Judges 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Ang mga Israelinhon nagpakasala liwat batok sa Ginoo, kag iya sila ginpagamhan sa mga Filistinhon sa sulod sang kwarenta ka tuig.

2Sa sadto nga tion may isa ka tawo nga ginhingalanan kay Manoa, nga taga-Zora, kag isa sia ka katapo sang tribo ni Dan. Ang iya asawa wala gid makapamata.

3Nagpakita ang anghel sang Ginoo sa iya kag nagsiling, “Wala gid ikaw makapamata, pero sa indi madugay magabusong ikaw kag magaanak sing isa ka bata nga lalaki.

4Tandaan mo nga indi ka gid mag-inom sing bino ukon makahulobog nga ilimnon, ukon magkaon sang ginadilian nga mga pagkaon.

5Sa tapos mabun-ag ang imo anak nga lalaki, indi mo sia pagguntingan sang iya buhok, tungod kay sa adlaw sang iya pagkatawo, pagaihalad sia sa Dios subong isa ka Nazareo. Sia ang magasugod sa pagluwas sa Israel gikan sa mga Filistinhon.”

6Dayon nagkadto ang babayi sa iya bana kag ginsugiran sia, “Nagkadto sa akon ang isa ka tawo sang Dios, kag ang iya dagway makakulogmat pareho sang anghel sang Dios. Wala ako magpamangkot sa iya kon diin sia maghalin, kag wala man sia magsugid sa akon sang iya ngalan.

7Pero nagsiling sia sa akon nga magabusong ako kag makaangkon sing anak nga lalaki. Ginsingganan man niya ako nga indi mag-inom sing bino ukon makahulobog nga ilimnon, ukon magkaon sang ginadilian nga mga pagkaon, tungod kay ang bata pagaihalad sa Dios subong isa ka Nazareo halin sa iya pagkatawo tubtob mapatay sia.”

8Dayon nagpangamuyo si Manoa sa Ginoo, “ Ginoo, kon mahimo, pabalika sa amon ang tawo sang Dios nga imo ginpadala, kag sugiri kami kon ano ang dapat namon himuon sa bata sa iya pagkatawo.”

9Ginhimo sang Dios ang ginpangayo ni Manoa, kag ang anghel sang Dios nagbalik sa babayi sang nagalingkod sia sa latagon, pero si Manoa nga iya bana wala didto kaupod niya.

10Gani nagdalagan sia gilayon sa pagsugid sa iya bana, “Abi mo, ang tawo nga nagkadto sa akon sang isa ka adlaw, nagpakita liwat sa akon.”

11Nagtindog si Manoa kag nag-upod sa iya asawa. Ginkadtuan niya ang tawo kag ginpamangkot, “Ikaw bala ang tawo nga naghambal sa akon asawa?” Nagsabat sia, “Huo.”

12Dayon nagsiling si Manoa, “Gani karon, kon ang imo ginsiling matuod, ano bala ang pagginawi sang bata? Ano bala ang iya pagahimuon?”

13Nagsabat ang anghel sang Ginoo kay Manoa, “Kinahanglan tumanon sang imo asawa ang tanan nga akon ginsiling sa iya.

14Indi sia magkaon sang bisan ano nga nagahalin sa balagon sang ubas. Indi sia mag-inom sing bino ukon makahulobog nga ilimnon, ukon magkaon sang ginadilian nga mga pagkaon. Kinahanglan tumanon niya ang tanan nga akon ginsiling sa iya.”

15Si Manoa nga wala makahibalo nga isa sia ka anghel sang Ginoo, nagsiling sa iya, “Kon mahimo indi ka anay maglakat. Maluto pa kami sing tinday nga kanding para sa imo.” Pero nagsiling ang anghel sa iya, “Kon magpabilin ako, indi ako magkaon sang imo pagkaon. Pero kon luyag ka mag-aman sina, sunoga ina subong nga halad sa Ginoo.”

17Nagsiling si Manoa sa anghel, “Sugiri kami sang imo ngalan, agod mapasidunggan namon ikaw kon magmanginmatuod ang imo ginsiling.”

18Nagpamangkot ang anghel sa iya, “Ngaa bala luyag mo gid mahibaluan ang akon ngalan? Isa ini ka katingalahan.”

19Gani nagkuha si Manoa sing tinday nga kanding kag mga uyas, kag ginhalad ini sa ibabaw sang altar nga bato para sa Ginoo nga nagahimo sang mga katingalahan.

20Samtang nagapaibabaw ang dabdab sang kalayo halin sa altar, nakita ni Manoa kag sang iya asawa ang anghel sang Ginoo nga nagapaibabaw pakadto sa langit sa mga dabdab. Dayon naghapa sila sa duta. Kag nahibaluan ni Manoa nga yadto nga tawo amo ang anghel sang Ginoo. Wala na gid liwat makita ni Manoa kag sang iya asawa ang anghel.

22Nagsiling si Manoa sa iya asawa, “Mapatay gid kita, tungod kay nakita naton ang Dios!”

23Pero ang iya asawa nagsabat, “Kon luyag sang Ginoo nga patyon kita, wala niya kuntani pagbatuna ang aton mga halad. Wala niya kuntani ginpakita ini tanan nga butang sa aton, ukon ginsugiran sini tanan nga butang sa sini nga tion.”

24Ang babayi nag-anak sang isa ka bata nga lalaki, kag ginhingalanan niya sia kay Samson. Nagdaku ang bata kag ginbendisyunan sia sang Ginoo.

25Kag ang Espiritu sang Ginoo nagsugod sa pagpanghikot sa iya, samtang didto sia sa Kampo ni Dan, sa gintung-an sang Zora kag Estaol.

← Chapter 12 Jump to: Chapter 14 →