Acts 20

Ilonggo (Maayong Balita nga Biblia (2012))

← Chapter 19 Jump to: Chapter 21 →

1Sang mag-untat na ang kinagamo, gintipon ni Pablo ang mga gintuton-an kag sa tapos sia makalaygay sa pagpabakod sa ila, nagpaalam sia sa ila. Dayon sang makahalin sia nagkadto sia sa Macedonia.

2Madamo nga mga lugar ang ginpangadtuan niya didto kag ginpabakod niya ang mga tawo paagi sa pagwali sang madamo nga mga mensahe. Nagkadto sia dayon sa Acaya,

3sa diin nagtener sia sing tatlo ka bulan. Sang nagapanghanda sia sa pagkadto sa Siria, nasapwan niya nga nagaplano ang mga Judio batok sa iya, gani nagpamat-od sia nga magbalik paagi sa Macedonia.

4Nag-upod sa iya si Sopater nga anak ni Pirro nga taga-Berea. Subong man nag-upod si Aristarco kag si Segundo nga mga taga-Tesalonica. Nag-upod man si Gayo nga taga-Derbe, kag si Timoteo, kag ang mga taga-Asia nga si Tiquico kag si Trofimo.

5Nag-una sila kag ginhulat nila kami sa Troas.

6Sa tapos ang Piesta sang Tinapay nga Wala sing Lebadora, nagpanakayon kami halin sa Filipos kag sa ikalima nga adlaw nag-abot kami sa ila sa Troas, sa diin nagtener kami sing isa ka simana.

7Sang Sabado sing gab-i nagtipon kami sa pagpamihakpihak sang tinapay. Nagwali si Pablo sa mga tawo kag nagpadayon sia tubtob sang tungang gab-i tungod kay malakat na sia sa madason nga adlaw.

8Madamo ang mga suga sa kwarto sa ibabaw sa diin kami nagatipon.

9May isa ka pamatan-on nga ginahingalanan kay Eutico nga nagapungko sa bintana. Ginatuyo sia samtang nagahambal si Pablo. Sang ulihi nahamuokan sia sa pagtulog kag nahulog sa duta halin sa ikatlo nga panalgan. Kag sang paghakwat nila sa iya, patay na sia.

10Pero nagpanaog si Pablo, ginhap-an niya kag ginhakos ang pamatan-on kag nagsiling, “Indi kamo magpakulba, buhi pa sia!”

11Dayon nagbalik sia sa ibabaw, nagpamihakpihak sang tinapay kag nagkaon. Nagpadayon sia sa paghambal sa ila sa malawig nga tion, tubtob sa pagbutlak sang adlaw kag pagkatapos, naglakat sia.

12Gindala nila ang pamatan-on pauli nga buhi kag daku gid ang ila kalipay.

13Nag-una kami sa sakayan kag nagpanakayon pakadto sa Ason, sa diin hapiton namon si Pablo kag pasakyon. Amo ini ang tugon niya sa amon tungod kay malakat lang sia pakadto didto.

14Sang pagkitaay namon sa Ason ginpasakay namon sia kag nagpadulong kami sa Mitilene.

15Nagpanakayon kami halin didto kag nagdungka kami sang madason nga adlaw sa Quio. Sang madason pa gid nga adlaw nag-abot kami sa Samos kag sang madason pa gid nga adlaw nagdungka kami sa Mileto.

16Nagpamat-od si Pablo nga indi maghapit sa Efeso, agod indi sia magdugay sa probinsya sang Asia kay nagadali sia nga makaabot sa Jerusalem, sa adlaw sang Pentecostes kon mahimo.

17Sang didto si Pablo sa Mileto nagpadala sia sang mensahe sa Efeso nga nagpangabay sa mga katigulangan sang iglesia nga pakigkitaan sia.

18Sang pag-abot nila nagsiling sia sa ila, “Nahibaluan ninyo kon paano ang akon pagkabuhi sa tanan nga tion sang kaupod pa ninyo ako, sumugod sang una nga adlaw sang pag-abot ko sa probinsya sang Asia.

19Nag-alagad ako sa Ginoo sa tuman nga pagpaubos kag sa madamo nga mga luha, bisan pa nga binudlayan ako tungod sang mga paghingabot sang mga Judio.

20Nakahibalo kamo nga wala sing hawidhawid ang pagbulig ko sa inyo sa bisan ano sa akon pagwali kag pagtudlo sa inyo, sa inyo pagtipon sing tingob kag sa inyo mga balay.

21Ginpaandaman ko sing alalangay ang mga Judio kag mga Hentil nga kinahanglan mag-untat sila sa pagpakasala kag magliso sa Dios kag magtuo sa aton Ginoong Jesus.

22Kag karon makadto ako sa Jerusalem sa pagtuman sang sugo sang Espiritu Santo kag wala ako makahibalo kon ano ang matabo sa akon didto.

23Ang akon lang nahibaluan amo nga ang Espiritu Santo nagapaandam sa akon nga sa tagsa ka siudad ang bilangguan kag ang mga kasakitan nagahulat sa akon.

24Pero ginakabig ko nga ang akon kabuhi wala sang bili sa akon. Ang luyag ko lang amo ang pagkompleto sang akon bulohaton kag pagtapos sang tulomanon, nga ginhatag sa akon ni Ginoong Jesus nga amo ang pagwali sang Maayong Balita nahanungod sang daku nga kaayo sang Dios.

25“Nalibot ko na kamo tanan sa akon pagwali sang paghari sang Dios. Kag karon nahibaluan ko nga indi na ninyo ako makita liwat.

26Gani ginasiling ko sa inyo sa sini nga adlaw nga kon may yara sa inyo nga indi maluwas, wala na ako sing salabton.

27Kay wala sing hawidhawid ang akon pagwali sa inyo sang bug-os nga katuyoan sang Dios.

28Bantayi ang inyo mga kaugalingon kag subong man ang tanan nga panong nga gintugyan sa inyo sang Espiritu Santo. Tatapa ninyo ang iglesia sang Dios nga iya naangkon paagi sa iya kaugalingon nga dugo.

29Nahibaluan ko nga kon makahalin na ako, may mga lobo nga mapintas nga magasulod sa inyo kag magahalit sang panong nga wala sing luoyluoy.

30Kag magaabot ang tion nga bisan sa inyo grupo may mga tawo nga magasugid sing mga binutig sa pagpatalang sang mga gintuton-an agod magsunod sa ila.

31Gani, magbantay kamo, kag dumdomon ninyo nga madamo nga mga luha ang akon ginpatulo sa adlaw kag gab-i sa akon pagtudlo sa tagsa sa inyo sa sulod sang tatlo ka tuig.

32“Kag karon ginatugyan ko kamo sa pagtatap sang Dios kag sa mensahe sang iya daku nga kaayo. Sia sarang makapabakod kag makahatag sa inyo sing mga palanublion nga ginatigana niya para sa tanan niya nga mga tawo.

33Wala ako magkaibog sang inyo pilak, bulawan ukon bayu.

34Kamo mismo nakahibalo nga nag-obra ako paagi sining akon mga kamot agod nga masakdag ko ang akon mga kinahanglanon kag ang iya sang akon mga kaupdanan.

35Ginpakita ko sa inyo sa tanan nga bagay, nga paagi sa tudo nga pagpangabudlay dapat kita magbulig sa mga maluya kag aton dumdomon ang ginsiling sang aton Ginoong Jesus, ‘May labi nga kalipay ang paghatag sang sa pagbaton.’”

36Sa tapos makahambal si Pablo, nagluhod sia kaupod nila kag nagpangamuyo.

37Naghinibi sila tanan sang paghakos nila sa iya kag sang ila paghalok kag pagpaalam sa iya.

38Nasuboan gid sila sa iya pagsiling nga indi na gid sila magkitaay liwat. Kag gindul-ong nila sia sa sakayan.

← Chapter 19 Jump to: Chapter 21 →