Acts 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Sang makaligad ang lima ka adlaw, nagkadto ang Pinakamataas nga Pari nga si Ananias sa Cesarea kaupod ang pila ka mga katigulangan sang mga Judio kag ang isa ka abogado nga ginahingalanan kay Tertulo. Nag-atubang sila kay Gobernador Felix kag ila ginpahayag ang ila panumbongon batok kay Pablo.

2Gintawag si Pablo kag nagsugod si Tertulo sa pagsumbong sa iya sang masunod: “Halangdon nga Gobernador! Tungod sang imo maayo nga pagdumala nagluntad ang malawig nga kalinong sa amon pungsod kag madamo nga mga katikuan ang imo gintadlong para sa kaayuhan sang amon pungsod.

3Sa tanan nga lugar kag sa tanan nga tion ginabaton namon ini, kag daku gid ang amon pagpasalamat sa imo.

4Pero agod nga indi ako makaawat pa gid nagapangabay ako nga pamatian mo nga may pagpailob ang amon malip-ot nga panaysayon.

5Nasapwan namon nga makatalagam ini nga tawo tungod sang kinagamo nga iya ginhimo. Sia amo ang nagasugod sini sa mga Judio sa bug-os nga kalibutan kag sia amo ang pangulo sang partido sang mga Nazareno.

6Iya man kuntani dagtaan ang Templo, pero gindakop namon sia.

8Kon imo usisaon ini nga tawo mahibaluan gid nimo gikan sa iya ang tanan nga mga butang nga ginasumbong namon batok sa iya.”

9Gin-ugyonan sang mga Judio ini nga panumbongon kag nagsiling sila nga ini tanan matuod.

10Dayon ginsinyasan sang Gobernador si Pablo sa paghambal, kag si Pablo nagsiling: “Nakahibalo ako nga nanginhukom ikaw sa madamo nga tinuig sa sini nga pungsod, gani ginakalipay ko ang pagpangapin sang akon kaugalingon sa imo atubang.

11Kon usisaon mo, mga dose pa lang ka adlaw nga nagkadto ako sa Jerusalem sa pagsimba.

12Wala ako makita sang mga Judio nga nagapakigsuay sa kay bisan sin-o sa Templo, kag wala man nila ako makita nga nagasugyot sa mga tawo sa ila mga sinagoga ukon sa iban nga mga lugar sa siudad.

13Indi man nila mapamatud-an ang mga panumbongon nga ila karon ginapasaka batok sa akon.

14Pero akon ini ginaako sa atubang mo: Ginasimba ko ang Dios sang amon mga katigulangan paagi sa akon pagsunod sa Dalan nga suno sini nga mga tawo, indi matuod. Pero nagatuo man ako sa tanan nga nasulat sa Kasugoan ni Moises kag sa mga libro sang mga propeta.

15Ako may paglaom sa Dios subong sang paglaom sini nga mga tawo nga ang tanan, maayo ukon malain, mabanhaw gikan sa mga minatay.

16Gani ginahimulatan ko pirme nga magmatinlo ang akon konsensya sa atubang sang Dios kag sang mga tawo.

17“Sa tapos ang pila ka mga tinuig nga wala ako makapalapit sa Jerusalem, nagkadto ako didto sa pagdala sang kwarta nga ibulig sa akon mga kasimanwa, kag sa paghalad sing mga dulot.

18Bag-o ko lang matapos ang seremonya sa pagpaninlo kag nagahalad gid ako sa Templo sang masapwan nila ako didto. Wala sing madamo nga mga tawo didto, kag wala man sing kinagamo.

19Pero may mga Judio didto nga halin sa probinsya sang Asia. Sila mismo ang dapat mag-atubang sa imo kag magpahayag sang ila mga panumbongon kon may inugsumbong sila batok sa akon.

20Ukon pasugira ini nga mga tawo nga yari diri kon ano nga sala ang nakita nila sa akon, sang nagtindog ako sa atubang sang Konseho,

21luas sang isa ka butang nga akon ginsinggit sang nagtindog ako sa atubang nila. Nagsiling ako: ‘Ginahukman ninyo ako sa sini nga adlaw kay nagatuo ako nga pagabanhawon ang mga minatay.’”

22Dayon si Felix nga may madamo sang nahibal-an nahanungod sang Dalan, nag-untat sang ila bista. Nagsiling sia, “Pamatbatan ko ang inyo nga kaso kon mag-abot na si Lisias nga kumander.”

23Ginmanduan niya ang opisyal nga nagabantay kay Pablo nga pabantayan sia, pero hatagan man sia sing diutay nga kahilwayan kag tugotan ang iya mga abyan sa paghatag sa iya sang iya mga kinahanglanon.

24Sa tapos ang pila ka adlaw, nag-abot si Felix kag ang iya asawa nga si Drusila nga isa ka Judia. Ginpatawag niya si Pablo kag nagpamati sia, sa iya paghambal nahanungod sang pagtuo kay Cristo Jesus.

25Pero sang nagapadayon si Pablo sa pagsaysay nahanungod sa paghimo sang maayo, pagpugong sang kaugalingon, kag sang palaabuton nga Adlaw sang Paghukom, hinadlukan si Felix kag nagsiling sia, “Mahimo ka na makalakat! Tawgon ko ugaling ikaw liwat kon may kahigayunan ako.”

26Sa amo man nga tion naglaom sia nga hamhaman sia ni Pablo sing kwarta, gani, masunson niya sia ginapatawag kag magpakighambal sa iya.

27Sa tapos makaligad ang duha ka tuig ginbuslan ni Porcio Festo si Felix nga gobernador. Tungod kay luyag ni Felix nga kabigon sia nga maayo sang mga Judio ginbilin niya si Pablo sa bilangguan.

← Chapter 23 Jump to: Chapter 25 →