Judges 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sang mapatay si Ehud ang mga Israelinhon nagpakasala liwat batok sa Ginoo.

2Gani ginpalutos sila sang Ginoo kay Jabin, ang hari nga Canaanhon nga naggahom sa siudad sang Hasor. Ang heneral sang iya mga hangaway amo si Sisera, nga nag-estar sa Haroset-sang-mga-Hentil.

3Si Jabin may 900 ka mga karwahi nga salsalon, kag naggahom sa mga tawo sang Israel sing mapintas kag mapiguson sa sulod sang baynte ka tuig. Dayon ang mga tawo sang Israel nagpangayo sing bulig sa Ginoo.

4Karon si Debora nga asawa ni Lapidot, isa ka propeta nga babayi, amo ang nagahukom sa mga Israelinhon sa sadto nga panahon.

5Sa tungatunga sang Rama kag Betel sa kabakuloran sang Efraim, si Debora nagapungko sa idalom sang palma sa diin ang mga tawo sang Israel nagakadto sa iya agod hukman niya.

6Isa ka adlaw, ginpatawag niya si Barak nga anak ni Abinoam halin sa siudad sang Kedes sa Neftali, kag ginsingganan, “Ang Ginoo, ang Dios sang Israel, nagsugo sa imo: ‘Kuha ka sing 10,000 ka mga tinawo gikan sa mga tribo ni Neftali kag ni Zabulon kag dalha sila sa Bukid sang Tabor.

7Pakadtuon ko si Sisera, ang heneral sang mga hangaway ni Jabin sa pagpakig-away batok sa inyo sa Suba sang Kison. May mga karwahi sia kag mga soldado, pero padag-on ko kamo batok sa iya.’”

8Si Barak nagsabat kay Debora, “Malakat ako kon mag-upod ka sa akon, pero kon indi ka mag-upod sa akon, indi man ako maglakat.”

9Nagsabat si Debora, “Sigi, updan ko ikaw, pero indi mangin-imo ang kadungganan sang pagdaog, tungod kay itugyan sang Ginoo si Sisera sa kamot sang isa ka babayi.” Gani nag-upod si Debora kay Barak pakadto sa Kedes.

10Ginpatawag ni Barak ang mga tribo nanday Zabulon kag Neftali sa Kedes, kag 10,000 ka mga tawo ang nag-upod sa iya. Nag-upod man sa iya si Debora.

11Karon si Heber nga Kenhanon nagpatindog sang iya tolda malapit sa Kedes, malapit sa kahoy nga terebinto sa Saanamin. Nagbulag sia sa iban nga mga Kenhanon nga mga kaliwat ni Hobab, ang ugangan nga lalaki ni Moises.

12Sang ginsugiran si Sisera nga si Barak nga anak ni Abinoam nagtaklad sa Bukid sang Tabor,

13gintipon ni Sisera ang iya 900 ka mga karwahi nga salsalon kag ang tanan niya nga mga tinawo, kag ginpalakat sila halin sa Haroset-sang-mga-Hentil pakadto sa Suba sang Kison.

14Dayon si Debora nagsiling kay Barak, “Lakat ka! Amo ini ang adlaw nga padag-on ka sang Ginoo batok kay Sisera. Ang Ginoo magauna sa imo!” Gani nagdulhog si Barak halin sa Bukid sang Tabor upod sa iya 10,000 ka mga tinawo.

15Sang magsalakay si Barak upod sa iya mga hangaway, ginpasalasala sang Ginoo si Sisera, ang iya mga karwahi kag ang iya mga tinawo. Naglumpat si Sisera sa iya karwahi kag nagdalagan sa pagpalagyo.

16Ginlagas ni Barak ang mga karwahi kag mga hangaway tubtob sa Haroset-sang-mga-Hentil. Ang tanan nga mga hangaway ni Sisera nagkalamatay, kag wala gid sing isa nga nabilin.

17Nagpalagyo si Sisera pakadto sa tolda ni Jael nga asawa ni Heber nga Kenhanon, tungod kay si Jabin nga hari sang Hasor, kag ang panimalay ni Heber nagaayuhay.

18Naggwa si Jael sa pagsugata kay Sisera, kag nagsiling sa iya, “Heneral, dayon ka kag magsulod sa akon tolda. Indi ka magkahadlok.” Gani nagsulod si Sisera, kag gintago niya sia sa likod sang kurtina.

19Nagsiling si Sisera kay Jael, “Palihog hatagi ako sing tubig nga mainom, kay nauhaw ako.” Gin-abrihan ni Jael ang panit nga nasudlan sang gatas kag ginpainom niya si Sisera, kag gintago sia liwat.

20Dayon ginsingganan sia ni Sisera, “Tindog ka sa pwertahan sang tolda, kag kon may mag-abot kag magpamangkot kon may tawo diri, singganon mo nga wala.”

21Tungod kay kapoy gid kaayo si Sisera, natulogan sia sing hamuok gid. Dayon si Jael nagkuha sing martilyo kag isa ka palpal sang tolda, kag ginpalapitan niya sing hinayhinay si Sisera kag ginpalpalan niya ang dungandungan ni Sisera tubtob naglapos ini sa duta. Kag napatay si Sisera.

22Sang pag-abot ni Barak nga nagapangita kay Sisera, naggwa si Jael sa pagsugata sa iya, kag nagsiling sa iya, “Dali, ipakita ko sa imo ang tawo nga imo ginapangita.” Gani nag-upod sia kay Jael sa sulod sang tolda, kag yadto didto si Sisera nga nagahamyang sa duta nga patay na nga ang palpal sang tolda naglapos sa iya ulo.

23Sadto nga adlaw ginpadaog sang Dios ang mga Israelinhon batok kay Jabin nga hari sang mga Canaanhon.

24Gindusdos kag gindusdos sang mga Israelinhon si Jabin, tubtob nalutos nila sia.

← Chapter 3 Jump to: Chapter 5 →