Judges 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Isa ka adlaw si Gideon (nga ginatawag man Jerubaal) kag ang tanan niya nga mga tinawo nagbugtaw sing aga pa gid, kag naghimo sang ila kampo sa higad sang Tuboran sang Harod. Ang kampo sang mga Midianhon yara sa kapatagan sa aminhan nila, sa tupad sang Bakulod sang More.

2Ang Ginoo nagsiling kay Gideon, “Tama kadamo ang mga tawo nga kaupod mo para sa akon sa paglutos sa mga Midianhon. Basi maghunahuna sila nga sila ang naglutos sang mga Midianhon, kag indi na sila magkilala nga ako ang nagpadaog sa ila.

3Ipahibalo sa mga tawo nga kon sin-o ang nahadlok, maghalin sia sa Bukid sang Galaad kag magpauli.” Gani 22,000 ang nagpauli, pero 10,000 ang nagpabilin.

4Dayon ang Ginoo nagsiling kay Gideon, “Tama pa gid kadamo sang imo mga tinawo. Dalha sila sa tubig, kag painon ko sila didto para sa imo. Ang bisan sin-o nga isiling ko sa imo nga paupdon mo, paupda. Ang bisan sin-o nga isiling ko sa imo nga indi pagpaupdon, indi pagpaupda.”

5Gindala ni Gideon ang mga tawo sa tubig, kag ginsingganan sia sang Ginoo, “Paina ang mga nagalaklak sang tubig pareho sang ido, gikan sa mga nagaduko kag nagaluhod sa pag-inom.”

6May 300 ka mga tawo nga nagsandok sang tubig sa ila mga kamot kag naglaklak sini. Ang iban iya nagduko kag nagluhod sa pag-inom.

7Nagsiling ang Ginoo kay Gideon, “Pagaluwason ko kamo kag padag-on batok sa mga Midianhon paagi sa sining 300 ka mga tawo nga naglaklak sang tubig. Singgana ang iban nga magpauli.”

8Ginpapauli ni Gideon ang tanan nga mga Israelinhon, luas lamang ang 300 ka mga tawo, pero ginhawiran niya ang ila mga balon kag mga trumpeta. Ang kampo sang mga Midianhon yara sa ubos nila sa kapatagan.

9Sadto nga gab-i, nagmando ang Ginoo kay Gideon, “Bangon ka, salakaya ang kampo kay padag-on ko ikaw batok sa ila.

10Pero kon nahadlok ka sa pagsalakay sa ila, dulhog ka sa kampo sang mga Midianhon upod sa imo suloguon nga si Pura.

11Mabatian mo ang ila mga ginahambal, kag magaisog ka sa pagsalakay sang kampo.” Gani si Gideon kag ang iya suloguon nga si Pura nagdulhog pakadto sa malapit gid nga bahin sang kampo sang mga kaaway.

12Ang mga Midianhon, mga Amaleknon, kag ang mga tribo sa desierto nagalapta sa kapatagan subong sang nagadulom nga mga apan, kag may mga kamelyo sila nga subong kadamo sang mga balas sa baybayon.

13Sang pag-abot ni Gideon, nabatian niya ang isa ka tawo nga nagasugid sa iya abyan nahanungod sang iya damgo. Nagsiling ang tawo, “Nagdamgo ako nga may isa ka bilog nga tinapay nga sebada nga nagligid sa aton kampo. Nagbunggo ini sa tolda, kag ang tolda natumba, nagbaliskad, kag naghaplak sa duta.”

14Ang iya abyan nagsabat, “Espada ini ni Gideon, ang Israelinhon nga anak ni Joas! Wala na ini sing iban pa nga kahulogan! Padag-on sia sang Dios batok sa mga Midianhon, kag sa aton bug-os nga hangaway!”

15Sang pagkabati ni Gideon nahanungod sang damgo sang tawo kag sang kahulogan sini nagluhod sia kag nagsimba sa Ginoo. Dayon nagbalik sia sa kampo sang mga Israelinhon kag nagsiling, “Magbangon kamo! Ang Ginoo magapadaog sa inyo batok sa mga hangaway sang mga Midianhon!”

16Ginpartida niya ang iya 300 ka mga tinawo sa tatlo ka grupo, kag ginhatagan niya ang tagsa ka tawo sing isa ka trumpeta kag isa ka tibod nga may mitsa sa sulod sini.

17Ginsingganan niya sila, “Tan-awa ninyo ako, kag sunda ninyo kon ano ang himuon ko kon makaabot ako sa malapit gid nga bahin sang kampo sang kaaway.

18Kon ako kag ang akon grupo magpatunog sang amon mga trumpeta, patunoga man ninyo dayon ang inyo mga trumpeta sa tanan nga palibot sang kampo kag magsinggit, ‘Para sa Ginoo kag kay Gideon!’”

19Si Gideon kag ang 100 niya ka mga tinawo nagkadto sa malapit gid nga bahin sang kampo sang kaaway sang madali na lang magtungang gab-i, sa tapos gid lang maislan ang gwardya. Dayon ginpatunog nila ang mga trumpeta kag ginbuka nila ang ila ginauyatan nga mga tibod.

20Ang tatlo ka grupo nagpatunog sang mga trumpeta kag ginpangbuong ang mga tibod. Gin-uyatan nila ang mga mitsa sa ila wala nga mga kamot, kag ang mga trumpeta sa ila tuo nga mga kamot, kag nagsinggit, “Ang espada sang Ginoo kag ni Gideon!”

21Ang tagsa ka tawo nagtindog sa iya lugar sa palibot sang kampo, kag ang bug-os nga hangaway sang kaaway nagdalagan sa pagpalagyo nga nagasinggit.

22Samtang nagapatunog sang ila mga trumpeta ang mga kaupdanan ni Gideon, ginpaaway sang Ginoo ang mga hangaway sang kaaway sa kampo batok sa isa kag isa kag naglinab-anay sila. Nagpalagyo sila pakadto sa Serera, tubtob sa Bet-sita, padulong sa dulonan sang banwa sang Abel-Mehola, malapit sa Tabat.

23Gintipon sa pagpakig-away ang tanan nga mga lalaki sa mga tribo nanday Neftali, Aser, kag ang tanan sa tribo ni Manases, kag ila ginlagas ang mga Midianhon.

24Nagpadala si Gideon sing mga mensahero sa tanan nga mga lugar sa kabakuloran sang Efraim nga nagasiling, “Magdulhog kamo kag magpakig-away batok sa mga Midianhon. Bantayi ninyo ang Suba sang Jordan kag ang mga sapa tubtob sa Betbara, agod indi makatabok ang mga Midianhon.” Gintipon sing tingob ang tanan nga mga kalalakin-an sang Efraim, kag ila ginbantayan ang Suba sang Jordan kag ang mga sapa tubtob sa Betbara.

25Gindakop nila ang duha ka mga pangulo nga mga Midianhon nga amo si Oreb kag si Seeb, kag ginpatay nila si Oreb sa Igang ni Oreb, kag si Seeb ginpatay nila sa Pulogaan sang Ubas ni Seeb. Nagpadayon sila sa paglagas sa mga Midianhon, kag gindala nila ang mga ulo ni Oreb kag ni Seeb sa kay Gideon nga yadto didto sa sidlangan sang Jordan.

← Chapter 6 Jump to: Chapter 8 →