Acts 28

Ilonggo (Maayong Balita nga Biblia (2012))

← Chapter 27 Jump to:

1Sang didto na kami sa takas nga naluwas sa katalagman, nahibaluan namon nga ang isla ginatawag Malta.

2Maabi-abihon gid ang mga pumoluyo didto. Tungod kay nagsugod sa pag-ulan kag ginatugnawan kami, nagdabok sila sing kalayo kag ginbaton nila kami tanan sing maayo.

3Nagtipon si Pablo sing isa ka bugkos nga kahoy kag gingatong niya ini sa kalayo. Tungod sang kainit, may man-og nga naggwa kag iya gin-ukoban ang kamot ni Pablo.

4Sang makita sang mga pumoluyo ang man-og nga nagakabit sa kamot ni Pablo, nagsinilingay sila, “Manugpatay gid ini nga tawo, kag bisan naluwas sia sa kamatayon sa dagat, pero ang diosa sang katarungan indi magtugot sa iya nga mabuhi.”

5Pero ginwaslik ni Pablo ang man-og sa kalayo kag wala man sia maano.

6Nagpaabot sila nga magapalanghubag sia ukon matumba sing hinali kag mapatay. Pero sang madugay na ang ila paghulat kag wala man sila sing may nakita nga malain nga natabo sa iya, nagbaylo ang ila mga panghunahuna kag nagsiling sila, “Isa sia ka dios!”

7Malapit sa amo nga lugar may mga kadutaan nga ginapanag-iyahan ni Publio, ang pangulo sang isla. Ginbaton niya kami sing maayo kag nanginbisita kami niya sa sulod sang tatlo ka adlaw.

8Ang amay ni Publio nagahigda kag nagamasakit nga may hilanat kag balaud. Nagsulod si Pablo sa iya kwarto, nagpangamuyo, nagtungtong sang iya mga kamot sa iya, kag nag-ayo sa iya.

9Sang nahanabo ini, ang tanan nga mga masakiton sa amo nga isla nag-abot kag ginpang-ayo niya sila.

10Madamo nga mga regalo ang ila ginhatag sa amon, kag sang manugtulak kami, gindalhan nila kami sa sakayan sang amon kinahanglanon para sa amon pagpanakayon.

11Sa tapos ang tatlo ka bulan nagpanakayon kami sa isa ka sakayan nga ginatawag “Ang Kapid nga Dios.” Naghalin ini sa Alejandria kag nagtener sa isla sang pag-abot sang tigtulognaw.

12Nagdungka kami sa siudad sang Siracusa kag didto kami nagtener sing tatlo ka adlaw.

13Halin didto nagpanakayon kami kag nagdungka sa siudad sang Regio. Sang madason nga adlaw naghuyop ang habagat, kag sa sulod sang duha ka adlaw, nakaabot kami sa banwa sang Puteoli.

14May nakita kami didto nga mga kautoran nga nagpangabay sa amon nga magtener kami upod sa ila sing isa ka simana. Kag dayon nagkadto kami sa Roma.

15Sang mabatian sang mga kautoran sa Roma nga nag-abot kami nagkadto sila sa pagsugat sa amon tubtob sa Tiendahan sang Appio kag sa Tatlo ka mga Dalayunan. Sang makita sila ni Pablo, nagpasalamat sia sa Dios kag sia tuman gid nga napabakod.

16Sang pag-abot namon sa Roma, gintugotan si Pablo sa pag-estar sing kinaugalingon nga may isa ka soldado lang nga nagabantay sa iya.

17Sang makaligad ang tatlo ka adlaw, ginpatawag ni Pablo ang mga pangulo sang mga Judio sa Roma. Sang pagtipon nila nagsiling sia sa ila, “Mga utod ko! Bisan pa nga wala ako sing may nahimo batok sa aton mga katawhan kag batok sa mga kinabatasan nga ginpaalinton sa aton sang aton mga katigulangan, ginbilanggo ako sa Jerusalem kag gintugyan sa mga Romanhon.

18Gin-usisa nila ako kag sang mahibaluan nila nga wala ako sing may nahimo agod takos pamatbatan sang kamatayon luyag nila kuntani nga buy-an ako.

19Pero sang ginpamalabagan ini sang mga Judio, napilitan ako sa pagdangop sa Emperador, bisan pa nga wala ako sing panumbongon batok sa akon kaugalingon nga katawhan.

20Gani amo ini ang kabangdanan nga nagpangabay ako sa pagpakigkita kag pagpakighambal sa inyo, kay nakadenahan ako tungod sa iya nga amo ang paglaom sang mga tawo sang Israel.”

21Nagsiling sila sa iya, “Wala kami makabaton sing mga sulat halin sa Judea nahanungod sa imo, ukon may nag-abot diri nga mga utod naton nga may dala nga mga balita ukon malain nga inughambal batok sa imo.

22Pero luyag namon pamatian ang imo mga panghunahuna, tungod kay nakahibalo kami nga bisan diin ginamulay sang mga tawo ining sekta nga ginatapuan mo.”

23Gani nagpat-od sila sang adlaw sang ila pagpamati kay Pablo kag madamo ang nagtipon sadto nga adlaw sa lugar nga ginaestaran ni Pablo. Halin sa aga tubtob sa gab-i ginsaysay niya kag ginwali ang paghari sang Dios. Ginhimulatan niya nga hayluhon sila sa pagtuo kay Jesus, paagi sa iya paggamit sang Kasugoan ni Moises kag sang mga sinulatan sang mga propeta.

24Ang iban sa ila nahaylo sang iya ginhambal, pero ang iban indi magtuo.

25Gani nagpauli sila nga nagabinaisay sa tapos makasiling sini si Pablo, “Husto gid ang ginsiling sang Espiritu Santo sa inyo mga katigulangan paagi kay Isaias nga propeta!

26Kay nagsiling sia: ‘Kadtoi kag singgani ini nga mga tawo: Magapamati lang kamo nga pamati, pero indi makahangop, magatulok lang kamo nga tulok, pero indi makakita,

27tungod kay ini nga mga tawo matig-a sing ulo, gintakpan nila ang ila mga dulonggan, kag ginpiyong nila ang ila mga mata. Kay kon indi nila paghimuon ini, makakita ang ila mga mata, makabati ang ila mga dulonggan, makahangop ang ila mga hunahuna, kag magaliso sila sa akon, kag ako magaayo sa ila, siling sang Dios.’”

28Kag sa katapusan si Pablo nagsiling: “Gani dapat mahibaluan ninyo nga ang mensahe sang Dios sang kaluwasan, ginpadala sa mga Hentil. Magapamati sila!”

29Sa sulod sang duha ka tuig, nag-estar si Pablo sa balay nga iya gin-alkilahan kag ginbaton niya ang tanan nga nagbisita sa iya.

30Nagwali sia nahanungod sang paghari sang Dios kag nagtudlo sia nga may kaisog nahanungod kay Ginoong Jesu-Cristo, kag wala sing may nag-upang sa iya.

← Chapter 27 Jump to: