Acts 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Kag si Saulo nagsugot sa pagpatay sa iya. Sa sina gid nga adlaw, nagsugod ang mapintas nga paghingabot sa iglesia sa Jerusalem. Luas sa mga apostoles, ang tanan nga mga tumoluo nag-alaplaag sa bug-os nga mga probinsya sang Judea kag sang Samaria.

2Ginlubong si Esteban sang pila ka mga tawo nga diosnon kag naghaya sila nga nagahibi sing tudo gid tungod sa iya.

3Gintinguhaan ni Saulo ang paglaglag sang iglesia. Nagpamalaybalay sia kag ginpangganoy niya ang mga tumoluo, mga lalaki kag mga babayi kag iya sila ginpabilanggo.

4Ang mga tumoluo nga nag-alaplaag nagkadto bisan diin nga lugar nga nagawali sang maayong balita.

5Nagkadto si Felipe sa siudad sang Samaria kag didto ginwali niya ang Cristo sa mga tawo.

6Sang nabatian sang mga tawo si Felipe kag nakita nila ang mga milagro nga ginhimo niya, nagpamati sila sang maayo sa iya ginhambal.

7Nagasinggit sing mabaskog ang malaut nga mga espiritu sa ila paggwa sa madamo nga mga tawo. Madamo man nga mga paralitiko kag mga piang ang nag-alayo.

8Gani may daku nga pagkinalipay sa sadto nga siudad.

9May isa ka tawo nga ginahingalanan kay Simon nga nagaestar sa amo nga siudad. Natingala gid sa iya ang mga taga-Samaria tungod sang iya abilidad sa madyik sa malawig nga panahon. Nagsiling sia nga sia gamhanan,

10gani ang tanan nga mga tawo sa siudad, imol kag manggaranon, nagpamati sa iya sing maayo. Nagsiling sila, “Sia amo ang gahom sang Dios nga ginatawag ‘Ang Daku nga Gahom.’”

11Madugay na nga ang mga tawo natingala sang iya abilidad sa madyik, sa bagay nga ila gid sia ginapamatian.

12Pero sang magtuo sila sa mensahe ni Felipe nahanungod sa Maayong Balita sang paghari sang Dios kag nahanungod sa ngalan ni Jesu-Cristo, nagpabautiso sila, mga lalaki kag mga babayi.

13Si Simon mismo nagtuo man kag sang mabautisohan sia nag-upod sia kay Felipe. Natingala sia sang makita niya ang dalagku nga katingalahan nga mga buhat kag mga milagro nga nahimo ni Felipe.

14Sang pagkabati sang mga apostoles sa Jerusalem nga ang mga taga-Samaria nagbaton sang pulong sang Dios, ginpadala nila si Pedro kag si Juan sa ila.

15Sang pag-abot nila nagpangamuyo sila para sa mga tumoluo agod mabaton nila ang Espiritu Santo.

16Kay bisan nabautisohan na sila sa ngalan ni Ginoong Jesus, wala pa magkunsad ang Espiritu Santo sa bisan isa sa ila.

17Gani gintungtong ni Pedro kag ni Juan ang ila mga kamot sa ila kag nabaton nila ang Espiritu Santo.

18Nakita ni Simon nga sang pagtungtong sang mga apostoles sang ila mga kamot sa mga tumoluo, ang Espiritu ginhatag sa ila. Gani gintanyagan niya si Pedro kag si Juan sing kwarta

19kag nagsiling, “Ihatag man ini nga gahom sa akon, agod nga ang bisan sin-o nga tungtongan ko sang akon mga kamot magabaton sang Espiritu Santo.”

20Pero nagsabat si Pedro sa iya, “Kabay nga malaglag ka upod sa imo kwarta, tungod kay nagahunahuna ka nga mabakal mo sang kwarta ang dulot sang Dios!

21Wala ka sing labot ukon bahin sa amon hilikuton, tungod kay indi matarong ang imo tagipusoon sa panulok sang Dios.

22Gani, hinulsoli ang malaut mo nga tuyo, kag magpangamuyo ka sa Ginoo nga patawaron ka sa imo panghunahuna sang subong sini nga butang.

23Kay makita ko nga puno ikaw sang sobra nga kahisa kag nabilanggo ka sang sala.”

24Nagsiling si Simon kay Pedro kag kay Juan, “Kon mahimo magpangamuyo man kamo sa Ginoo para sa akon, agod nga wala sang sini nga mga butang nga inyo ginsiling ang mahanabo sa akon.”

25Sa tapos makapanaksihon si Pedro kag si Juan kag makawali sang mensahe sang Ginoo nagbalik sila sa Jerusalem. Sa madamo nga mga barangay sa Samaria nga ila gin-agyan ginwali nila ang Maayong Balita.

26Ang isa ka anghel sang Ginoo naghambal kay Felipe, “Mag-aman ka kag magkadto sa bagatnan nayon, sa dalan nga halin sa Jerusalem pakadto sa Gaza.” (Ini nga dalan wala na ginaagyi sa sini nga mga inadlaw.)

27Gani naghimos si Felipe kag naglakat. Karon may isa ka tawo nga kapon nga taga-Etiopia nga nagapauli sa iya banwa. Isa sia ka mataas nga opisyal nga amo ang ginatugyanan sang tanan nga manggad sang Candace, ang Rayna sang Etiopia. Didto sia maghalin sa Jerusalem sa diin nagsimba sia sa Dios. Nagapauli sia nga nagasakay sa iya karwahi kag nagabasa sang libro ni Isaias nga propeta.

29Ang Espiritu Santo nagsiling kay Felipe, “Kadtoi kag tupari ang karwahi.”

30Nagdalagan si Felipe pakadto sa karwahi, kag nabatian niya nga nagabasa sia sang libro ni Isaias nga propeta. Ginpamangkot sia ni Felipe, “Nahangpan mo bala ang imo ginabasa?”

31Nagsabat ang opisyal, “Paano ang pagkahangop ko kon wala sing may magsaysay sini sa akon?” Kag gin-agda niya si Felipe sa pagsaka sa karwahi kag magpungko upod sa iya.

32Amo ini ang bahin sang kasulatan nga ginabasa niya: “Kaangay sia sang karnero nga ginadala sa ilihawan, kaangay sia sang kordero nga nagahipos lang samtang ginaguntingan sia sang iya mga bulbol. Wala sia magtikab sang iya baba.

33Ginpakahuy-an sia kag wala paghatagi sing hustisya. Wala sing may makasugid nahanungod sang iya mga kaliwatan, tungod kay natapos na ang iya kabuhi sa sini nga duta.”

34Namangkot ang opisyal kay Felipe, “Sugiri ako, sin-o bala ang ginapatungdan sini sang propeta? Ang iya kaugalingon ukon may iban pa?”

35Gani, nagsugod si Felipe sa paghambal halin sa sining dinalan sang kasulatan nga nagasaysay sa iya sang Maayong Balita nahanungod kay Jesus.

36Sang nagapadayon sila sa ila dalanon, nakaabot sila sa isa ka lugar nga may tubig. Nagsiling ang opisyal, “Yari ang tubig. Ano bala ang kasablagan nga indi ako mabautisohan?”

37Ginpadulog sang opisyal ang karwahi kag naglusong sila nga duha sa tubig kag ginbautisohan sia ni Felipe.

38Sang pagtakas nila sa tubig gindala si Felipe sang Espiritu sang Ginoo, kag wala na sia makita sang opisyal liwat, pero nagpauli ang opisyal nga puno sang kalipay.

39Nasapwan ni Felipe nga didto na sia sa Asdod. Dayon nagwali sia sang Maayong Balita sa mga banwa nga iya gin-agihan tubtob nga nakaabot sia sa Cesarea.

← Chapter 7 Jump to: Chapter 9 →