Judges 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Ang anghel sang Ginoo nagkadto sa Bokim halin sa Gilgal, kag nagsiling sa mga Israelinhon, “Ginpagwa ko kamo sa Ehipto kag gindala sa duta nga ginsaad ko sa inyo mga katigulangan. Nagsiling ako, ‘Indi ko gid paglapason ang akon kasugtanan sa inyo.

2Indi gid kamo maghimo sing kasugtanan sa mga pumoluyo sini nga duta. Kinahanglan panggub-on ninyo ang ila mga altar.’ Pero wala ninyo pagtumana ang akon ginsiling sa inyo. Tan-awa kon ano ang ginhimo ninyo sa baylo sini!

3Gani ginasingganan ko kamo karon nga indi ko pagtabugon ini nga mga tawo samtang nagaabanse kamo. Sila manginkaaway ninyo, kag ang ila mga diosdios mangindaku nga mga pagsulay sa inyo.”

4Sang pagsiling sini sang anghel, naghinibi ang tanan nga mga tawo sang Israel.

5Tungod sini, yadto nga lugar gintawag Bokim. Didto nagdulot sila sing mga halad sa Ginoo.

6Ginpalakat ni Josue ang mga tawo sang Israel, kag ang tagsatagsa nagpanag-iya sang iya kaugalingon nga bahin sang duta.

7Ang mga tawo sang Israel nag-alagad sa Ginoo samtang buhi pa si Josue kag ang mga katigulangan nga nagkabuhi pa sing malawig kay Josue kag nakakita sang tanan nga ginhimo sang Ginoo sa Israel.

8Si Josue, ang anak ni Nun kag alagad sang Ginoo, napatay sa edad nga 110 ka tuig.

9Ginlubong sia sa duta nga iya parti, sa Timnat-heres, sa kabakuloran sang Efraim, sa aminhan sang Bukid sang Gaas.

10Nagkalamatay man ang tanan nga tawo sadto nga kaliwatan, kag ang madason nga kaliwatan nalipat sa Ginoo kag sang mga butang nga iya ginhimo sa Israel.

11Dayon ang mga tawo sang Israel nagpakasala batok sa Ginoo kag nag-alagad sa mga Baal.

12Nag-untat sila sa pagsimba sa Ginoo, ang Dios sang ila nga mga katigulangan, ang Dios nga nagpagwa sa ila sa Ehipto. Nagsimba sila sa iban nga mga dios, ang mga dios sang mga katawhan sa palibot nila. Nagsimba sila sa sini nga mga dios kag ginpaakig nila ang Ginoo.

13Nag-untat sila sa pagsimba sa Ginoo kag nag-alagad sa mga Baal kag sa mga Astarot.

14Gani naakig gid ang Ginoo sa Israel kag ginpasalakay sila sa mga buyong nga nagkuha sang ila mga pagkabutang. Ginpalutos sila sang Ginoo sa tanan nila nga mga kaaway sa palibot nila, kag ang mga Israelinhon indi na makasarang sa pag-apin sang ila kaugalingon.

15Sa tagsa ka pagpakig-away nila, ang Ginoo nagasumpong sa ila, subong sang ginsiling sang Ginoo nga iya pagahimuon. Tama gid ang ila mga pag-antos.

16Dayon ginhatagan sang Ginoo ang Israel sing mga hukom nga nagluwas sa ila sa mga nagagubat sa ila.

17Pero ang mga Israelinhon wala magsapak sa sini nga mga hukom. Wala sila nagmatutom sa Ginoo, kag nagsimba sila sa iban nga mga dios. Ang ila mga ginikanan nagtuman sang mga ginsugo sang Ginoo, pero ining bag-o nga kaliwatan nag-untat sa pagtuman sini.

18Kon hatagan sila sang Ginoo sing isa ka hukom, ang Ginoo nagabulig sa iya, kag nagaluwas sang mga tawo sa ila mga kaaway tubtob buhi pa ini nga pangulo. Ang Ginoo nagkaluoy sa ila tungod sang ila mga pag-ugayong sa ila mga pag-antos kag sa mga pagpigos sa ila.

19Pero kon mapatay ang ila hukom, nagabalik ang mga tawo sa ila daan nga mga pagginawi, kag nagahimo sing sobra pa kalain sang sa nagligad nga kaliwatan. Nagasunod sila sa iban nga mga dios, nagaalagad kag nagasimba sila sa ila. Nagpadayon sila sa pagkabatinggilan, nga nagahimo sing mga kalautan.

20Gani ang Ginoo naakig gid sa Israel, kag nagsiling, “Ini nga pungsod naglapas sang kasugtanan nga akon ginsugo nga tumanon sang ila mga katigulangan. Tungod kay wala sila magtuman sa akon,

21indi ko na pagtabugon ang mga tawo sang bisan ano nga pungsod nga yadto pa didto sa duta sang pagkapatay ni Josue.

22Sa sini nga paagi matilawan ko kon bala tumanon sang mga Israelinhon ukon indi ang akon mga sugo, subong sang ginhimo sang ila mga katigulangan.”

23Gani gintugotan sang Ginoo nga magpabilin ang mga tawo sang mga pungsod nga wala niya gintugyan sa paggahom ni Josue kag wala man niya sila pagtabuga sa gilayon sa tapos mapatay si Josue.

← Chapter 1 Jump to: Chapter 3 →