Judges 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Ang mga tawo sang Israel nagpakasala liwat batok sa Ginoo, gani ginpagamhan sila sang Ginoo sa mga tawo sang Midian sa sulod sang pito ka tuig.

2Ang mga Midianhon mas makusog pa sang sa mga Israelinhon, kag ang mga tawo sang Israel nagpalagyo sa mga kweba kag sa iban nga mga lugar sa mga kabukiran agod indi sila maano.

3Kon magtanom ang mga Israelinhon, ginakadtuan sila sang mga Midianhon upod sang mga Amaleknon kag sang mga tribo sa desierto sa pagsalakay sa ila.

4Nagahimo sila sang ila kampo sa amo nga duta kag nagalaglag sang mga tanom sang mga Israelinhon tubtob sa bagatnan sa mga lugar sa palibot sang Gaza. Ginadala nila ang tanan nga mga karnero, mga baka kag mga asno kag wala gid sila sing ginabilin nga palangabuhian para sa mga Israelinhon.

5Nagaabot sila nga dala ang ila mga kasapatan kag mga tolda nga daw subong kadamo sang mga apan. Sila kag ang ila mga kamelyo tama kadamo nga indi maisip. Nag-abot sila sa paglaglag sang duta,

6kag ang mga Israelinhon indi makasarang sa ila. Dayon ang mga tawo sang Israel nagpanawag sa Ginoo sa pagpangayo sing bulig.

7Sang pagpanawag sang mga Israelinhon sa Ginoo tungod sang mga Midianhon,

8ang Ginoo nagpadala sa ila sing isa ka propeta nga nagdala sa ila sini nga mensahe halin sa Ginoo, ang Dios sang Israel: “Ginpagwa ko kamo halin sa Ehipto sa diin gin-ulipon kamo.

9Ginluwas ko kamo sa mga Ehiptohanon kag sa tanan nga nagpakig-away batok sa inyo sa sini nga duta. Gintabog ko sila samtang nagaabanse kamo, kag ginhatag ko sa inyo ang ila kadutaan.

10Nagsiling ako sa inyo nga ako amo ang Ginoo nga inyo Dios, kag nga indi kamo magsimba sa mga dios sang mga Amornon, nga ang ila duta amo ang inyo ginaestaran karon. Pero wala kamo magpamati sa akon.”

11Karon nag-abot ang anghel sang Ginoo sa barangay sang Opra kag nagpungko sa idalom sang kahoy nga terebinto nga iya ni Joas, isa ka tawo nga naghalin sa panimalay ni Abieser. Ang iya anak nga si Gideon nagalinas sang trigo sing tago lang sa pulogaan sang ubas, agod matago ini sa mga Midianhon.

12Dayon ang anghel sang Ginoo nagpakita sa iya kag nagsiling, “Maisog kag makusog nga tawo, ang Ginoo kaupod mo!”

13Nagsiling si Gideon sa iya, “Abi mamangkot ako sa imo, sir, ngaa bala nahanabo ini tanan sa amon kon ang Ginoo kaupod namon? Ano ang natabo sa tanan nga makatilingala nga mga butang nga ginsugid sang amon mga ginikanan nga mga ginhimo anay sang Ginoo —pareho abi sang iya pagpagwa sa ila sa Ehipto? Ginpatumbayaan kami sang Ginoo kag ginpabay-an niya kami sa mga Midianhon.”

14Dayon ginmanduan sia sang Ginoo, “Lakat sa bug-os mo nga kusog, kag luwasa ang Israel sa mga Midianhon. Ako gid ang nagapadala sa imo.”

15Kag nagsabat si Gideon, “Pero Ginoo, ano ang pagluwas ko sang Israel? Ang akon panimalay amo ang labing mapigaw sa tribo ni Manases, kag ako amo ang labing kubos sa amon panimalay.”

16Kag ang Ginoo nagsabat sa iya, “Mahimo mo ini tungod kay ako magabulig sa imo. Pagalaglagon mo ang mga Midianhon subong nga sila daw isa lang ka tawo.”

17Nagsabat si Gideon, “Kon nahamuot ka sa akon, pamatud-i sa akon nga ikaw gid ang nagahambal Ginoo.

18Kon mahimo indi ka anay maghalin tubtob magbalik ako kag makadulot sa imo sing halad nga kalan-on.” Nagsiling sia, “Magapabilin ako tubtob sa imo pagbalik.”

19Gani nagpauli si Gideon kag nagluto sing tinday nga kanding, kag nagkuha sia sing tunga sa sako nga harina kag naghimo sing tinapay nga wala sing lebadora. Ginbutang niya ang karne sa basket kag ang sabaw sa kaldero, kag gindala ini sa anghel sang Ginoo sa idalom sang kahoy nga terebinto, kag ginhatag sa iya.

20Ginsingganan sia sang anghel, “Ibutang ang karne kag tinapay sa sini nga igang, kag ibubo ang sabaw sa ibabaw sini.” Kag gintuman niya ini.

21Dayon gindab-ot ini sang anghel sang Ginoo, gintandog ang karne kag ang tinapay sang punta sang sungkod nga iya ginauyatan. Naggwa ang kalayo sa bato kag nagsunog sang karne kag tinapay. Dayon ang anghel sang Ginoo nadula.

22Dayon natalupangdan ni Gideon nga ang iya nakita amo ang anghel sang Ginoo, kag sa may kahadlok nagsiling sia, “O Ginoo nga Gamhanan, nakita ko ang imo anghel kag nag-atubangay gid kami!”

23Pero ang Ginoo nagsiling sa iya, “Ang paghidait manginyara sa imo. Indi ka magkahadlok. Indi ka mapatay.”

24Nagpatindog si Gideon sing altar didto para sa Ginoo, kag gintawag ini, “Ang Ginoo amo ang Paghidait.” Yara pa ini tubtob karon didto sa Opra nga iya sang kabarangayan ni Abieser.

25Sadto nga gab-i nagsiling ang Ginoo kay Gideon, “Kuhaa ang toro nga baka sang imo amay, kag ang isa pa gid ka toro nga baka nga pito ka tuig ang kagulangon, kag gub-a ang altar nga ginpatindog sang imo amay para kay Baal, kag tapsa ang haligi sang diosa nga si Asera nga yara sa tupad sini.

26Magpatindog ka sing nagakabagay nga altar para sa Ginoo nga imo Dios sa ibabaw sini nga pamakod. Dayon kuhaa ang ikaduha nga toro nga baka kag sunoga ini sing bug-os subong nga halad. Gamita nga gatong sa halad ang haligi ni Asera nga imo gintapas.”

27Gani nagkuha si Gideon sing napulo sang iya mga ulipon kag gintuman ang ginsiling sang Ginoo sa iya. Nahadlok gid sia sa paghimo sini sa adlaw tungod sang iya panimalay kag sa mga tawo sa banwa, gani ginhimo niya ini sa gab-i.

28Aga pa sang pagmata sang mga tawo sang madason nga adlaw, nasapwan nila nga ginguba ang altar ni Baal kag ang haligi ni Asera gintapas, kag ginsunog ang ikaduha nga baka sa altar nga ginpatindog didto.

29Nagpinamangkutanay sila kon sin-o ang naghimo sini. Gin-usisa nila kag ila nahibal-an nga si Gideon nga anak ni Joas amo ang naghimo sini.

30Dayon ginsingganan nila si Joas, “Itugyan sa amon ang imo anak, agod patyon namon sia! Ginguba niya ang altar ni Baal, kag gintapas niya ang haligi ni Asera sa tupad sini.”

31Pero nagsiling si Joas sa tanan nga nagsukna sa iya, “Nagapakigbais bala kamo tungod kay Baal? Ginapangapinan bala ninyo sia? Ang bisan sin-o nga magapakigbais tungod sa iya pagapatyon sa wala pa mag-aga. Kon isa ka dios si Baal, paapina sia sa iya kaugalingon, kay ang iya altar amo ang ginguba.”

32Sugod sadto si Gideon ginkilala nga si Jerubaal, tungod kay si Joas nagsiling, “Paapina si Baal sa iya kaugalingon, kay ang iya altar amo ang ginguba.”

33Dayon nagtipon sing tingob ang tanan nga mga Midianhon, mga Amaleknon, kag mga tribo sa desierto. Nagtabok sila sa Suba sang Jordan, kag nagpatindog sang ila mga tolda sa Kapatagan sang Jezreel.

34Ang Espiritu sang Ginoo naggahom kay Gideon kag nagpatunog sia sing budyong sa pagpanawag sang mga kalalakin-an sang kabarangayan ni Abieser sa pagsunod sa iya.

35Nagpadala sia sing mga mensahero sa bug-os nga kadutaan sang tribo ni Manases sa pagtawag sa ila sa pagsunod sa iya. Nagpadala sia sing mga mensahero sa mga tribo nanday Aser, Zabulon, kag Neftali, kag nag-abot man sila sa pag-upod sa iya.

36Karon nagsiling si Gideon sa Dios, “Nagsiling ka nga nagpamat-od ka nga gamiton ako sa pagluwas sang Israel.

37Yari karon, magabutang ako sing delana sa duta nga ginalinasan namon sang trigo. Pagkaaga kon may tun-og sa delana lamang kag ang duta mamala, ti mahibal-an ko nga gamiton mo ako sa pagluwas sang Israel.”

38Kag amo gid ini ang natabo. Sang pagmata ni Gideon aga pa gid sa madason nga adlaw, ginpuga niya ang delana, kag may natipon sia nga tun-og nga nagpuno sang isa ka yahong.

39Karon nagsiling si Gideon sa Dios, “Indi ka lang magkaakig sa akon, amo na lang ini ang akon ipangabay. Kon mahimo, tugoti ako sa pagpangayo sang isa pa ka pagpamatuod paagi sa delana sa sini nga kahigayunan, ang delana indi pagbas-a, kag ang tun-og magabasa sang duta lamang.”

40Sadto nga gab-i, ginhimo gid ini sang Dios. Sang pagkaaga, ang delana lamang ang mamala, pero ang duta nabasa sing tun-og.

← Chapter 5 Jump to: Chapter 7 →