Acts 21

Ilonggo (Ang Biblia (1982))

← Chapter 20 Jump to: Chapter 22 →

1Kag sang nakabulag kami sa ila kag nakalayag, nagtadlong kami pa Coos, kag sa adlaw nga madason pa Rodas, kag gikan didto pa Patara [kag Mira].

2Kag sang nakakita kami sing sakayan nga matabok pa Fenicia, nagsakay kami, kag naglayag.

3Sang nalantawan namon ang Cipre, ginligaran namon ini sa wala kag naglayag kami pa Siria, kag nagdungka sa Tiro; kay didto haw-asan ang sakayan sang iya lulan.

4Kag sang nakita namon ang mga gintoton-an, nagpabilin kami didto sing pito ka adlaw. Ginsilingan nila si Pablo paagi sa Espiritu nga dili magpadayon sia sa Jerusalem.

5Kag sang natapus ang amon mga adlaw didto, nagtaliwan kami kag nagpadayon sa amon panlakatan; kag sila tanan, pati ang mga asawa kag kabataan, nagdul-ong sa amon sa dalanon tubtub sa gowa sang banwa; kag sang nagaluhud kami sa baybayon nagpangamuyo kami kag nagpaalam sa isa kag isa.

6Niyan nagsakay kami sa sakayan, apang sila nagpauli.

7Sang natapus namon ang panakayon gikan sa Tiro, nag-abut kami sa Tolemaida; kag gin-abiabi namon ang mga kauturan kag nagpabilin sa ila sing isa ka adlaw.

8Sa adlaw nga madason nagtaliwan kami kag nag-abut sa Cesarea; kag nagsulud kami sa balay ni Felipe nga evangelista, nga isa sang pito, kag nagpabilin kami sa iya.

9Kag sia may apat ka anak nga babaying ulay, nga nagpanagna.

10Sang nagpabilin kami didto sing pila ka adlaw, nagdolhog gikan sa Judea ang isa ka manalagna nga ginhingalanan si Agabo.

11Kag sang nag-abut sia sa amon ginkuha niya ang wagkus ni Pablo kag gingapus ang iya kaugalingon nga mga tiil kag mga kamut, kag nagsiling, “Amo ini ang ginasiling sang Espiritu Santo, ‘Gapuson sing subong sini sang mga Judio sa Jerusalem ang tawo nga tag-iya sining wagkus kag itugyan nila sia sa mga kamut sang mga Gentil.’”

12Sang pagkabati namon sini, kami kag ang katawohan didto nagpakilooy sa iya nga indi magtaklad sa Jerusalem.

13Niyan si Pablo nagsabat, “Ano bala ang ginahimo ninyo, nga nagahibi kag nagapasubu sang akon tagiposoon? Kay handa ako indi lamang sa pagpagapus kondi man sa pagpanginmatay sa Jerusalem tungud sa ngalan ni Ginoong Jesus.”

14Kag sang indi sia mabuyok, nag-untat kami kag nagsiling, “Paghimoon ang kabubut-on sang Ginoo.”

15Sa tapus sining mga adlaw naghanda kami kag nagtaklad kami pa Jerusalem.

16Kag nag-upud sa amon ang pila sang mga gintoton-an gikan sa Cesarea, nga nagadala sa amon sa balay ni Mnason nga taga-Cipre, nga unang gintoton-an, nga amo ang dapat namon dayonan.

17Sang pag-abut namon sa Jerusalem, ginbaton kami sang mga kauturan sing malipayon.

18Sa madason nga adlaw si Pablo nagsulud kaupud namon sa pagpakigkita kay Santiago; kag didto man ang tanan nga katigulangan.

19Sang naabiabi niya sila, gintalastas niya sing tag-isaisa ang mga butang nga ginhimo sang Dios sa tunga sang mga Gentil paagi sa iya pagpanghikut.

20Kag sang pagkabati nila sini, ginhimaya nila ang Dios. Kag nagsiling sila sa iya, “Nakita mo, utud, kon pila ka linibolibo nga nagtoo nga yara sa mga Judio; sila tanan makugi nahanungud sa kasogoan,

21kag nasugiran sila nahanungud sa imo nga ginatudloan mo ang tanan nga Judio nga yara sa mga Gentil sa pagbiya kay Moises, nga nagasiling sa ila nga dili nila pagcircuncidahon ang ila kabataan ukon pagsondon ang mga kinabatasan.

22Niyan ano bala ang himoon? Sa walay duhaduha makabati sila nga nag-abut ka.

23Busa buhata ang amon ginasiling sa imo. May apat kami ka tawo nga may panaad;

24upda sila kag magpaninlo ka upud sa ila kag bayari ang ila mga balayran, agud nga magpakiskis sila sang ila mga olo. Sa amo ang tanan makahibalo nga walay kamatooran sa mga nasugid sa ila nahanungud sa imo kondi nga ikaw nagakabuhi sa pagbantay sang kasogoan.

25Apang nahanungud sa mga Gentil nga nagtoo, ginsulatan namon sang amon ginkasugtanan nga maglihi sila sa ginhalad sa mga diosdios kag sa dugo kag sa nakuga kag sa pagkamakihilawason. ”

26Niyan gin-upud ni Pablo ang mga tawo, kag sa adlaw nga madason sang nakapaninlo sia kaupud nila nagsulud sa templo, sa pagpahibalo kon san-o ang pagtuman sang mga adlaw sang pagpaninlo kag ang pagdolot sang halad tungud sa tagsatagsa sa ila.

27Sang nagahingapus ang pito ka adlaw, ang mga Judio gikan sa Asia, nga nakakita sa iya sa templo, nagsugyot sang bug-os nga kadam-an, kag nagdakup sa iya,

28nga nagasiling, “Mga tawo sa Israel, bulig kamo! Amo ini ang tawo nga nagapanudlo sa tanan nga tawo sa bisan diin batok sa katawohan kag sa kasogoan kag sa sining duug; kapin pa nagdala sia sing mga Griego man sa templo, kag gindagtaan niya ining balaan nga duug.”

29Kay nakita nila anay sa banwa kaupud niya si Trofimo nga taga-Efeso, kag ginbanta nila nga gindala sia ni Pablo sa templo.

30Niyan nagkinagubut ang bug-os nga banwa, kag nagdinagoso ang katawohan; gindakup nila si Pablo kag ginguyud sia sa gowa sang templo, kag sa gilayon gintakup ang mga gawang.

31Kag sang nagatinguha sila sa pagpatay sa iya, ginbalitaan ang tribuno sang kabon nga ang bug-os nga Jerusalem nagkinagubut.

32Sa gilayon nagdala sia sing mga soldado kag mga capitan, kag nagdolhog sing dalidali sa ila; kag sang nakita nila ang tribuno kag ang mga soldado, gin-untatan nila ang pagbunal kay Pablo.

33Niyan ang tribuno nagpalapit kag gindakup niya sia, kag ginpagapus sia sing duha ka talikala. Ginpamangkot niya kon sin-o sia kag kon ano ang iya nahimo.

34Ang iban sa kadam-an nagsinggit sing isa ka butang, ang iban sing lain; kag sang indi niya mahibaloan ang kamatooran bangud sang kagahud, nagsogo sia nga dalhon sia sa pamakud.

35Kag sang pag-abut niya sa mga halintang, ginhakwat sia sang mga soldado bangud sang kalugus sang kadam-an;

36kay ang kadam-an sang katawohan nagsonod, nga nagasinggit, “Patya sia!”

37Sang dalalhon na si Pablo sa pamakud, nagsiling sia sa tribuno, “Makahambal bala ako sa imo?” Kag nagsiling sia, “Makahibalo ka bala sang Griego?

38Niyan indi bala ikaw ang Egiptohanon, nga sang bag-ong nagligad, nagsugyot sa pagribok kag nagdala sa kamingawan sang apat ka libo sang mga Mamumuno?”

39Si Pablo nagsiling, “Ako Judio, nga taga-Tarso sa Cilicia, banwahanon sang dikubus nga banwa; nagapakilooy ako sa imo, nga tugutan mo ako sa paghambal sa katawohan.”

40Kag sang natugutan niya sia, si Pablo, nga nagatindug sa hagdan, nagsinyas sang iya kamut sa katawohan; kag sang nagtinong na gid, nagpamolong sia sa hambal nga Hebreo, nga nagasiling:

← Chapter 20 Jump to: Chapter 22 →