Acts 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Sa sini man nga tion, si Haring Herodes nagsugod sa paghingabot sa pila ka mga katapo sang iglesia.

2Ginpapatay niya si Santiago nga utod ni Juan paagi sa espada.

3Sang makita niya nga nalipay ang mga Judio sang iya ginhimo, ginpadakop pa gid niya si Pedro. Ini natabo sa tion sang Piesta sang Tinapay nga Wala sing Lebadora.

4Sang madakop nila si Pedro, ginsulod nila sia sa bilangguan sa diin gintugyan sia agod bantayan sang apat ka grupo sang mga soldado nga ang tagsa ka grupo may apat ka soldado. Si Herodes nagplano nga hukman sia sa atubang sang mga tawo sa tapos ang Piesta sang Pascua.

5Gani, ginpriso si Pedro pero ang mga katapo sang iglesia nagpangamuyo sa Dios sing hugot gid para sa iya.

6Isa sadto ka gab-i sa wala pa ang adlaw nga ipaatubang ni Herodes si Pedro sa mga tawo, nagatulog sia sa tunga sang duha ka gwardya. Nahigtan sia sang duha ka kadena kag may mga gwardya nga nagabantay sa pwerta sang bilangguan.

7Sa hinali nagpakita ang isa ka anghel sang Ginoo, kag nagsilak ang kapawa sa bilangguan. Gin-uyog sang anghel ang abaga ni Pedro kag ginpukaw sia nga nagasiling, “Dali! Bangon ka!” Kag sa gilayon nahukas ang mga kadena sa iya mga kamot.

8Kag ang anghel nagsiling sa iya, “Hugta ang imo paha kag isuksok ang imo mga sandalyas.” Gintuman ini ni Pedro. Ang anghel nagsiling sa iya, “Magpangunop ka kag magsunod sa akon.”

9Ginsunod sia ni Pedro pa gwa sa bilangguan. Pero wala sia makahibalo nga matuod ang ginhimo sang anghel; ang iya hunahuna nga nakakita sia sang isa ka palanan-awon.

10Ginligaran nila ang nahauna nga balantayan sang mga gwardya kag ang ikaduha kag nakalambot sila sa salsalon nga pwerta nga nagapadulong sa siudad. Nag-abri ang pwerta sa iya lamang kaugalingon kag naggwa sila. Nag-agi sila sa isa ka dalan kag sa gilayon ginbayaan sang anghel si Pedro.

11Dayon nakamarasmas si Pedro kon ano ang natabo sa iya, kag nagsiling sia, “Karon nasiguro ko nga ginpadala sang Ginoo ang iya anghel, kag ginluwas niya ako sa gahom ni Herodes kag sa tanan nga ginapaabot kuntani nga buhaton sang mga Judio sa akon.”

12Sang matalupangdan niya ini, nagkadto sia sa balay ni Maria nga iloy ni Juan nga ginahingalanan man Marcos. Madamo nga mga tawo ang nagtilipon didto kag nagapangamuyo.

13Nagpanuktok si Pedro sa pwertahan sa gwa, kag ang isa ka suloguon nga babayi nga ginahingalanan kay Roda, nagtan-aw kon sin-o ang nagapanuktok.

14Nakilala niya ang tingog ni Pedro, kag sa daku nga kalipay nagbalik sia nga wala pa niya maabrihi ang pwertahan, sa pagpahibalo nga si Pedro yara nagatindog sa gwa.

15Nagsiling sila sa iya, “Siguro nagbuang ka!” Pero nagpamilit sia nga yara gid si Pedro. Gani nagsabat sila, “Anghel niya ina.”

16Sa amo man nga tion, padayon ang pagpanuktok ni Pedro. Sang ulihi ila gin-abrihan ang pwertahan kag natingala gid sila sang makita nila sia.

17Ginsinyasan niya sila sang iya kamot nga maghipos, kag ginsaysay niya sa ila kon paano ang pagpagwa sang Ginoo sa iya sa bilangguan. Nagsiling sia, “Isugid ninyo ini sa kay Santiago kag sa iban nga mga kautoran.” Dayon naghalin sia kag nagkadto sa iban nga lugar.

18Sang pagkaaga nagkinagula ang mga gwardya, kay wala sila makahibalo kon ano ang natabo kay Pedro.

19Nagmando si Herodes nga pangitaon sia, pero wala gid nila sia makita. Gani ginpausisa niya ang mga gwardya kag nagmando nga pamatyon sila. Sa tapos sini si Herodes nagkadto sa Cesarea halin sa Judea kag nagtener didto sing pila ka adlaw.

20Naakig gid si Herodes sa mga tawo sang Tiro kag Sidon. Gani nagkadto sila sing tingob sa pagpakigkita kay Herodes. Ginhaylo anay nila si Blasto sa pagbulig sa ila, kay sia amo ang mayordomo sang palasyo. Dayon nagkadto sila kay Herodes kag nagpangayo sing paghidait, tungod kay ang ila mga banwa nagakuha sang kalan-on sa rehiyon nga ginadumalahan sang hari.

21Sa gintalana nga adlaw, ginsuksok ni Herodes ang iya harianon nga bayu, nagpungko sa iya trono, kag nagpamulongpulong sa mga tawo.

22Nagsininggit ang mga tawo, “Indi na tawo ang nagahambal, kundi isa ka dios!”

23Sa gilayon ginhampak sang anghel sang Ginoo si Herodes tungod kay wala niya ginhatag ang kadungganan sa Dios. Gin-uk-ok sia sang mga ulod kag napatay.

24Sa amo man nga tion, nagpadayon ang paglapnag kag pagtubo sang pulong sang Dios.

25Gintapos ni Bernabe kag ni Saulo ang ila bulohaton kag nagbalik sila halin sa Jerusalem nga dala nila si Juan nga ginahingalanan man Marcos.

← Chapter 11 Jump to: Chapter 13 →