Judges 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Wala sing hari sa Israel sadto nga panahon. Sadto nga mga inadlaw, ang tribo ni Dan nagapangita sing kadutaan nga pagaangkunon kag pagaestaran. Sa mga tribo sang Israel, ang tribo ni Dan wala pa makabaton sing duta nga ila pagapanag-iyahan tubtob sadto nga tion.

2Gani ang mga kaliwat ni Dan nagpili sing lima ka mga lalaki nga maisog gikan sa tanan nga panimalay sa tribo, kag ginpadala sila halin sa mga banwa sang Zora kag Estaol, kag ginsugo sa pag-usisa sang duta kag sa pagpanilag sa mga pumoluyo. Sang pag-abot nila sa kabakuloran sang Efraim nagtener sila sa balay ni Miqueas.

3Samtang didto sila, nakilala nila ang panghambal sang pamatan-on nga Levita, gani naghapit sila kag nagpamangkot sa iya, “Ano ang ginahimo mo diri? Sin-o ang nagdala sa imo diri?”

4Nagsabat sia sa ila, “May ginkaisahan kami ni Miqueas. Nagaalagad ako subong nga iya pari, kag iya ako ginasweldohan.”

5Nagsiling sila sa iya, “Kon mahimo, pamangkuta ang Dios kon bala magamadinalag-on kami sa amon pagpanglakaton.”

6Nagsabat ang pari, “Wala kamo sing dapat paligban. Ang Ginoo nagatatap sa inyo sa sini nga pagpanglakaton.”

7Gani ang lima ka mga lalaki naghalin, kag naglakat pakadto sa banwa sang Lais. Nakita nila kon daw ano kalig-on ang pag-estar didto sang mga pumoluyo pareho sang mga Sidonhon. Mahidaiton sila kag mahipos nga mga tawo, kag wala sing kasuayon sa kay bisan sin-o. Wala sila ginakulang sang ila mga kinahanglanon. Nagaestar sila nga malayo sa mga Sidonhon, kag wala sila nagapakig-angot sa iban nga mga katawhan.

8Sang magbalik ang lima ka mga lalaki sa Zora kag Estaol, ginpamangkot sila sang ila mga kasimanwa kon ano ang ila nakita.

9Nagsabat sila, “Dali kamo, salakayon naton sila. Nakita namon ang duta, kag maayo gid ini. Indi kamo magpabilin diri nga wala sing ginahimo. Dalidali kamo! Sudla ninyo kag agawon ini!

10Sa inyo pag-abot didto, masapwan ninyo nga ang mga tawo wala gid nagahunahuna nga may malain nga matabo. Isa ini ka malapad nga duta, kag yara ang tanan nga luyag sang isa ka tawo kag ang Dios naghatag sini nga inyo.”

11Gani naglakat halin sa Zora kag Estaol ang 600 ka mga tawo gikan sa tribo ni Dan nga handa sa pagpakig-away.

12Nagtaklad sila kag naghimo sing kampo sa nakatundan sang siudad sang Kiryat-jearim sa Juda. Amo ini ang kabangdanan nga ang lugar gintawag nga Kampo ni Dan.

13Halin didto nagkadto sila sa balay ni Miqueas sa kabakuloran sang Efraim.

14Dayon ang lima ka mga lalaki nga naglakat sa pagpanilag sa kadutaan sa palibot sang Lais, nagsiling sa ila mga kaupdanan, “Nakahibalo bala kamo nga sa isa sini nga mga balay may isa ka diosdios nga kahoy nga nahaklapan sing pilak? May iban man nga mga diosdios, kag may mga bestidora para sa ila. Ano bala sa hunahuna ninyo ang aton himuon?”

15Gani naghapit sila sa balay ni Miqueas sa diin nagaestar ang pamatan-on nga Levita. Ginpamangkot nila sia kon kamusta man sia.

16Samtang ang 600 ka mga soldado sang tribo ni Dan nga handa sa pagpakig-away nagatindog sa may pwertahan.

17Ang lima ka mga espiya nagderetso sa sulod sang balay, kag ginkuha nila ang diosdios nga kahoy nga nahaklapan sing pilak, ang iban pa nga mga diosdios, kag ang ila mga bestidora. Ang pari nagpabilin sa pwertahan upod sa 600 ka mga soldado nga sangkap sa hinganiban.

18Sa tapos makakadto ang mga tawo sa balay ni Miqueas, kag ila makuha ang mga diosdios nga kahoy, ang mga bestidora para sini, ang iban pa nga mga dios sa balay kag ang larawan nga tinunaw, nagpamangkot ang pari, “Ano bala ang ginahimo ninyo?”

19Ginsingganan nila sia, “Maghipos ka. Indi ka maghambal. Mag-upod ka sa amon, kag ikaw ang amon manginpari kag manuglaygay. Indi ka bala luyag nga manginpari para sa isa ka bug-os nga tribo sang Israel sa baylo sang isa lamang ka panimalay sang isa ka tawo?”

20Nalipay gid sini ang pari, gani ginkuha niya ang mga diosdios nga kahoy kag ang mga bestidora para sini, kag ang iban nga mga dios sa balay, kag nag-upod sia sa ila.

21Nagbalik sila kag ginpauna nila ang kabataan, kasapatan, kag ang ila mga pagkabutang.

22Malayo na ang ila nalaktan halin sa balay sang ginpanawag ni Miqueas ang iya mga kaingod nga lalaki sa pagpakig-away. Nalambot nila ang mga kaliwat ni Dan,

23kag ginsinggitan nila sila. Nagbalikid ang mga kaliwat ni Dan, kag nagpamangkot kay Miqueas, “Ano bala ang natabo? Ngaa nga kadamo gid sa inyo nga nagalagas sa amon?”

24Nagsabat si Miqueas, “Ano bala ang buot ninyo silingon nga nagapamangkot pa kamo kon ano ang natabo? Ginkuha ninyo ang akon pari, kag ang mga diosdios nga akon ginhimo, kag naglakat kamo! Ano na lang ang nabilin sa akon?”

25Ginsingganan sia sang mga kaliwat ni Dan, “Maayo pa nga maghipos ka na, luas lang kon luyag mo nga maakig ining mga tawo kag salakayon nila kamo, kag ikaw kag ang imo bug-os nga panimalay magakalamatay.”

26Gani nagpadayon sa paglakat ang mga kaliwat ni Dan. Sang makita ni Miqueas nga mas makusog sila sang sa iya, nagbalik sia pauli.

27Ginkuha sang mga kaliwat ni Dan ang mga butang nga ginhimo ni Miqueas kag ang iya pari. Dayon naglakat sila kag ginsalakay ang Lais, isa ka banwa nga ang mga tawo mahidaiton kag wala sing gamo. Ginpamatay nila ang tanan nga mga pumoluyo kag ginsunog ang siudad.

28Wala gid sing isa nga yadto didto nga makatabang sa ila, tungod kay ang banwa malayo sa Sidon, kag wala gid sila nagapakig-angot sa iban nga katawhan. Ini nga banwa yara sa amo man nga kapatagan sang Betrehob. Ginpatindog liwat sang mga kaliwat ni Dan ang siudad, kag didto sila nag-estar.

29Ginhingalanan nila ang siudad nga Dan, suno sa ngalan sang ila tigulang nga si Dan, nga anak ni Jacob. Sang una, ini nga banwa gintawag Lais.

30Ang mga kaliwat ni Dan nagpatindog sing diosdios nga pagasimbahon. Si Jonatan nga anak ni Gersom, kag apo ni Moises, nag-alagad subong nga pari sang mga kaliwat ni Dan, kag ang iya mga kaliwat nag-alagad subong mga pari nila tubtob sang pagbihag sini nga mga tawo.

31Ang diosdios ni Miqueas ginbilin didto samtang nga ang Tolda sa diin ang Dios ginasimba yadto sa Silo.

← Chapter 17 Jump to: Chapter 19 →