Acts 19

Ilonggo (Ang Biblia (1982))

← Chapter 18 Jump to: Chapter 20 →

1Sang didto si Apolos sa Corinto, si Pablo naglatas sa kadutaan nga natakas kag nag-abut sa Efeso. Didto nakita niya ang pila ka gintoton-an.

2Kag nagsiling sia sa ila, “Nabaton bala ninyo ang Espiritu Santo sang nagtoo kamo?” Kag nagsabat sila, “Wala, wala kami bisan nakabati kon may Espiritu Santo.”

3Kag nagsiling sia, “Niyan sa ano bala ginabautisohan kamo?” Nagsabat sila, “Sa bautismo ni Juan.”

4Kag si Pablo nagsiling, “Si Juan nagbautiso sang bautismo sang paghinulsul, nga nagasiling sa katawohan nga magtoo sila sa magasonod sa iya, nga amo, si Jesus.”

5Sang pagkabati nila sini, ginbautisohan sila sa ngalan ni Ginoong Jesus.

6Kag sang natakdungan sila ni Pablo sang iya mga kamut, nag-abut sa ila ang Espiritu Santo; kag nagpamolong sila sing mga hambal kag nagpanagna.

7Mga napulog duha sila tanan.

8Kag nagsulud sia sa sinagoga kag nagpamolong nga may kasidla sa sulud sang tatlo ka bulan, nga nagapakigbais kag nagapatalupangud nahanungud sa ginharian sang Dios,

9apang sang nagpatig-a ang iban kag nagdumili sa pagtoo, nga nagapakalaut sang Dalan sa atubangan sang kadam-an, nagtaliwan sia sa ila, nga nagapain sang mga gintoton-an, kag nagapakigbais sa matag-adlaw sa buluthoan ni Tirano [kutub sa ikalimang takna tubtub sa ikanapilo].

10Ini nagpadayon sa sulud sang duha ka tuig, sa bagay nga ang tanan nga nagpuyo sa Asia nakabati sang polong sang Ginoo, tingub ang mga Judio kag Griego.

11Kag ginhimo sang Dios ang pinasahi nga mga kalatingalahan paagi sa mga kamut ni Pablo,

12sa bagay nga ang mga panyo ukon mga tampi gikan sa iya lawas gindala sa mga masakiton, kag ang mga balatian nagtaliwan sa ila kag ang malaut nga mga espiritu naggowa sa ila.

13Niyan ang iban sang nagalibud nga mga Judio nga mga manugsobol sang yawa naghimulat sa pagmitlang sang ngalan ni Ginoong Jesus sa may mga espiritung malaut, nga nagasiling, “Ginapasumpa ko kamo tungud kay Jesus nga ginawali ni Pablo.”

14Ang pito ka lalaking anak ni Sceva nga Judio, puno nga sacerdote, naghimo sini.

15Apang ang espiritu nga malaut nagsabat sa ila, “Nakilala ko si Jesus, kag nakilala ko si Pablo; apang sin-o bala kamo?”

16Kag ang tawo nga yara sa iya ang malaut nga espiritu naglumpat sa ila, gindaug sila, kag ginlutus tanan sila, sa bagay nga nagpalagyo sila nga hublas kag pilason sa sadtong balay.

17Kag ini nahibaloan sang tanan nga pumuluyo sa Efeso, tingub mga Judio kag Griego; kag hinadlukan sila tanan; kag ginpadaku ang ngalan ni Ginoong Jesus.

18Madamu man sang mga nagtoo nag-abut, nga nagatu-ad kag nagaasoy sang ila mga buhat.

19Kag indi diotay sang mga naghimo sing mga salamangka nagdala sing tingub sang ila mga tolon-an kag ginpanutdan nila ini sa itololok sang tanan; kag gin-isip nila ang bili sini kag nasapwan nga lima ka laksa ka bilog nga pilak.

20Gani nagtubo sing gamhanan ang polong sang Ginoo kag naglandas.

21Karon sa tapus sining mga hitabu si Pablo naghagna sa Espiritu sa pagkadto sa Jerusalem sang nakalatas sia sa Macedonia kag sa Acaya, nga nagasiling, “Sa tapus nga makakadto ako didto, kinahanglan ko man tan-awon ang Roma.”

22Kag sang ginpadala niya sa Macedonia ang duha sang mga nag-alagad sa iya, si Timoteo kag si Erasto, sia iya nagpabilin sa Asia sa diotay nga tion.

23Sa sadtong tion nahanabu ang indi diotay nga kagubut nahanungud sa Dalan.

24Kay ang isa ka tawo nga ginhingalanan si Demetrio, nga manugsalsal sang pilak, nga naghimo sing mga solosimbahan nga pilak ni Artemis, naghatag sing indi diotay nga palangitan-an sa mga manugsalsal.

25Ini sila gintipon niya, upud sang mga mamumugon sa kaangay nga buluhaton, kag nagsiling, “Mga ginoo, nakahibalo kamo nga sa sining palangitan-an nagagikan ang aton pagkabutang.

26Kag ginatan-aw ninyo kag ginapamatian nga indi lamang sa Efeso kondi daw sa bug-os nga Asia ining Pablo nakabuyok kag nakapalipas sang madamu nga katawohan, nga nagasiling nga indi mga dios ang mga ginhimo sang mga kamut.

27Kag indi lamang nga may katalagman nga ining aton palangitan-an manginmalain sing kabantugan kondi man nga ang templo sang daku nga diosa nga si Artemis manginwalay pulus, kag mapulak pa sia sa iya pagkadaku, sia nga ginasimba sang bug-os nga Asia kag sang kalibutan.”

28Sang pagkabati nila sini nagsingkal sila, kag nagsinggit, “Daku si Artemis sang mga taga-Efeso!”

29Gani ang banwa napuno sang kagubut; kag nagdaguso sila sing hiusa pa teatro, nga gindakup nila si Gayo kag si Aristarco, mga tawo nga taga-Macedonia nga kaupdanan ni Pablo sa panlakatan.

30Sang buut si Pablo magpatunga sa kadam-an, wala sia pagtuguti sang mga gintoton-an;

31ang pila man sang mga pangolo sa Asia, sanglit mga abyan niya, nagpasogo sa iya kag nagpakilooy sa iya nga indi sia magpangahas sa teatro.

32Karon ang iban nagsinggit sing isa ka butang, ang iban sing lain; kay ang katilingban nagkinagubut, kag ang kalabanan wala makahibalo kon sa ano nga nagtipon sila.

33Ginkuha nila sa tunga sang kadam-an si Alejandro, nga ginatulud sang mga Judio. Kag si Alejandro nagsinyas sang iya kamut, kag buut kuntani maghimo sing pag-apin sa katawohan.

34Apang sang nasayoran nila nga Judio sia, ang tanan nagsinggit sa isa ka tingug sa sulud sang duha ka takna, “Daku si Artemis sang mga taga-Efeso!”

35Kag sang napatunung sang escribano ang katawohan, nagsiling sia, “Mga taga-Efeso, sin-o bala nga tawo nga wala makahibalo nga ang banwa sang mga taga-Efeso amo ang manugbantay sang templo sang daku nga Artemis, kag sang larawan nga naholog gikan sa langit?

36Niyan kay indi malalis ining mga butang, dapat kamo magtawhay kag indi maghimo sing dasodaso.

37Kay gindala ninyo diri ining mga tawo nga indi mga matampalason ukon mapasipalahon sa aton diosa.

38Busa kon si Demetrio kag ang kaupud niya nga mga manugsalsal may butang batok sa bisan kay sin-o nga tawo, yara ang mga hukmanan, kag may mga proconsul; pasumbunga sila ang isa sa isa.

39Apang kon nagapangita kamo sing bisan ano nahanungud sa iban nga mga butang, husayon ini sa kinaugali nga pagtipon.

40Kay may katalagman kita nga isumbung nahanungud sang kinagamo sining adlaw, nga wala sing kabangdanan nga aton mahatag sa pagpakamatarung sining kinagubut.”

41Kag sang nakapamolong sia sini, ginpapauli niya ang katilingban.

← Chapter 18 Jump to: Chapter 20 →