Acts 10

Ilonggo (Ang Biblia (1982))

← Chapter 9 Jump to: Chapter 11 →

1Sa Cesarea may isa ka tawo nga si Cornelio ang ngalan, nga capitan sa Kabon nga gintawag Italiahanon,

2tawo nga mainampoon kag mahinadlukon sa Dios upud ang bug-os niya nga panimalay, nga naghatag sing madamu nga limos sa katawohan, kag nagpangamuyo sing dalayon sa Dios.

3Nakita niya sa palanan-awon sing maathag sa mga ikasiam nga takna sang adlaw ang manugtunda sang Dios nga nagasulud pakadto sa iya kag nagsiling sa iya, “Cornelio.”

4Kag sia, nga nagahimutad sang iya mga mata sa iya kag nakulbaan, nagsiling, “Ano bala, Ginoo?” Kag nagsiling sia sa iya, “Ang imo mga pangamuyo kag mga panglimos nagdangat nga handumanan sa atubangan sang Dios.

5Kag karon magpadala sing mga tawo sa Joppe, kag ipakuha si Simon nga ginhayoan si Pedro;

6nagadayon sia kay Simon nga manugpanit, nga ang iya balay yara sa obay sang dagat.”

7Sang nagtaliwan ang manugtunda nga nagpamolong sa iya, gintawag niya ang duha sang iya sologoon kag isa ka mainampoon nga soldado, sa mga nagaalagad sa iya,

8kag sang nasugid niya sa ila ang tanan nga butang, ginpadala niya sila sa Joppe.

9Sa madason nga adlaw, sang nagalakat sila sa ila dalanon kag nagahinamput sa banwa, nagsaka si Pedro sa atop sa pagpangamuyo, sa mga ikan-um nga takna.

10Kag gingutum sia kag buut makaon; apang sang nag-aman pa sila sini, nag-abut sa iya ang pinasahi nga pagpanganinaw

11kag natan-aw niya ang langit nga nabuksan, kag nagapaubus ang isa ka suludlan, subong sang malapad nga panapton, nga natonton sa apat ka pusud sa duta.

12Sa sulud sini yara ang tanan nga sari sang kasapatan kag ang nagasalaug sa duta kag ang kapispisan sa langit.

13Kag nag-abut sa iya ang isa ka tingug, “Tindug ka, Pedro; mag-ihaw kag magkaon.”

14Apang si Pedro nagsiling, “Indi, Ginoo; kay wala gid ako makakaon sing bisan ano nga nadagtaan kag dimatinlo.”

15Kag sa ikaduha nag-abut sa iya liwat ang tingug, “Ang natinloan sang Dios, dili mo pagkabigon nga nadagtaan.”

16Nahimo ini sa makatlo, kag sa gilayon ang suludlan ginbatak pa langit.

17Karon sang si Pedro nagpalibog sa iya kaugalingon kon ano ang kahologan sang palanan-awon nga iya nakita, yari karon, ang mga tawo nga ginpadala ni Cornelio, sang nakausisa nahanungud sang balay ni Simon, nagtindug sa gawang

18kag nagpanawag sa pagpamangkot kon si Simon nga ginhayoan si Pedro nagadayon didto.

19Kag sang si Pedro nagapanghunahuna sang palanan-awon, ang Espiritu nagsiling sa iya, “Yari karon, tatlo ka tawo nagapangita sa imo.

20Tindug ka kag panaug, kag mag-upud ka sa ila sa walay pangduhaduha; kay ako ang nagpadala sa ila.”

21Kag si Pedro nagpanaug sa mga tawo kag nagsiling, “Ako ang inyo ginapangita; ano bala ang kabangdanan nga yari kamo?”

22Kag nagsiling sila, “Si Cornelio nga capitan, tawo nga matarung kag mahinadlukon sa Dios, kag maayo sing kadungganan sa bug-os nga pungsud sang mga Judio, gintudloan paagi sa balaan nga manugtunda sa pagpakadto sa imo sa iya balay, kag sa pagpamati sing mga polong sa imo.”

23Gani ginpasulud niya sila kag ginpadayon. Sa madason nga adlaw nagtindug sia kag nag-upud sa ila, kag ang pila sang mga kauturan sa Joppe nag-upud sa iya.

24Kag sa adlaw nga madason nagsulud sila sa Cesarea. Si Cornelio nagapaabut sa ila kag ginpatipon niya ang iya mga himata kag hanuut nga mga abyan.

25Sang pagsulud ni Pedro, si Cornelio nagsugata sa iya kag naghapa sa iya tiilan kag nagyaub sa iya.

26Apang ginpatindug sia ni Pedro, nga nagsiling, “Tindug ka; ako tawo man.”

27Kag sang nakighambal sia sa iya, nagsulud sia kag nakita ang madamu nga nagtipon;

28kag nagsiling sia sa ila, “Kamo gid nakahibalo nga indi tugut sa isa ka Judio ang pagpakig-impon ukon pagpalapit sa isa nga dumoloong; apang ang Dios nagpakita sa akon nga walay tawo nga pagtawgon ko nga nadagtaan ukon dimatinlo.

29Gani nagkari ako sa walay paglalis, sang ginpakadtoan ako. Niyan nagapamangkot ako sa ano bala nga katuyoan nga ginpakadtoan ninyo ako.”

30Kag nagsabat si Cornelio, “Apat na ka adlaw, tubtub sining takna, nagabantay ako sang ikasiam nga takna sang pangamuyo sa akon balay; kag yari karon, ang tawo nga may panapton nga masilaw nagtindug sa akon atubangan,

31nga nagasiling, ‘Cornelio, ginpamatian ang imo pangamuyo kag gindumdum ang imo panglimos sa atubangan sang Dios.

32Busa magpadala ka sa Joppe kag tawgon mo si Simon nga ginhayoan si Pedro; nagadayon sia sa balay ni Simon nga manugpanit sa obay sang dagat.’

33Gani sa gilayon ginpakadtoan ko ikaw kag maayo ang imo ginhimo nga nagkari ka. Busa karon yari kami tanan sa atubangan sang Dios sa pagpamati sang tanan nga ginsogo sang Ginoo sa imo.”

34Kag si Pedro nagtikab sang iya baba kag nagsiling: “Matuud gid ginahantup ko nga ang Dios walay ginapasulabi sa mga tawo,

35apang sa tagsa ka pungsud ang nagakahadluk sa iya kag nagahimo sang katarungan kalahamut-an sa iya.

36Kamo nakahibalo sang polong nga ginpadala niya sa Israel, nga nagawali sang maayong balita sang paghidait paagi kay Jesu-Cristo (sia ang Ginoo sang tanan),

37yadtong polong nga ginbantala sa bug-os nga Judea, sumugud sa Galilea sa tapus sang bautismo nga ginwali ni Juan:

38kon paano nga si Jesus nga Nazaretnon ginhaplas sang Dios sang Espiritu Santo kag sang gahum; kon paano nga naglibut sia nga nagahimo sing kaayohan kag nagapang-ayo sang tanan nga ginpapiotan sang yawa, kay ang Dios kaupud niya.

39Kag kami mga saksi sang tanan nga ginhimo niya sa duta sang mga Judio kag sa Jerusalem. Sia ginpatay nila paagi sa pagbitay sa kahoy;

40apang ginbanhaw sia sang Dios sa ikatlo nga adlaw kag ginpahayag sia;

41indi sa bug-os nga katawohan kondi sa amon nga mga saksi nga ginpili sang Dios, nga nagkaon kag nag-inum kaupud niya sa tapus nga nabanhaw sia.

42Kag gintugnan niya kami sa pagwali sa katawohan, kag sa pagpanaksi nga ini sia amo ang gintangdoan sang Dios nga hukom sang mga buhi kag sang mga patay.

43Sa iya ang tanan nga manalagna nagsaksi nga paagi sa iya ngalan ang tagsatagsa nga nagatoo sa iya nagabaton sing kapatawaran sang mga sala.”

44Sang nagahambal pa si Pedro sini, ang Espiritu Santo naholog sa ila tanan nga nagpamati sang polong.

45Kag ang mga tomoloo gikan sa mga nacircuncidar nga nag-upud kay Pedro naorongan, bangud nga sa mga Gentil man ginpasagahay ang hiyas sang Espiritu Santo.

46Kay ginpamatian nila nga nagapamolong sila sing mga hambal kag nagapakadaku sang Dios. Niyan nagpahayag si Pedro,

47“May tawo bala nga makadumili sang tubig agud nga indi pagbautisohan ini sila nga nakabaton sang Espiritu Santo subong sa aton?”

48Kag nagsogo sia nga bautisohan sila sa ngalan ni Jesu-Cristo. Niyan ginpangayo nila sia sa pagpabilin sing pila ka adlaw.

← Chapter 9 Jump to: Chapter 11 →