Acts 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sang pag-abot sang adlaw sang Pentecostes, ang tanan nga mga tumoluo nagtipon sa isa ka lugar.

2Sa hinali may naghagunos halin sa langit nga daw huyop sang mabaskog nga hangin. Nagtugob ini sa bug-os nga balay sa diin sila nagapungko.

3Dayon nakita nila ang kalayo nga kon tulokon daw mga dila nga nagtungtong sa tagsatagsa sa ila.

4Napun-an sila tanan sang Espiritu Santo kag nagsugod sila sa paghambal sa iban nga mga linggwahe suno sa ginhatag sa ila sang Espiritu nga ihambal.

5Sadto nga tion may mainampuon nga mga Judio nga nagaestar sa Jerusalem nga nagikan sa tanan nga mga pungsod sang kalibutan.

6Sang pagkabati nila sini nga ginahod, madamo nga mga tawo ang nagtilipon. Natingala gid sila sang mabatian sang tagsatagsa sa ila nga ang mga tumoluo nagahambal sang ila kaugalingon nga linggwahe.

7Sa ila daku nga katingala nagsiling sila, “Indi bala mga taga-Galilea ining nagahambal?

8Paano bala nga karon mabatian ta sila nga nagahambal sa aton kaugalingon nga mga linggwahe?

9Kita mga taga-Parto, Medo, Elam, Mesopotamia, Judea, Capadocia, Ponto, Asia,

10Frigia, Panfilia, Ehipto, kag sa mga sakop sang Libya nga malapit sa Cirene. Ang iban sa aton halin sa Roma,

11mga Judio kag mga Hentil nga nakonbertir sa pagtuluohan sang mga Judio. Ang iban sa aton halin sa Creta kag Arabia. Pero tanan kita makabati sa ila nga nagahambal sa aton kaugalingon nga mga linggwahe nahanungod sang dalagku nga mga binuhatan sang Dios!”

12Sa ila katingala kag pagsalangisag nagpamangkutanay sila, “Ano bala ang kahulogan sini?”

13Ang iban nagyaguta sa mga tumoluo nga nagasiling, “Hubog ini nga mga tawo!”

14Dayon nagtindog si Pedro upod sa onse ka mga apostoles, kag sa mabaskog nga tingog naghambal sa mga tawo: “Mga kasimanwa ko nga mga Judio, kag tanan kamo nga nagaestar sa Jerusalem, pamatii ninyo ako kag tugoti ako sa pagsugid sa inyo sang kahulogan sini.

15Indi hubog ini nga mga tawo suno sa hunahuna ninyo, kay mga alas nwebe pa lang ini sa aga,

16kundi ini amo ang ginsiling ni Joel nga propeta:

17‘Ang Dios nagsiling, amo ini ang akon himuon sa katapusan nga mga inadlaw, ibubo ko ang akon Espiritu sa tanan nga mga tawo. Ang inyo mga anak nga lalaki kag mga anak nga babayi magawali sang akon mga pulong, ang inyo mga pamatan-on nga lalaki makakita sing mga palanan-awon, kag ang inyo mga tigulang nga lalaki magadamgo sang mga dalamguhanon.

18Huo, bisan sa akon mga ulipon, lalaki kag babayi, ibubo ko ang akon Espiritu sa sadto nga mga inadlaw, kag magawali sila sang akon mga pulong.

19Magapakita ako sing mga milagro sa langit, kag sang mga katingalahan sa duta: dugo, kalayo kag madamol nga aso,

20magadulom ang adlaw, kag ang bulan manginmapula subong sang dugo, sa wala pa mag-abot ang daku kag makatilingala nga Adlaw sang Ginoo.

21Dayon ang bisan sin-o nga magpanawag sa ngalan sang Ginoo pagaluwason.’

22“Mga taga-Israel, pamatii ninyo ini nga mga pulong! Si Jesus nga taga-Nazaret isa ka tawo nga may diosnon nga awtoridad. Ginpamatud-an ini sa inyo sing maathag paagi sa mga milagro kag makatilingala nga mga buhat kag mga tanda nga ginhimo sang Dios paagi sa iya. Nakahibalo gid kamo sini kay diri ini matabo sa tunga ninyo.

23Ginpat-od sang Dios suno sa iya kaugalingon nga kabubot-on kag tinutuyo nga itugyan si Jesus sa inyo mga kamot kag inyo sia ginpatay paagi sa makasasala nga mga tawo nga naglansang sa iya sa krus.

24Pero ginbanhaw sia sang Dios kag ginhilway sia gikan sa gahom sang kamatayon, tungod kay ang kamatayon indi makabilanggo sa iya.

25Nahanungod sa iya si David nagsiling, ‘Nakita ko ang Ginoo sa akon atubang sa tanan nga tion; malapit sia sa akon, gani wala sing may makatublag sa akon.

26Tungod sini malipayon ang akon tagipusoon kag puno sang kasadya ang akon mga ginapanghambal. Kag bisan mamalatyon ako, magakabuhi ako nga may paglaom,

27tungod kay indi mo pagpabay-an ang akon kalag sa kalibutan sang mga patay, ukon pahanugotan mo nga madunot ang imo matutom nga alagad sa lulobngan.

28Gintudloan mo ako sang mga dalanon sang kabuhi, kag sa imo presensya pun-on mo ako sing kalipay.’

29“Mga utod, dapat ko kamo paathagan nga may kaisog nahanungod kay Haring David nga isa sang aton mga katigulangan. Napatay sia kag ginlubong, kag yara pa gani ang iya lulobngan tubtob sa sini nga adlaw.

30Isa sia ka propeta kag nahibaluan niya ang ginsaad sang Dios sa iya: ginsaad sang Dios nga himuon niya nga hari ang isa sang mga kaliwat ni David.

31Ginpanan-aw ni David ang pagahimuon sang Dios sa palaabuton, gani naghambal sia nahanungod sang pagkabanhaw sang Cristo sang sia nagsiling, ‘Wala sia ginpabay-i sa kalibutan sang mga patay, wala madunot ang iya lawas sa lulobngan.’

32Ginbanhaw sang Dios ini gid nga Jesus kag kami tanan mga saksi sini nga kamatuoran.

33Ginbayaw sia sa tuo sang Dios nga iya Amay, kag nagbaton sia sang Espiritu Santo nga ginsaad sang Amay. Karon ang inyo makita kag mabatian amo ang dulot nga iya ginhatag sa aton.

34Kay si David wala makakadto sa langit pero nagsiling sia, ‘Ang Ginoo nagsiling sa akon Ginoo: Pungko ka diri sa akon tuo,

35tubtob nga mahimo ko ang imo mga kaaway nga tulongtungan sang imo mga tiil.’

36“Gani dapat gid kilalahon sang tanan nga mga taga-Israel, nga ini gid nga Jesus nga inyo ginlansang sa krus, amo ang ginhimo sang Dios nga Ginoo kag Cristo!”

37Natublag gid ang mga tawo sang pagkabati nila sini. Gani nagsiling sila kay Pedro kag sa iban nga mga apostoles, “Ano bala ang himuon namon, mga utod?”

38Si Pedro nagsiling sa ila, “Ang tagsatagsa sa inyo mag-untat sa pagpakasala kag magpabautiso sa ngalan ni Jesu-Cristo, agod nga mapatawad ang inyo mga sala, kag mabaton ninyo ang dulot sang Dios nga amo ang Espiritu Santo.

39Kay ginsaad ini sang Dios sa inyo kag sa inyo mga anak, kag sa tanan nga mga tawo sa malayo—ang tanan nga ginatawag sang Ginoo nga aton Dios nga magpalapit sa iya.”

40Madamo pa ang ginhambal ni Pedro sa pagpamatuod sa ila kag ginlaygayan niya sila nga nagasiling, “Luwasa ang inyo kaugalingon sa silot nga magaabot sa sining malaut nga mga tawo!”

41Madamo ang nagtuo sang iya mensahe kag nagpabautiso sila. Sa sadto nga adlaw may mga 3,000 ka mga tawo nga gindugang sa ila grupo.

42Nagmaukod sila sa pagtuon sa mga ginatudlo sang mga apostoles, kag sa paghiliusa sa isa kag isa, sa pagpakigbahin sa pagpamihakpihak sang tinapay kag sa pagpangamuyo.

43Madamo nga mga milagro kag katilingalahan nga mga buhat ang ginhimo sang mga apostoles, tungod sini natingala gid ang tanan nga mga tawo.

44Ang tanan nga mga tumoluo nagpadayon sa pagkabuhi nga nagahiambitanay kag gintingob nila ang ila mga pagkabutang agod gamiton sang tanan.

45Ginpamaligya nila ang ila mga duta kag pagkabutang kag ginpanagtag nila ang kwarta sa ila tanan suno sa kinahanglanon sang tagsatagsa.

46Adlaw-adlaw nagpadayon sila sa pagtipon sing tingob sa Templo, kag sa ila mga balay naghiambitanay sa pagpamihakpihak sang tinapay nga may kalipay, kag pagpaubos sa tagipusoon

47nga nagadayaw sa Dios, kag nahamut-an sila sang tanan nga mga tawo. Adlaw-adlaw gindugang sa ila sang Ginoo ang mga nagkalaluwas.

← Chapter 1 Jump to: Chapter 3 →