Judges 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sa sadto nga adlaw si Debora kag si Barak nga anak ni Abinoam nagkanta sini nga ambahanon:

2Dayawon ang Ginoo! Sang pagpamat-od sang mga Israelinhon nga sila magapakig-away, ang mga tawo nagbulontad sing malipayon.

3Pamati kamo, O mga hari! Talupangda ninyo, O mga pangulo! Magaamba ako kag magalanton sa Ginoo nga Dios sang Israel!

4O Ginoo, sang bayaan mo ang kabukiran sang Seir, sang maglakat ikaw halin sa kadutaan sang Edom, nagtay-og ang duta, kag nag-ulan halin sa kahawaan. Huo, ang mga gal-om nag-ula sang mga tubig.

5Ang mga kabukiran nagkurog sa atubang sang Ginoo sang Sinai, sa atubang sang Ginoo, ang Dios sang Israel.

6Sa mga inadlaw ni Samgar nga anak ni Anat, sa mga inadlaw ni Jael, ang madamo nga mga manlulugayaw wala na mag-agi sa mayor nga dalan, ang mga nagapanglakaton nag-agi sa hilithilit nga mga dalan.

7O Debora, ang mga banwa sang Israel ginpatumbayaan, nagpabilin sila nga wala sing pumoluyo tubtob sa imo pag-abot, nag-abot ikaw subong nga iloy sang Israel.

8Dayon may inaway sa duta sang pagpili sang mga Israelinhon sang bag-o nga mga dios. Sa kwarenta mil ka mga lalaki sa Israel, may yara bala nga nagdala sing taming ukon bangkaw?

9Ang akon tagipusoon yara sa mga pangulo sang Israel, sa mga tawo nga nagbulontad sing malipayon. Dayawon ang Ginoo!

10Isugid ninyo ini, kamo nga nagasakay sa bukay nga mga asno, nga nagalingkod sa mga montora, kag kamo nga kinahanglan maglakat lang sa inyo pagakadtuan.

11Pamatii ninyo ang magahod nga mga tawo sa palibot sang bubon nagasugid sila sang mga pagdaog sang Ginoo, ang mga pagdaog sang mga Israelinhon! Dayon ang mga tawo sang Ginoo nagdulhog halin sa ila mga pwerta.

12Pangulohi, O Debora, pangulohi! Pangulohi! Pangulohi! Amba ka sing ambahanon! Lakat ka, O Barak, anak ni Abinoam, dalha ang imo mga bihag!

13Dayon ang matutom nga mga tawo nagkadto sa ila mga pangulo, ang mga tawo sang Ginoo nagpalapit sa iya nga handa sa pagpakig-away.

14Nagdulhog sila halin sa Efraim pakadto sa kapatagan, nga nagasunod sa tribo ni Benjamin kag sa iya mga kaliwat. Ang mga pangulo nagdulhog halin sa Maquir, ang mga opisyales nagdulhog halin sa Zabulon.

15Ang mga pangulo ni Isacar nag-abot upod kay Debora, huo, si Isacar nag-abot, kag si Barak man. Nagsunod sila sa iya pakadto sa kapatagan. Pero ang tribo ni Ruben nagbinahinbahin, indi sila makapamat-od sa pagpalapit.

16Ngaa nagpabilin sila upod sa mga karnero? Sa pagpamati bala sa mga manugbantay sang karnero nga nagapanawag sa mga panong? Huo, ang tribo ni Ruben nagbinahinbahin, indi sila makapamat-od sa pagpalapit.

17Ang tribo ni Gad nag-estar sa sidlangan sang Jordan, ang tribo ni Dan nagpabilin sa mga sakayan. Ang tribo ni Aser nag-estar malapit sa dagat, nagpabilin sila sa baybayon.

18Pero ang mga kaliwat ni Zabulon kag ni Neftali nagtaya sang ila mga kabuhi sa patag sang pag-awayan.

19Ang mga hari nag-abot kag nagpakig-away sa Taanak, sa higad sang sapa sang Megido. Ang mga hari sang Canaan nagpakig-away, pero wala sila sing may nakuha nga pilak.

20Ang mga bituon halin sa langit nagpakig-away, samtang nagaagi sa ila alagyan sa langit nagpakig-away sila batok kay Sisera.

21Ang baha sa Kison nag-anod sa ila, ang masulog nga Suba sa Kison. Magaabanse kag magaabanse ako nga may kusog!

22Dayon nagtuwak nga nagtuwak ang mga kabayo, nga nagadagubdob ang ila mga tiil sa duta.

23Nagsiling ang anghel sang Ginoo, “Pakamalauta ang Meros, “pakamalauta, pakamalauta ang mga nagaestar didto. Wala sila mag-abot sa pagbulig sa Ginoo, subong mga soldado nga nagapakig-away para sa iya.”

24Ang labing mapalaron sa mga babayi amo si Jael, ang asawa ni Heber nga Kenhanon, ang labing mapalaron sa mga babayi nga nagaestar sa mga tolda.

25Nagpangayo si Sisera sing tubig, pero ginhatagan niya sia sing gatas, gindalhan niya sia sing krema sa matahom nga yahong.

26Sa isa niya ka kamot, nagdala sia sang palpal sang tolda, ang iya tuo nga kamot nag-uyat sang martilyo sang panday, ginpulpog niya si Sisera sa ulo kag nabuka ini, ginpalpalan niya ang iya dungandungan kag gindugmok ini.

27Naglup-og si Sisera. Natumba kag naghamyang sa tiilan ni Jael. Sa iya tiilan naglup-og si Sisera kag natumba, natumba sia sa duta kag napatay.

28Ang iloy ni Sisera naglantaw sa bintana, sa likod sang mga birha nagpanalambiton sia: “Ngaa atrasado ang pag-abot sang iya karwahi? Ngaa bala kadugay magbalik sang iya mga kabayo?”

29Ang iya labing maalam nga mga dama nagsabat sa iya, kag ginsingganan niya sing liwatliwat ang iya kaugalingon:

30“Nagapangita lamang sila sing mga maagaw, kag mabahinbahin, isa ukon duha ka dalaga para sa tagsa ka soldado, malahalon nga bayu para kay Sisera, binordahan nga mga panapton para sa liog sang rayna.”

31Gani, O Ginoo, kabay nga magkalamatay ang tanan mo nga mga kaaway, pero kabay ang imo mga abyan manginsubong sang adlaw sa iya pagbutlak! Kag nagluntad ang paghidait sa duta sa sulod sang kwarenta ka tuig.

← Chapter 4 Jump to: Chapter 6 →