Judges 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Naghanda ang mga tawo sang Efraim sa pagpakig-away kag nagtabok sila sa Suba sang Jordan pakadto sa Sapon, kag nagsiling sila kay Jepte, “Ngaa man nagtabok ikaw sa dulonan sa pagpakig-away sa mga Amonhon nga wala magsiling sa amon sa pag-upod sa imo? Tutdan namon ang imo balay nga yara ka sa sulod!”

2Pero nagsiling si Jepte sa ila, “Ang akon mga tawo kag ako may daku nga kaawayon sa mga Amonhon. Nagpangayo ako sing bulig sa inyo, pero wala kamo magtabang sa akon.

3Sang pagkahibalo ko nga indi ninyo ako pagtabangan, nagpasimpalad ako sang akon kabuhi kag nagtabok ako sa pagpakig-away sa mga Amonhon. Ang Ginoo nagpadaog sa akon batok sa ila. Karon, ngaa bala nagaabot kamo sa pagpakig-away sa akon?”

4Dayon gintipon ni Jepte ang tanan nga mga tawo sang Galaad, kag gin-away ang mga tawo sang Efraim kag ginlutos sila tungod kay nagsiling ang mga Efraimnon, “Kamo nga mga Galaadnon sa Efraim kag Manases, mga lauglaog kamo halin sa Efraim!”

5Gin-agaw sang mga Galaadnon ang mga talabukan sang Suba sang Jordan, agod indi makatabok ang mga Efraimnon. Kon may isa ka Efraimnon nga luyag sa pagpalagyo kag magpangayo sing pahanugot sa pagtabok, ang mga tawo sang Galaad magapamangkot sa iya, “Isa bala ikaw ka Efraimnon?” Kon magsiling sila, “Indi,”

6sugoon nila sia nga magsiling “Sihibolet.” Pero magasiling sia “Sibolet,” tungod kay indi sia sini makasampot sa paghambal. Ila dayon sia dakpon kag patyon didto sa talabukan sang Suba sang Jordan. Sadto nga panahon, 42,000 ka mga Efraimnon ang ginpamatay.

7Si Jepte nga Galaadnon nanginhukom sa Israel sa sulod sang anom ka tuig. Sang ulihi napatay sia kag ginlubong sa iya kaugalingon nga banwa sa Galaad.

8Ang madason kay Jepte, si Ibsan nga taga-Betlehem amo ang nanginhukom sa Israel.

9May traynta sia ka mga anak nga lalaki kag traynta ka anak nga mga babayi. Ginpaban-an niya ang iya mga anak nga babayi sang indi niya kabarangayan, kag nagdala sia sing traynta ka mga babayi nga indi halin sa iya kabarangayan para ipaasawa sa iya mga anak nga lalaki. Nanginhukom si Ibsan sa Israel sa sulod sang pito ka tuig,

10kag sang ulihi napatay sia, kag ginlubong sa Betlehem.

11Ang madason kay Ibsan, amo si Elon nga taga-Zabulon nga nanginhukom sa Israel sa sulod sang napulo ka tuig.

12Kag sang ulihi napatay sia, kag ginlubong sa Ayalon sa duta ni Zabulon.

13Ang madason kay Elon nga nanginhukom sa Israel amo si Abdon nga anak ni Hilel nga taga-Pirathon.

14May kwarenta sia ka mga anak nga lalaki kag traynta ka mga apo nga lalaki nga nagasakay sa setenta ka mga asno. Nanginhukom si Abdon sa Israel sa sulod sang walo ka tuig.

15Kag sang ulihi napatay sia, kag ginlubong sa Pirathon sa duta ni Efraim, sa kabakuloran sang mga Amaleknon.

← Chapter 11 Jump to: Chapter 13 →