Judges 20 — Ilonggo (Maayong Balita nga Biblia (2012))

1Ang tanan nga mga Israelinhon, halin sa Dan sa aminhan tubtob sa Beerseba sa bagatnan, kag halin sa duta sang Galaad sa sidlangan nagsabat sang panawag. Nagtipon sila sing tingob kag nag-isa sa atubang sang Ginoo sa Mispa.

2Yadto man didto ang mga pangulo sang tanan nga mga tribo sang Israel sang pagtipon sang mga tawo sang Dios. May 400,000 tanan ka mga soldado nga nagalakat lang.

3Karon nakabati ang mga kaliwat ni Benjamin nga ang iban nga mga Israelinhon nagtaklad pakadto sa Mispa. Nagpamangkot ang mga Israelinhon, “Sugiri kami kon paano nahimo ini nga kalautan?”

4Nagsabat ang Levita nga ang iya babayi amo ang ginpatay, “Ang akon babayi kag ako nagkadto sa Gebeat, sa kadutaan ni Benjamin sa pagpaligad sang isa ka gab-i didto.

5Nag-abot ang mga lalaki sang Gebeat sa pagkuha sa akon, kag sadto nga gab-i ginlibutan nila ang balay. Ang tuyo nila amo ang pagpatay sa akon, pero sa baylo sini, ginlugos nila ang akon babayi, kag napatay sia.

6Gindala ko ang iya bangkay, ginhiwahiwa, kag ginpadala ko ini sa dose ka mga tribo sang Israel. Ini nga mga tawo nakahimo sing kalautan kag mahigko nga butang sa tunga naton.

7Kamo tanan nga yari diri mga Israelinhon. Ano bala ang aton pagahimuon nahanungod sini?”

8Nagtindog sing tingob ang tanan nga mga tawo kag nagsiling, “Wala sing isa sa aton nga magpauli sa iya tolda ukon sa iya balay.

9Amo ini ang aton himuon: magabutgabot kita kag magapili sing mga tawo sa pagsalakay sang Gebeat.

10Ang isa ka parti sang napulo ka bahin sang mga tawo sa Israel mag-aman sing pagkaon para sa mga hangaway. Ang iban magalakat sa pagsilot sang mga taga-Gebeat sa tribo ni Benjamin tungod sang makangilil-ad nga butang nga ila ginhimo sa Israel.”

11Gani ang tanan nga mga tawo sa Israel nagtingob sa isa ka tinutuyo nga amo ang pagsalakay sang banwa.

12Ang mga tribo sang Israel nagpadala sing mga mensahero sa tanan nga kadutaan sang tribo ni Benjamin nga nagasiling, “Ano ini nga kalautan ang inyo ginhimo?

13Karon itugyan ninyo inang mga malauton nga mga lalaki sang Gebeat, agod pamatyon namon sila, kag makuha ini nga kalautan sa Israel.” Pero wala magsapak ang mga kaliwat ni Benjamin sa ila mga utod nga mga Israelinhon.

14Halin sa tanan nga mga siudad ni Benjamin, nagtipon sila sa Gebeat sa pagpakig-away sa mga tawo sang Israel.

15Gintipon nila ang 26,000 nga mga soldado halin sa ila mga siudad sadto nga adlaw. Wala labot sini, ang mga pumoluyo sang Gebeat nagtipon sing 700 ka pinili nga mga tawo nga walis. Ang tagsatagsa sa ila makalabyog sa isa ka nahot nga buhok nga wala gid sing paglisa.

17Ang mga Israelinhon, wala labot ang mga tribo ni Benjamin, nagtipon sing 400,000 ka nahanas nga hangaway.

18Nagkadto ang mga Israelinhon sa lugar nga ginasimbahan sa Betel. Didto nagpamangkot sila sa Dios, “Ano bala nga tribo ang magauna sa pagsalakay sa mga Benjaminhon?” Nagsabat ang Ginoo, “Ang tribo ni Juda.”

19Gani nagbangon ang mga Israelinhon sang madason nga aga kag naghimo sila sing mga tolda malapit sa siudad sang Gebeat.

20Naglakat sila sa pagpakig-away batok sa tribo ni Benjamin kag ginpahamtang nila ang mga hangaway sing alagisod nga nagaatubang sa siudad.

21Ang mga soldado ni Benjamin naggwa sa siudad, kag sa wala pa magtunod ang adlaw ginpamatay nila ang 22,000 ka mga hangaway nga Israelinhon.

22Dayon ang mga Israelinhon nagkadto sa lugar nga ginasimbahan kag naghinibi sila sa atubang sang Ginoo tubtob sa gab-i. Nagpamangkot sila sa Ginoo, “Makadto bala kami sa pagpakig-away liwat batok sa amon mga utod nga Benjaminhon?” Nagsabat ang Ginoo, “Huo, lakat kamo.” Gani nagmalig-on pa gid ang mga soldado sang mga Israelinhon, kag ginpahamtang nila liwat ang mga hangaway subong man sang ginhimo nila sang nagligad nga adlaw.

24Gingubat liwat sang mga Israelinhon ang mga hangaway ni Benjamin.

25Kag sa liwat, ang mga Benjaminhon naggwa sa Gebeat, kag sa sini nga tion ginpamatay nila ang 18,000 ka nahanas nga mga hangaway sang mga Israelinhon.

26Dayon ang mga Israelinhon nagtaklad pakadto sa Betel kag naghinibi. Nagpungko sila didto sa atubang sang Ginoo kag wala magkaon tubtob sa gab-i. Naghalad sila sing mga halad sa paghiambit, kag naghalad sila sing mga halad nga sinunog sa atubang sang Ginoo.

27Dayon nagpakighinun-anon ang mga Israelinhon sa Ginoo. Sadto nga mga inadlaw, ang Kaban sang Kasugtanan sang Dios yadto didto sa Betel,

28kag si Fineas, nga anak ni Eleazar, kag apo ni Aaron, amo ang gintugyanan sini. Nagpamangkot sila sa Ginoo, “Magalakat bala kami sa pagpakig-away liwat sa amon mga kautoran nga Benjaminhon, ukon magauntat kami?” Nagsabat ang Ginoo, “Pakig-away kamo, kay buas padag-on ko kamo batok sa ila.”

29Gani nagpahamtang ang mga Israelinhon sing mga hangaway sa tago lang sa palibot sang Gebeat.

30Kag sa ikatlo nga adlaw gingubat nila ang mga soldado ni Benjamin, kag ginpahamtang nila ang ila mga soldado sing alagisod nga nagaatubang sa Gebeat, subong sang ila ginhimo sang nagligad nga mga inaway.

31Naggwa ang mga Benjaminhon sa pagpakig-away, kag ginpanglagas sila sang mga Israelinhon palayo sa siudad. Subong sang ginhimo nila sang nagligad nga mga inaway, nagsugod sila sa pagpamatay sang pila ka mga Israelinhon sa alagyan pakadto sa Betel, sa alagyan pakadto sa Gebeat, kag sa latagon. Nakapatay sila sing mga traynta ka Israelinhon.

32Nagsiling ang mga Benjaminhon, “Ginalutos naton sila, pareho sang nagligad nga mga adlaw.” Pero nagsiling ang mga Israelinhon, “Malagyo kita, kag palagson naton sila palayo sa siudad pakadto sa mga dalanon.”

33Gani ang daku nga bahin sang mga hangaway sang Israel nag-isol kag nagtipon sila liwat sing tingob sa Baaltamar, pero ang mga kalalakin-an nga nagapalibot sa siudad, sa hinali lang naggwa sa ila mga ginapanaguan sa kabatuhan sa palibot sang Gebeat.

3410,000 ka mga tawo, ang pinasahi nga ginpili gikan sa tanan nga mga Israelinhon, ang nagsalakay sang Gebeat, kag malapuyot gid ang inaway. Wala makahibalo ang mga Benjaminhon nga madali na lang sila malaglag.

35Ginpadaog sang Ginoo ang mga Israelinhon batok sa mga hangaway sang mga Benjaminhon. Ginpamatay sang mga Israelinhon ang 25,100 sang ila mga kaaway sadto nga adlaw,

36kag natalupangdan sang mga Benjaminhon nga nalutos sila. Nagpalagyo ang daku nga bahin sang mga Israelinhon sa mga Benjaminhon, tungod kay nagsalig sila sa mga soldado nga ila ginpapanago sa palibot sang Gebeat.

37Ini nga mga hangaway madasig nga nagdalagan pakadto sa Gebeat, naglapta sila, kag ginpamatay nila ang tanan sa siudad.

38Ang daku nga bahin sang mga hangaway sang Israel kag ang mga soldado nga nagapanago nagkasugot sang isa ka senyas. Kon makita nila ang madamol nga aso nga nagatub-ok halin sa siudad,

39ang mga Israelinhon nga nagapalagas sa latagon magabalik sa pagpakig-away. Sa sini nga tion, ang mga Benjaminhon nakapatay na sing traynta ka mga Israelinhon. Nagsiling sila sa ila kaugalingon, “Ginalutos naton sila pareho sang nagligad nga mga inaway.”

40Pero sang nagsugod sa pagtub-ok ang madamol nga aso subong senyas halin sa banwa nagbalikid ang mga Benjaminhon, kag natingala gid sila sang makita nila nga nasunog ang bug-os nga siudad.

41Dayon nagbalik ang mga Israelinhon, kag nagsalangisag ang mga Benjaminhon, tungod kay natalupangdan nila nga madali na lang sila malaglag.

42Nagpalagyo sila sa mga Israelinhon kag nagdalagan pakadto sa desierto, pero indi sila makapalagyo. Nakibon sila sang daku nga bahin sang mga hangaway kag sang mga soldado nga nagapagwa sa siudad, kag nalaglag sila.

43Ginkibon sang mga Israelinhon ang ila mga kaaway, kag ginlagas nila sila nga wala sing untat tubtob sa punta sa sidlangan sang Gebeat, kag ginapamatay sila samtang nagapalagyo.

4418,000 nga pinakaisganan nga mga hangaway sang mga Benjaminhon ang ginpamatay.

45Ang iban nagbalik kag nagdalagan pakadto sa desierto sa Igang sang Rimon. 5,000 sa ila ang ginpamatay sa mga dalan. Ang mga Israelinhon nagpadayon sa paglagas sang nagkalabilin tubtob sa Gidom kag nakapatay sila sing 2,000 ka mga tawo.

46Sa kabilogan, 25,000 ka mga Benjaminhon ang ginpamatay sadto nga adlaw, kag tanan sila maisog nga mga soldado.

47Pero 600 ka mga lalaki ang nakapalagyo pakadto sa desierto, sa Igang sang Rimon, kag nagtener sila didto sing apat ka bulan.

48Ang mga Israelinhon nagbalik kag nagpakig-away sa nabilin nga mga Benjaminhon, kag ginpamatay nila ang tagsatagsa nga ila nakita; ang tanan nga mga kalalakin-an, mga kababayin-an, kag mga kabataan, kag subong man ang mga kasapatan. Ginsunog nila ang tagsa ka banwa sa amo nga lugar.