Acts 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Amo man ini ang natabo sa Iconio: Nagkadto si Pablo kag si Bernabe sa sinagoga sang mga Judio kag tungod sang ila pagpanghambal madamo nga mga Judio kag mga Hentil ang nagtuo.

2Pero ang mga Judio nga indi magtuo nagsugyot sa mga Hentil kag naghilo sang ila mga hunahuna batok sa mga kautoran.

3Nagtener didto sing madugay ang mga apostoles. Nagpadayon sila sa pagwali nga may kaisog nahanungod sa Ginoo nga nagpamatuod nga ang ila mensahe nahanungod sa iya daku nga kaayo matuod, paagi sa paghatag sa ila sing gahom sa paghimo sing mga milagro kag katingalahan nga mga buhat.

4May pagbinahinbahin ang mga pumoluyo sang siudad: may iban nga nagdampig sa mga Judio, kag may iban nga nagdampig sa mga apostoles.

5Dayon nagplano ang iban sang mga Hentil kag ang iban sang mga Judio upod sa ila mga pangulo. Ginkaisahan nila nga sakiton kag batuhon ang mga apostoles.

6Sang mahibal-an ini sang mga apostoles nagpalagyo sila sa Listra kag sa Derbe, mga siudad nga sakop sang Lacaonia, kag sa palibot nga mga lugar.

7Didto ginwali nila ang Maayong Balita.

8May isa ka tawo didto sa Listra nga indi makalakat. Lupog sia halin sang iya pagkatawo kag wala gid makalakat.

9Samtang nagapungko sia didto nagpamati sia sang mga ginhambal ni Pablo. Nakita ni Pablo nga nagtuo sia kag sarang sia maayo, gani gintulok sia ni Pablo sing tadlong

10kag ginsingganan sa mabaskog nga tingog, “Tindog ka sing tadlong sa imo mga tiil!” Nagtumbo ang tawo kag naglakatlakat.

11Sang makita sang mga tawo ang ginhimo ni Pablo, nagsinggit sila sa ila kaugalingon nga linggwahe sa Lacaonia nga nagasiling, “Ang mga dios nanginsubong sang tawo kag nagpanaog sila sa aton!”

12Gintawag nila si Bernabe nga Zeus, kag si Pablo gintawag nila nga Hermes tungod kay sia amo ang manughambal.

13Nahamtang sa gwa sang banwa ang templo sang dios nga si Zeus. Ang pari ni Zeus nagdala sang toro nga mga baka kag mga bulak sa pwerta. Kay luyag niya kag sang mga tawo nga dulotan ang mga apostoles sang halad.

14Sang mahibal-an ni Bernabe kag ni Pablo ang ila pagahimuon, gingisi nila ang ila mga bayu kag nagdalagan sila sa tunga sang mga tawo nga nagasinggit,

15“Mga abyan, ngaa bala nga ginahimo ninyo ini? Mga tawo man lang kami nga kaangay ninyo! Yari kami diri sa pagdala sang Maayong Balita agod nga magbiya kamo sining walay pulos nga mga butang kag magbalik sa buhi nga Dios, nga amo ang nagtuga sang langit, duta, dagat, kag sang tanan nga yara sa ila.

16Sang una gintugot niya sa tanan nga mga tawo sa paglakat sa ila kaugalingon nga mga dalanon.

17Pero nagahatag sia pirme sang pagpamatuod sang iya kaugalingon paagi sa maayo nga mga butang nga iya ginapanghimo: ginahatagan niya kamo sang ulan halin sa langit kag mga patubas sa nagakaigo nga mga tinion. Ginahatagan niya kamo sing pagkaon kag ginapuno niya ang inyo mga tagipusoon sing kalipay.”

18Bisan amo na ini ang mga ginpanghambal sang mga apostoles, indi pa nila mapunggan ang mga tawo sa pagdulot sa ila sing halad.

19May mga Judio nga nag-abot halin sa Antioquia sang Pisidia, kag halin sa Iconio nga naghaylo sa mga tawo sa pagbuylog sa ila. Ginbato nila si Pablo, kag ginsagnoy nila sia pakadto sa gwa sang banwa. Abi nila patay na sia.

20Pero sang pagtipon sang mga gintuton-an sa palibot niya, nagbangon sia kag nagbalik sa banwa. Sang madason nga adlaw nagkadto sila ni Bernabe sa Derbe.

21Ginwali ni Pablo kag ni Bernabe ang Maayong Balita sa Derbe kag madamo ang ila nadaog nga mangingintuton-an sang Ginoo. Sa tapos sini nagbalik sila sa Listra kag nagpadayon sa Iconio, kag dayon nagkadto sila sa Antioquia sa Pisidia.

22Ginpabakod nila ang mga tumoluo kag ginpaisog sila sa pagpadayon sa pagtuo. Sa ila pagpanudlo nagsiling sila, “Madamo nga mga kabudlayan ang aton dapat pagaagihan sa pagsulod sa Ginharian sang Dios.”

23Nagpili sila sa tagsa ka iglesia sing mga katigulangan kag upod sa mga pagpangamuyo kag pagpuasa gintugyan nila sila sa Ginoo nga ila gintuohan.

24Kag sang nakaagi sila sa mga lugar nga sakop sang Pisidia, nagkadto sila sa Panfilia.

25Nagwali sila sang Maayong Balita sa Perge kag nagdulhog sila sa Atalia.

26Halin didto nagpanakayon sila pabalik sa Antioquia, ang lugar sa diin gintugyan sila sa pag-atipan sang Dios tungod sang bulohaton nga natapos na nila.

27Sang pag-abot nila sa Antioquia, gintipon nila ang mga katapo sang iglesia kag ginsugid nila ang tanan nga ginhimo sang Dios paagi sa ila, kag kon paano ang pagbukas sang Dios sang kahigayunan, agod magtuo ang mga Hentil.

28Si Pablo kag si Bernabe nagtener didto sing madugay upod sa mga gintuton-an.

← Chapter 13 Jump to: Chapter 15 →