Acts 13 — Ilonggo (Maayong Balita nga Biblia (2012))

1May mga propeta kag mga manunodlo sa iglesia sa Antioquia nga amo sanday Bernabe, Simeon nga ginatawag Negro, Lucio nga taga-Cirene, Manaen nga nagdaku kaupod ni Herodes nga Gobernador, kag Saulo.

2Sang nagasimba sila sa Ginoo kag nagapuasa, nagsiling sa ila ang Espiritu Santo, “Paina para sa akon si Bernabe kag si Saulo, sa paghimo sang isa ka hilikuton kay gintawag ko sila.”

3Dayon sa tapos sila makapuasa kag makapangamuyo, gintungtong nila ang ila mga kamot sa ila kag ginpalakat sila.

4Gani, si Bernabe kag si Saulo nga ginpadala sang Espiritu Santo nagkadto sa Seleucia, kag halin didto nagpanakayon sila pakadto sa Cipre.

5Sang pag-abot nila sa Salamina ginwali nila ang pulong sang Dios sa mga sinagoga sang mga Judio. Kaupod nila si Juan nga ginahingalanan man Marcos sa pagbulig sa ila sa mga bulohaton.

6Naglakat sila tubtob nga nakalambot sila sa Pafo nga yara sa pihak sang isla kag didto nagkitaay sila sang isa ka madyikero nga ginahingalanan kay Bar-Jesus. Isa sia ka Judio kag di-matuod nga propeta.

7Abyan sia ni Sergio Paulo, isa ka maalam nga tawo kag gobernador sang isla. Ginpatawag sang gobernador si Bernabe kag si Saulo, tungod kay luyag sia mamati sang pulong sang Dios.

8Pero ginpamalabagan sila ni Bar-Jesus, ang madyikero nga ginatawag man Elimas. Ginhimulatan niya nga ipalikaw ang gobernador sa pagtuluohan.

9Kag si Saulo, nga ginatawag man nga Pablo, napun-an sang Espiritu Santo, nagtulok sing tadlong sa madyikero

10kag nagsiling, “Anak ka sang Yawa! Kaaway ka sang tanan nga maayo! Puno ka sang tanan nga dinaya! Waay patay ang imo pagpatiko sang mga kamatuoran sang Ginoo!

11Karon, ang kamot sang Ginoo magakunsad batok sa imo, mabulag ka kag indi ka makakita sang kapawa sa sulod sang pila ka adlaw.” Sa gilayon ginkulapan sang madulom nga ambon ang mga mata ni Elimas kag nagpangapkap sia sa pagpangita sang mga tawo nga magatuytoy sa iya, paagi sa pag-uyat sang iya kamot.

12Sang makita sang gobernador ang natabo, nagtuo sia kag natingala gid sang mga pagtulon-an nahanungod sa Ginoo.

13Halin sa Pafo, nagpanakayon si Pablo kag ang iya mga kaupdanan kag nagdungka sila sa Perge, isa ka siudad sa Panfilia. Didto ginbayaan sila ni Juan nga ginahingalanan man Marcos kag nagbalik sia sa Jerusalem.

14Halin sa Perge nagpadayon sila tubtob nga nakalambot sila sa Antioquia sa Pisidia, kag sang Adlaw nga Inugpahuway nagkadto sila sa sinagoga kag nagpungko didto.

15Sa tapos mabasa ang pila ka bahin sang Kasugoan ni Moises kag ang mga sinulatan sang mga propeta, ang mga opisyales sang sinagoga nagpadala sa ila sang isa ka mensahe: “Mga abyan, luyag namon nga maghambal kamo sa mga tawo kon may yara kamo nga inughambal nga makapabakod sa ila.”

16Nagtindog si Pablo, nagsenyas sang iya kamot kag nagsugod sa paghambal: “Mga kasimanwa ko nga mga Israelinhon kag tanan nga mga Hentil nga yari diri nga nagasimba sa Dios, pamatii ninyo ako!

17Ang Dios sining mga tawo sang Israel nagpili sang aton mga katigulangan kag naghimo sa mga tawo nga isa ka daku nga pungsod, samtang didto sila nagaestar subong nga mga dumoluong sa Ehipto. Ginpagwa sila sang Dios sa Ehipto paagi sa iya daku nga gahom,

18kag sa sulod sang kwarenta ka tuig ginbatas niya sila sa desierto.

19Ginlaglag niya ang pito ka mga pungsod sa duta sang Canaan kag ginhimo niya ang iya mga tawo nga mga tag-iya sang kadutaan

20sa sulod sang 450 ka tuig. “Sa tapos sini ginhatagan niya sila sing mga hukom tubtob sa panahon ni Samuel nga propeta.

21Kag sang nagpangayo sila sang isa ka hari, ginhatag sang Dios sa ila si Saul nga anak ni Kis, halin sa tribo ni Benjamin. Nanginhari sia nila sa sulod sang kwarenta ka tuig.

22Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya: ‘Nakita ko si David nga anak ni Jesse nga amo ang tawo nga nagapahamuot sa akon, kay isa sia ka tawo nga magahimo sang tanan nga luyag ko ipahimo sa iya.’

23Si Jesus nga kaliwat ni David, amo ang ginhimo sang Dios nga Manluluwas sang mga tawo sang Israel, suno sa iya ginsaad.

24Sa wala pa makasugod si Jesus sang iya bulohaton, nagwali si Juan sa tanan nga mga tawo sang Israel nga magbiya sila sa ila mga sala kag magpabautiso.

25Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Magaabot sia nga ulihi lang sa akon, pero indi ako takos sa paghubad sang higot sang iya mga sandalyas.’

26“Mga utod, mga kaliwat ni Abraham, kag tanan kamo nga mga Hentil nga nagasimba sa Dios: sa aton ginpadala ining balita sang kaluwasan!

27Kay ang mga tawo nga nagaestar sa Jerusalem kag ang ila mga pangulo wala makahibalo nga si Jesus amo ang Manluluwas, kag wala man sila makahangop sang mga pulong sang mga propeta nga ginabasa sa tagsa ka Adlaw nga Inugpahuway. Pero sa ila pagkondenar kay Jesus natuman nila ang mga gintagna sang mga propeta.

28Kag bisan nga wala sila sing may makita nga kabangdanan nga pamatbatan sia sing kamatayon, ginpangayo nila kay Pilato nga ipapatay sia.

29Kag sang nahimo na nila ang tanan nga ginsiling sang mga Kasulatan nahanungod sa iya, gintaltal nila sia sa krus, kag ginbutang nila sia sa isa ka lulobngan.

30Pero ginbanhaw sia sang Dios gikan sa mga minatay,

31kag sa madamo nga mga inadlaw nagpakita sia sa ila nga mga nakapanglakaton upod sa iya halin sa Galilea pakadto sa Jerusalem. Karon mga saksi niya sila sa mga taga-Israel.

32Kag yari kami diri sa pagdala sa inyo sang Maayong Balita: ang ginsaad sang Dios sa aton mga katigulangan nga iya pagahimuon, iya na nahimo sa aton nga mga kaliwatan nila, paagi sa iya pagbanhaw kay Jesus. Kay nasulat sa ikaduha nga Salmo: ‘Ikaw ang Anak ko, nangin-amay mo ako sa sini nga adlaw.’

34Kag nahanungod sa pagbanhaw sa iya gikan sa mga minatay, indi na gid sia magbalik sa lawas nga madunot pa. Sa sini nga bagay nagsiling ang Dios: ‘Ihatag ko sa inyo ang balaan kag pat-od nga mga pagpakamaayo nga akon ginsaad kay David.’

35Kag sa isa pa gid ka bahin sang kasulatan, nagsiling sia: ‘Indi ka magtugot nga ang imo matutom nga alagad madunot sa lulobngan.’

36Kay sa tapos si David makaalagad sa mga tinutuyo sang Dios sa iya panahon, napatay sia kag ginlubong upod sang iya mga katigulangan, kag nadunot sia.

37Pero yadtong isa nga ginbanhaw sang Dios gikan sa mga minatay wala makaagom sang pagkadunot.

38Tanan kamo, mga utod ko, dapat makahibalo nga paagi kay Jesus ginawali sa inyo ang mensahe nahanungod sa kapatawaran sang mga sala, kag dapat kamo makahibalo nga ang tanan nga nagatuo sa iya ginahilway sa tanan nga sala. Ini nga paghilway indi mahimo sang Kasugoan ni Moises.

40Gani, mag-andam kamo, agod nga ang mga ginsiling sang mga propeta indi matabo sa inyo. Nagsiling sila:

41‘Tan-awa ninyo, kamo nga mga palayaguta! Magkatingala kamo kag magkalamatay! Kay ang butang nga ginahimo ko sa inyo panahon isa ka butang nga indi gid kamo magpati, bisan pa may isa nga magsaysay sini sa inyo!’”

42Kag sang si Pablo kag si Bernabe nagapagwa sa sinagoga, gin-agda sila sang mga tawo nga magbalik sa madason nga Adlaw nga Inugpahuway sa pagsugid sa ila sang dugang pa nahanungod sini nga mga butang.

43Sang makahalin na ang mga tawo sa pagtilipon, si Pablo kag si Bernabe ginsunod sang madamo nga mga Judio kag sang madamo nga mga Hentil nga nakonbertir sa pagtuluohan sang mga Judio. Naghambal ang mga apostoles sa ila kag ginpaisog sila sa pagpadayon sa pagkabuhi sa Dios nga nanginmaayo sa ila.

44Sang madason nga Adlaw nga Inugpahuway halos ang tanan nga mga pumoluyo sang banwa nagtipon sa pagpamati sang pulong sang Ginoo.

45Sang makita sang mga Judio ang kadamuon sang mga tawo, nahisa gid sila kag naghambal sila batok sa mga ginpanghambal ni Pablo kag ginpakahuy-an nila sia.

46Pero nagdugang pa gani ang kaisog ni Pablo kag ni Bernabe sa paghambal kag nagsiling sila: “Kinahanglan gid nga ihambal sing una sa inyo ang pulong sang Dios. Pero tungod kay ginasikway ninyo ini, kag wala ninyo ginakilala nga takos kamo sa pagbaton sang kabuhi nga wala sang katapusan, bayaan namon kamo kag magkadto sa mga Hentil.

47Kay amo ini ang sugo nga ginhatag sang Ginoo sa amon: ‘Ginbutang ko ikaw nga manginkapawa sa mga Hentil, agod magdala sang kaluwasan para sa bug-os nga kalibutan.’”

48Sang pagkabati sang mga Hentil sini nalipay sila kag gindayaw nila ang mensahe sang Ginoo, kag yadtong mga ginpili para sa kabuhi nga wala sing katapusan nangintumoluo.

49Naglapnag ang pulong sang Dios sa tanan nga lugar sadto nga rehiyon.

50Ugaling ginsugyot sang mga Judio ang kinilala nga mga tawo sa amo nga siudad, kag subong man ang mga Hentil nga mga babayi nga manggaranon nga nagasimba sa Dios. Ginsugdan nila ang paghingabot kay Pablo kag kay Bernabe, kag gintabog nila sila pa gwa sa ila rehiyon.

51Gintaktak sang mga apostoles ang yab-ok sa ila mga tiil batok sa ila, kag nagkadto sila sa Iconio.

52Ang mga gintuton-an sa Antioquia napun-an sang kalipay kag sang Espiritu Santo.