Acts 16

Ilonggo (Ang Biblia (1982))

← Chapter 15 Jump to: Chapter 17 →

1Kag nag-abut man sia sa Derbe kag sa Listra. Yadto didto ang isa ka gintoton-an, nga ginhingalanan si Timoteo, nga anak sang babaying Judio nga nagtoo; apang ang iya amay Griego.

2Ini sia ginsugid nga maayo sang mga kauturan sa Listra kag sa Iconio.

3Buut ni Pablo nga iupud si Timoteo; kag ginkuha niya sia kag gincircuncidar bangud sang mga Judio sa sadtong mga duug, kay sila tanan nakahibalo nga ang iya amay Griego.

4Sang nagpadayon sila sa ila dalanon sa mga banwa, ginhatag nila sa ila nga pagbantayan ang mga mando nga natangdo sang mga pinadala kag mga tigulang nga didto sa Jerusalem.

5Gani ang mga iglesia naglig-on sa pagtoo, kag nagdugang sa kadamuon adlawadlaw.

6Kag naglatas sila sa ginsakpan sang Frigia kag Galacia, sang gindumilian sila sang Espiritu Santo sa paghambal sang polong sa Asia.

7Kag sang pagsamput nila sa atubang sang Misia, naghimulat sila sa pagkadto sa Bitinia, apang ang Espiritu ni Jesus wala magtugut sa ila;

8gani, sang nagaligad sila sa Misia, nagdolhog sila pa Troas.

9Kag ang isa ka palanan-awon nagpahayag kay Pablo sa kagab-ihon: may tawo nga taga-Macedonia nga nagatindug nga nagapakilooy sa iya kag nagasiling, “Tabok ka sa Macedonia kag tabangi kami.”

10Kag sang nakita niya ang palanan-awon, sa gilayon naghimulat kami sa pagkadto sa Macedonia, nga nagahangup nga ang Dios nagtawag sa amon sa pagwali sang maayong balita sa ila.

11Busa sang nagapalayag kami gikan sa Troas, gintuhuy namon ang Samotracia, kag sa madason nga adlaw ang Neapolis,

12kag gikan didto sa Filipos, nga banwa sa Macedonia, ang bantug sa sadtong ginsakpan, nga colonia sang Roma; nagpabilin kami sa sining banwa sing pila ka adlaw;

13kag sa adlaw nga inugpahuway nagkadto kami sa luwas sang gawang sa obay sang suba, diin ginbanta namon nga may duug sa pagpangamuyo; kag naglingkod kami kag nagpamolong sa mga babayi nga nagtipon.

14Ang isa ka babayi nga ginhingalanan si Lidia, nga manugbaligya sang purpura, nga gikan sa banwa sang Tiatira, nga masinimbahon sa Dios, nagpamati sa amon. Ang iya tagiposoon ginbuksan sang Ginoo sa pagtalupangud sang ginpamolong ni Pablo.

15Kag sang nabautisohan sia, kag ang iya panimalay, nagpakilooy sia sa amon, nga nagasiling, “Kon nagahunahuna kamo nga ako matinoohon sa Ginoo, sulud kamo sa akon balay kag magpabilin didto.” Kag ginpilit niya kami.

16Sang nagapakadto kami sa duug nga palangamuyoan, ginsugata kami sang ulipon nga babayi nga may espiritu sang pagpamakot kag nagdala sing madamu nga saplid sa iya mga agalon paagi sa pagpamakot.

17Ini sia sang nagasonod kay Pablo kag sa amon nagsinggit, “Ining mga tawo mga ulipon sang Labing Mataas nga Dios, nga nagabantala sa inyo sang dalanon sang kaluwasan.”

18Kag ginhimo niya ini sa madamu nga mga adlaw. Apang si Pablo, sang gingamohan gid, nagbalikid kag nagsiling sa espiritu, “Nagasogo ako sa imo sa ngalan ni Jesu-Cristo nga maggowa sa iya.” Kag naggowa ini sa sadto gid nga takna.

19Apang sang nakita sang iya mga agalon nga ang paglaum sang ila saplid nadula, gindakup nila si Pablo kag si Silas kag ginguyud sa balaligyaan sa atubangan sang mga manugdumala;

20kag sang nadala nila sa mga hukom nagsiling sila, “Ining mga tawo nga mga Judio nagagamo sing tama sang aton banwa.

21Nagabantala sila sing mga pamatasan nga indi tugut sa aton ang pagbaton ukon pagsonod subong nga mga Romanhon.”

22Ang kadam-an nagtindug sing tingub batok sa ila; kag ginkusnit sang mga hukom ang ila panapton kag ginpabunal sila sing mga bilogon.

23Kag sang nalapdusan nila sila sing madamu, ginsulud nila sila sa bilanggoan, nga ginatugnan ang manugbantay sang bilanggoan sa pagbantay sa ila sing malig-on.

24Sang nakabaton sang amo nga tugon, ginsulud niya sila sa nasulud nga bilanggoan kag gintakud niya ang ila mga tiil sa mga pandug.

25Apang sa mga tungang gab-i si Pablo kag si Silas nagpangamuyo kag nag-ambahan sa Dios, kag ang mga binilanggo nagpamati sa ila,

26kag sa hinali nag-abut ang mabaskug nga linog, sa bagay nga nag-uyug ang mga sadsaran sang bilanggoan; kag sa gilayon nagbukas ang tanan nga ganhaan kag nahubad ang mga gapus sang tagsatagsa.

27Ang manugbantay sang bilanggoan sang nakamata kag nakakita nga napamuksan ang mga ganhaan sang bilanggoan, naggabut sang iya espada kag buut nga manginmatay, nga nagahunahuna nga nakapalagyo ang mga binilanggo.

28Apang si Pablo nagsinggit sa mabaskug nga tingug, “Dili paghaliti ang imo kaugalingon, kay yari kami diri tanan.”

29Kag nagpanawag sia sing mga suga kag nagsulud sing madagmit, kag sang nagakurug sa kahadluk nagyaub sa atubangan ni Pablo kag ni Silas,

30kag gindala sila sa gowa kag nagsiling, “Mga ginoo, ano bala ang dapat ko himoon nga maluwas ako?”

31Kag nagsabat sila, “Magtoo kay Ginoong Jesus, kag maluwas ka, ikaw kag ang imo panimalay.”

32Kag ginhambal nila ang polong sang Ginoo sa iya kag sa tanan nga yara sa iya panimalay.

33Kag ginkuha niya sila sadtong takna sang kagab-ihon, kag ginhugasan ang ila mga pilas, kag nagpabautiso sia sa gilayon upud ang iya bug-os nga panimalay.

34Niyan ginpasaka niya sila sa iya balay, kag ginbutangan sing pagkaon; kag nagkalipay sia pati ang iya bug-os nga panimalay nga nagtoo sia sa Dios.

35Apang sang pagkaaga, ang mga hukom nagpadala sing mga polis, nga nagasiling, “Buhii yadtong mga tawo.”

36Kag ang manugbantay sang bilanggoan nagbalita sang mga polong kay Pablo, nga nagasiling, “Ang mga hukom nagpasogo nga buhian kamo; busa karon gowa kamo kag maglakat sa paghidait.”

37Apang si Pablo nagsiling sa ila, “Ginpabunal nila kami sa dayag, nga wala mahukmi, mga tawo nga mga Romanhon, kag ginbutang kami sa bilanggoan; kag karon pagowaon nila kami sa tago? Indi mahimo! kondi sila gid pakari-a kag pagowaon kami.”

38Ang mga polis nagbalita sining mga polong sa mga hukom, kag hinadlukan sila sang pagkabati nila nga mga Romanhon sila;

39gani nag-abut sila kag nagpakilooy sa ila. Kag sang napagowa nila sila ginpangayo nila sa ila nga maghalin sa banwa.

40Gani naggowa sila sa bilanggoan, kag nagsulud sa balay ni Lidia; kag sang nakita nila ang mga kauturan, ginlipay nila sila kag nagtaliwan.

← Chapter 15 Jump to: Chapter 17 →