kasubo, gingisi ni Eliseo ang iya bayu sa duha ka bahin.

13Dayon ginpulot niya ang kunop ni Elias nga nahulog, kag nagbalik sia kag nagtindog sa pangpang sang Jordan.

14Ginhampak niya ang tubig sang kunop ni Elias kag nagsiling sia, “Diin na ang Ginoo, ang Dios ni Elias?” Dayon ginhampak niya liwat ang tubig kag napihak ini, kag naglakat sia pakadto sa pihak.

15Ang singkwenta ka mga propeta halin sa Jerico nakakita sa iya kag nagsiling, “Ang gahom ni Elias yara na kay Eliseo!” Naglakat sila sa pagsugata sa iya, nagluhod sa iya atubang,

16kag nagsiling, “Yari kami tanan, singkwenta ka mabakod nga mga lalaki. Dali pangitaon ta ang imo agalon. Basi gindala sia sang Espiritu sang Ginoo kag ginbilin sia sa bukid ukon sa patag man.” Si Eliseo nagsabat, “Indi, indi kamo maglakat.”

17Pero nagpamilit gid sila tubtob sang ulihi nagpasugot si Eliseo kag ginpalakat sila. Sila nga singkwenta naglakat sa pagpangita kay Elias sa sulod sang tatlo ka adlaw, pero wala nila sia makita.

18Dayon nagbalik sila kay Eliseo, nga nagahulat sa Jerico, kag nagsiling sia sa ila, “Indi bala nagsiling ako sa inyo nga indi kamo maglakat?”

19May mga tawo nga nagkadto kay Eliseo halin sa Jerico nga nagasiling, “Sir, suno sa imo nahibaluan, maayo ini nga siudad, pero ang tubig indi maayo, kag ang duta indi makapatubas sing madamo.”

20Nagsugo si Eliseo, “Butangi sing asin ang bag-o nga yahong kag dalha ini sa akon.” Gindala nila ini sa iya,

21kag nagkadto sia sa tuboran sang siudad, ginhaboy ang asin sa tubig, kag nagsiling, “Amo ini ang ginasiling sang Ginoo: ‘Ginatinluan ko ini nga tubig, kag sugod karon ang duta magapatubas sang madamo kag wala sing may magutoman.’”

22Kag halin sadto ang tubig nagtinlo, suno sa ginsiling ni Eliseo nga mahanabo.

23Naghalin si Eliseo sa Jerico kag nagkadto sa Betel. Sa dalan may mga kabataan nga lalaki nga naghalin sa banwa kag naglangolango sa iya. Nagsinggit sila, “Halin ka diri, kalbo! Halin ka diri, kalbo!”

24Nagbalikid si Eliseo, nagtulok sa ila, kag ginpakamalaut sila sa ngalan sang Ginoo. Dayon ang duha ka uso nga babayi naggwa sa kakahuyan kag ginpanggus-ab ang kwarentay dos sa ila.

25Nagpadayon si Eliseo sa Bukid sang Carmel, kag sang ulihi nagbalik sia sa Samaria.

← Chapter 1 Jump to: Chapter 3 →