Judges 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Sang ulihi, sang tig-alani sang trigo, nagkadto si Samson sa pagduaw sa iya asawa, kag gindalhan niya sia sang isa ka tinday nga kanding. Ginsingganan niya ang amay sang iya asawa, “Luyag ko magsulod sa kwarto sang akon asawa.” Pero indi niya si Samson pagpasudlon.

2Ginsingganan niya si Samson, “Ang dumdom ko gid nga ginadumtan mo sia, gani ginpaasawa ko sia sa imo abyan. Pero ang iya nga manghod nga babayi mas matahom pa sang sa iya, kag mangin-imo sia sa baylo sang imo asawa.”

3Nagsiling si Samson, “Sa sini nga tion indi ako mabasol kon ano ang akon himuon sa inyo nga mga Filistinhon!”

4Gani naglakat sia kag nagdakop sang 300 ka mga singgalong. Gintabid niya ang mga ikog nila sing tagduhaduha kag ginbutangan sing mitsa sa tunga sang tagsa ka pares.

5Dayon ginsindihan niya ang mga mitsa, kag ginbuy-an ang mga singgalong sa kaumhan sang trigo sang mga Filistinhon. Sa sini nga paagi ginsunog niya indi lamang ang natumpi nga mga trigo, kundi pati man ang mga alanyon nga trigo sa kaumhan. Nasunog man ang katamnan sang mga olivo.

6Dayon nagpamangkot ang mga Filistinhon, “Sin-o ang naghimo sini?” Nahibal-an nila nga si Samson ang naghimo sini, tungod kay ang ugangan niya nga Timnahanon nagkuha sang asawa ni Samson kag ginpaasawa sa abyan ni Samson. Gani naglakat ang mga Filistinhon kag ginsunog ang babayi tubtob mapatay, kag ginsunog ang balay sang iya amay.

7Ginsingganan sila ni Samson, “Amo gali ini ang ginahimo ninyo! Ginasumpa ko nga indi ako mag-untat tubtob indi ko kamo tanan mabalusan!”

8Ginsalakay niya sila sing tudo gid kag ginpamatay ang madamo sa ila. Dayon naglakat sia kag nagtener sa kweba sa pil-as sang Etam.

9Nag-abot ang mga Filistinhon kag naghimo sing mga tolda sa Juda, kag ginsalakay ang banwa sang Lehi.

10Ang mga tawo sang Juda nagpamangkot sa ila, “Ngaa ginagubat ninyo kami?” Nagsabat sila, “Nag-abot kami sa pagdakop kay Samson, kag sa pagbalos sa iya sang ginhimo niya sa amon.”

11Dayon nagkadto sa kweba sa pil-as sang Etam ang 3,000 ka mga tawo sang Juda kag nagsiling sila kay Samson, “Wala ka bala makahibalo nga ang mga Filistinhon amo ang nagagahom sa aton? Ano bala ini ang ginhimo mo sa amon?” Nagsabat si Samson, “Ginbalusan ko man lang sila sang ginhimo nila sa akon.”

12Nagsiling sila sa iya, “Nag-abot kami diri sa paggapos sa imo, agod itugyan ka namon sa mga Filistinhon.” Nagsiling si Samson, “Magsaad kamo nga indi kamo ang magapatay sa akon.”

13Nagsiling sila, “Indi kami ang magapatay sa imo, kundi amon lang ikaw gapuson kag itugyan sa ila.” Gani gingapos nila sia sang duha ka bag-o nga mga kalat kag gindala sia pabalik halin sa pil-as.

14Sang makaabot sia sa Lehi, nagdalagan ang mga Filistinhon nga nagasinggit sa pagsugata sa iya. Sa hinali ginhatagan sia sing kusog sang Espiritu sang Ginoo, kag ginpamugto niya ang mga kalat nga nagagapos sang iya mga butkon kag mga kamot nga daw pareho lang sang nasunog nga hilo.

15Dayon nakakita sia sing wala pa magmala nga sulang nga tul-an sang asno, ginpulot niya ini, kag paagi sini, ginpatay niya ang 1,000 ka mga tawo.

16Gani si Samson nagkanta, “Paagi sa sulang nga tul-an sang asno ginpatay ko ang isa ka libo ka mga tawo. Paagi sa sulang nga tul-an sang asno gintumpok ko sila sa mga tinumpukan.”

17Pagkatapos sadto, iya ginpilak ang sulang nga tul-an sang asno. Yadto nga lugar ginhingalanan Bakulod sang Sulang nga Tul-an.

18Dayon gin-uhaw gid kaayo si Samson, gani nagpanawag sia sa Ginoo kag nagsiling, “Ginhatag mo sa akon ining daku nga pagdaog, kag karon mapatay man lang bala ako tungod sang kauhaw kag pagabihagon sang di-tinuli nga mga Filistinhon?”

19Dayon ginpalitik sang Dios ang yuhob sa duta didto sa Lehi, kag naggwa ang tubig halin sini. Nag-inom si Samson kag nag-ayo ang iya pamatyag. Gani ang tuboran ginhingalanan Enhakore. Ini yara pa didto sa Lehi.

20Nanginhukom si Samson sa Israel sa sulod sang baynte ka tuig samtang ang mga Filistinhon naggahom sa duta.

← Chapter 14 Jump to: Chapter 16 →