Acts 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Nagpanglakaton si Pablo kag nakaabot sia sa Derbe kag sa Listra. May isa ka gintuton-an nga nagaestar didto nga ginahingalanan kay Timoteo. Ang iya iloy isa man ka tumoluo nga Judio, pero ang iya amay isa ka Griego.

2Ang tanan nga mga kautoran sa Listra kag sa Iconio naghambal nga si Timoteo isa ka maayo nga tawo.

3Luyag ni Pablo nga dalhon si Timoteo upod sa iya, gani gintuli niya sia. Ginhimo niya ini tungod kay ang tanan nga mga Judio nga nagaestar sa sadto nga mga lugar nakahibalo nga Griego ang amay ni Timoteo.

4Kag sa ila pagpanghapithapit sa mga kabanwahanan, ginpaalinton nila sa mga tumoluo ang mga pagsulondan nga ginkaisahan sang mga apostoles kag mga katigulangan sang iglesia sa Jerusalem, kag ginsingganan sila nga tumanon nila yadto nga mga pagsulondan.

5Gani nagbakod pa gid ang mga iglesia sa pagtuo kag nagdugang ang ila kadamuon adlaw-adlaw.

6Nagpanglakaton sila sa mga kadutaan sang Frigia kag Galacia tungod kay ang Espiritu Santo nagdumili sa ila sa pagwali sang mensahe sa probinsya sang Asia.

7Sang nakalambot sila sa dulonan sang Misia, nagtinguha sila sa pagkadto sa probinsya sang Bitinia, pero wala sila pagtugoti sang Espiritu ni Jesus.

8Gani nagpadayon sila sa paglakat nga nag-agi sa Misia kag nagdulhog pakadto sa Troas.

9Sadto nga gab-i may palanan-awon si Pablo sa diin nakita niya ang isa ka tawo nga taga-Macedonia nga nagatindog kag nagapakitluoy sa iya nga nagasiling, “Tabok ka diri sa Macedonia kag tabangi kami!”

10Sa gilayon, sa tapos sining palanan-awon ni Pablo, naghimos kami sa pagkadto sa Macedonia, kay napat-od namon nga ang Dios nagtawag sa amon sa pagwali sang Maayong Balita sa mga pumoluyo didto.

11Nagsakay kami sa sakayan halin sa Troas kag deretso nga nagpadulong kami sa Samotracia, kag sang madason nga adlaw nagdungka kami sa Neapolis.

12Gikan didto nagkadto kami sa Filipos, ang labing daku nga siudad sa distrito sang Macedonia nga ginagamhan sang mga taga-Roma. Nagtener kami sing pila ka adlaw sa amo nga siudad.

13Sang Adlaw nga Inugpahuway naggwa kami sa siudad kag nagkadto sa pangpang sang suba kay naghunahuna kami nga may lugar didto nga ginatipunan sang mga Judio sa pagpangamuyo. Nagpungko kami kag nagsugilanon sa mga babayi nga nagtipon didto.

14Ang isa sang mga nagpamati sa amon amo si Lidya nga taga-Tiatira, isa ka manugbaligya sang tela nga granate nga malahalon. Isa sia ka babayi nga nagasimba sa Dios kag ginbuksan sang Ginoo ang iya painuino sa pagbaton sang mga ginhambal ni Pablo.

15Sa tapos mabautisohan sia kag ang tanan nga sakop sang iya panimalay, gin-agda niya kami, “Didto kamo dayon sa akon balay kon nagahunahuna kamo nga isa na ako ka matuod nga tumoluo sang Ginoo.” Sang ulihi ginbaton namon ang iya pangagda.

16Sang isa sadto ka adlaw, sang nagapakadto kami sa lugar nga ginatipunan sa pagpangamuyo, ginsugata kami sang isa ka ulipon nga babayi nga makasugid sang palaabuton tungod kay may espiritu nga malaut nga nagagahom sa iya. Nakapangwarta ang iya mga agalon paagi sa iya pagpanagna sang palaabuton.

17Ginsunod niya si Pablo kag kami samtang sia nagasinggit, “Ini nga mga tawo mga alagad sang Labing Mataas nga Dios! Ginawali nila sa inyo kon sa ano nga paagi kamo maluwas!”

18Ginhimo niya ini sa madamo nga mga inadlaw tubtob nga tinak-an si Pablo kag nagliso sia sa iya, kag ginsingganan niya ang espiritu, “Sa ngalan ni Jesu-Cristo ginamanduan ko ikaw sa paggwa sa iya!” Naggwa ang espiritu sa iya sa sadto gid nga tion.

19Sang matalupangdan sang iya mga agalon nga nadulaan sila sing kahigayunan nga makapangwarta, gindakop nila si Pablo kag si Silas kag ginsagnoy sila pakadto sa mga awtoridad nga ato didto sa plasa.

20Gindala nila sila sa mga opisyales nga Romanhon kag nagsiling, “Ini nga mga tawo mga Judio kag nagagamo sila diri sa aton siudad.

21Nagatudlo sila sing mga kinabatasan nga batok sa aton kasugoan. Mga Romanhon kita kag indi kita makabaton kag makahimo sini nga mga kinabatasan.”

22Madamo nga mga tawo ang nagpuli sa pagsakit sa ila. Ginpanggisi sang mga opisyales ang mga bayu ni Pablo kag ni Silas kag nagmando nga hanuton sila.

23Sa tapos nga mahanot sila sing madamo, ginbilanggo sila kag ang bantay sang bilangguan ginmanduan nga bantayan sila sing maayo.

24Sang mabaton sang bantay ini nga mando, ginbutang niya sila didto sa sulod gid nga selda kag gingapos ang ila mga tiil sa tunga sang mabug-at kag mga gingutiban nga tapi.

25Sang mga tungang gab-i, nagpangamuyo si Pablo kag si Silas kag nagkanta sa pagdayaw sa Dios, kag ang iban nga mga binilanggo nagpamati sa ila.

26Sa hinali naglinog sing mabaskog kag nagtay-og ang bilangguan tubtob sa iya mga sadsaran. Sa gilayon nag-abri ang tanan nga mga pwertahan sang bilangguan kag nagkalahukas ang mga kadena sa tanan nga mga binilanggo.

27Nagbugtaw ang bantay, kag sang makita niya nga nabuksan ang mga pwertahan sang bilangguan, naghunahuna sia nga nakapalagyo ang mga binilanggo. Gani gingabot niya ang iya espada sa tuyo nga manginmatay sia.

28Pero nagsinggit si Pablo sing mabaskog, “Indi paghaliti ang imo kaugalingon! Yari kami diri tanan!”

29Nagpangayo ang bantay sang suga kag dalidali sia nga nagsulod kag nagluhod nga nagapalangurog sa atubang ni Pablo kag ni Silas.

30Dayon iya sila gindala pa gwa kag ginpamangkot, “Ano bala ang himuon ko, mga sir, agod nga maluwas ako?”

31Nagsabat sila, “Magtuo ka kay Ginoong Jesus kag maluwas ka, ikaw kag ang imo panimalay.”

32Kag ginwali nila ang pulong sang Ginoo sa iya kag sa tanan nga yara sa iya balay.

33Sa sadto gid nga tion sang kagab-ihon gindala sila sang bantay kag ginhugasan ang ila mga pilas kag sa gilayon ang bantay kag ang bug-os niya nga panimalay ginbautisohan.

34Gindala niya si Pablo kag si Silas sa iya balay kag ginhatagan sila sang pagkaon. Sia kag ang iya bug-os nga panimalay napuno sang kalipay tungod kay karon nagatuo sila sa Dios.

35Sang madason nga aga ang mga awtoridad nga Romanhon nagpadala sa mga pulis nga may mando, “Buy-i yadto nga mga tawo.”

36Kag nagsiling ang bantay kay Pablo, “Nagpadala sang mando ang mga pangulo nga buy-an kamo nga duha ni Silas. Gani makagwa na kamo kag makalakat sa paghidait.”

37Pero nagsiling si Pablo sa mga pulis, “Wala kami sing sala, pero ginhanot kami nila sa atubang sang mga tawo, bisan kami mga pumoluyo sang Roma! Dayon ginpabilanggo nila kami, kag karon pagwaon lang nila kami sing tago? Indi mahimo! Kinahanglan magkadto diri ang mga pangulo nga Romanhon kag sila gid ang magpagwa sa amon.”

38Ginsugid sang mga pulis ang mga ginhambal ni Pablo sa mga pangulo nga Romanhon kag sang pagkabati nila nga si Pablo kag si Silas mga Romanhon, kinulbaan sila.

39Gani, nagkadto sila sa bilangguan kag nagpangayo sila sing pasaylo, kag ginpagwa nila sila kag ginpangabay nga maghalin sila sa siudad.

40Sang makagwa si Pablo kag si Silas sa bilangguan nagkadto sila sa balay ni Lidya. Didto nagpakigkita sa ila ang mga kautoran kag sa tapos malaygayan nila sila sa pagpabakod sa ila, naglakat sila.

← Chapter 15 Jump to: Chapter 17 →