Judges 21

Ilonggo (Maayong Balita nga Biblia (2012))

← Chapter 20 Jump to:

1Karon ang mga tawo sang Israel nagpanumpa sa Ginoo didto sa Mispa nga nagasiling, “Wala gid sing isa sa amon nga magatugot sang isa ka Benjaminhon sa pagpangasawa sang amon anak nga babayi.”

2Nagkadto sa Betel ang mga tawo sang Israel, kag nagpungko didto sa atubang sang Dios tubtob sa gab-i. Naghinibi sila sing tudo gid kag nagpanalambiton.

3Nagsiling sila, “O Ginoo, ang Dios sang Israel, ngaa bala natabo ini? Ngaa nga nakulangan sing isa ka tribo ang Israel?”

4Nagbangon ang mga tawo sing aga pa gid sang madason nga adlaw, kag nagpatindog sing altar didto. Nagdulot sila sing mga halad sang paghiambit kag sang mga halad nga sinunog.

5Nagpamangkot sila, “Sa tanan nga tribo sang Israel, may yara bala nga tribo nga wala mag-abot sa sining pagkatipon sa atubang sang Ginoo sa Mispa?” Nagpanumpa sila nga ang bisan sin-o nga wala magpalapit sa Ginoo sa Mispa pagapatyon.

6Pero ang mga Israelinhon nagpangasubo tungod sang ila mga kautoran nga Benjaminhon. Nagsiling sila, “Karon nga adlaw nadulaan ang Israel sang isa sang iya mga tribo.

7Ano bala ang aton himuon sa paghatag sing mga asawa para sadtong mga lalaki nga nabilin nga buhi sa tribo ni Benjamin? Nakapanumpa na kita sa Ginoo, nga indi kita maghatag sa ila bisan isa sang aton mga anak nga babayi.”

8Dayon nagpamangkot sila, “Sa tanan nga tribo sang Israel, ano bala ang wala magpalapit sa Ginoo sa Mispa?” Nasapwan nila nga wala gid sing isa nga naghalin sa Jabes, sa Galaad, nga nag-abot sa pagpakigbahin sa pagtililipon.

9Sang gintipon sing tingob ang tanan nga mga tawo, wala sing isa halin sa Jabes nga yadto didto.

10Gani ang katilingban nagpadala sing 12,000 sang ila pinakamaisog nga mga hangaway nga may mga sugo sa ila nga nagasiling, “Lakat kamo kag pamatyon ang tagsatagsa sa Jabes, lakip ang mga kababayin-an kag mga kabataan.

11Amo ini ang himuon ninyo: pamatyon ninyo ang tanan nga lalaki, kag ang tagsa ka babayi nga indi na birhen.”

12Nakakita sila sing 400 ka pamatan-on nga mga babayi nga birhen sa mga tawo sang Jabes, gani gindala nila sila sa kampo sa Silo nga yara sa duta sang Canaan.

13Dayon ang bug-os nga katilingban nagpadala sing mensahe sa mga Benjaminhon nga yadto didto sa Igang sang Rimon, kag nagpangabay sa ila sa pag-untat sang inaway.

14Nagbalik ang mga Benjaminhon, kag ang iban nga mga Israelinhon naghatag sa ila sang mga pamatan-on nga mga babayi halin sa Jabes, nga wala nila ginpamatay. Pero kulang ining kababayin-an para sa ila.

15Nagkasubo ang mga tawo tungod sang mga Benjaminhon, tungod kay ang Ginoo nagguba sang paghiliusa sang mga tribo sang Israel.

16Gani ang mga pangulo sang katilingban nagsiling, “Wala na sing kababayin-an sa tribo ni Benjamin. Ano bala ang aton himuon sa paghatag sing mga asawa para sa kalalakin-an nga nabilin?

17Indi dapat madulaan ang Israel sang isa sang iya dose ka mga tribo. Kinahanglan magpangita kita sing paagi para indi mapapas ang tribo ni Benjamin,

18pero indi kita makapahanugot nga ipaasawa sa ila ang aton mga anak nga babayi.” Ginsiling nila ini tungod, kay ang mga Israelinhon nagsumpa sa pagpakamalaut sa kay bisan sin-o nga magpahanugot sa isa ka Benjaminhon sa pagpangasawa sang isa sang iya mga anak nga babayi.

19Dayon nadumdoman nila, “Madali na lang ang tuigan nga piesta sang Ginoo sa Silo nga yara sa aminhan sang Betel, sa bagatnan sang Lebona, kag sa nasidlangan sang dalan sa gintung-an sang Betel kag Siquem.”

20Ginsingganan nila ang mga Benjaminhon, “Lakat kamo kag magpanago sa mga talamnan sang ubas,

21kag magbantay. Kon maggwa ang pamatan-on nga mga babayi sang Silo sa pagsaot sa tion sang ila piesta, maggwa dayon kamo sa mga talamnan sang ubas. Ang kada-isa sa inyo magkuha gikan sa mga babayi sang mangin-asawa niya paagi sa palugos, kag dalha ninyo sila pabalik sa kadutaan sang tribo ni Benjamin.

22Kon magkadto sa amon ang ila mga amay ukon kautoran nga lalaki sa pagreklamo, singganan namon sila, ‘Kon mahimo ihatag lang sila sa amon, tungod kay wala man namon sila pagkuhaa halin sa inyo paagi sa inaway agod mangin-amon mga asawa. Kag tungod kay wala man ninyo sila pag-ihatag sa amon, wala man kamo makalapas sa inyo saad.’”

23Ginhimo ini sang mga Benjaminhon. Ang kada-isa sa ila nagpili sang iya asawa gikan sa pamatan-on nga mga kababayin-an nga nagsaot sa Silo, kag gindala sila sa pagpalagyo. Dayon nagbalik sila sa ila kaugalingon nga kadutaan, kag ginpatindog liwat ang ila mga banwa kag nag-estar didto.

24Sa amo man nga tion, ang iban nga mga Israelinhon nga yadto pa didto naghalin, kag ang tagsatagsa ka tawo nagpauli sa iya kaugalingon nga tribo kag panimalay.

25Wala sing hari sa Israel sadto nga panahon. Ang tagsatagsa nagpagusto lang sang iya luyag himuon.

← Chapter 20 Jump to: