Acts 13 — Ilonggo (Ang Biblia (1982))

1Karon sa iglesia sa Antioquia may mga manalagna kag mga manunudlo, si Bernabe, si Simeon nga gintawag si Niger, si Lucio nga taga-Cirene, si Manaen nga kasoso ni Herodes nga tetrarca, kag si Saulo.

2Sang nagasimba sila sa Ginoo kag nagapuasa, ang Espiritu Santo nagsiling, “Ipain ako kay Bernabe kag kay Saulo sa buluhaton nga sa amo gintawag ko sila.”

3Niyan sang nakapuasa sila kag nakapangamuyo kag natakdungan sila sang ila mga kamut, ginpalakat nila sila.

4Gani, sang ginpadala sila sang Espiritu Santo, nagdolhog sa Seleucia; kag gikan didto nagsakay sila pa Cipre.

5Sang nakadangat sila sa Salamina, ginbantala nila ang polong sang Dios sa mga sinagoga sang mga Judio. Kag kaupud nila si Juan nga kabulig nila.

6Sang nalatas nila ang bug-os nga pulo tubtub sa Pafo, nakita nila ang manugbabaylan nga Judio, nga manalagna nga dimatuud, nga ang iya ngalan si Bar-Jesus.

7Sia kaupud sang proconsul, si Sergio Paulo, tawo nga mahinangponon, nga nagpatawag kay Bernabe kag kay Saulo kag nagtinguha sa pagpamati sang polong sang Dios.

8Apang si Elimas nga manugbabaylan (kay amo ini ang iya ngalan kon patpaton) nagsumpung sa ila, nga nagatinguha sa pagpatalang sa pagtoo sang proconsul.

9Apang si Saulo nga gintawag man si Pablo, nga puno sang Espiritu Santo, nagpaungut sang iya mga mata sa iya

10kag nagsiling, “Ikaw nga puno sang tanan nga limbong kag kalag-it, anak sang yawa, kaaway sang tanan nga pagkamatarung, indi ka bala mag-untat sa pagpatiko sang matadlong nga mga banas sang Ginoo?

11Kag karon, tan-awa, ang kamut sang Ginoo yara sa imo, kag mabulag ka nga may tion nga indi makakita sang adlaw.” Sa gilayon naholog sa iya ang kakarap kag kadulum kag nagdalangdalang sia nga nagapangita kon sin-o ang makatuytuy sa iya.

12Niyan ang proconsul nagtoo, sang nakita niya ang nahimo, kay naorongan sia sang pagtolon-an sang Ginoo.

13Karon si Pablo kag ang iya mga kaupdanan nagpalayag gikan sa Pafo, kag nagdungka sa Perge sa Panfilia. Kag si Juan nagbulag sa ila kag nagbalik sa Jerusalem;

14apang sila sang naglatas gikan sa Perge nag-abut sa Antioquia sang Pisidia. Kag sa adlaw nga inugpahuway nagsulud sila sa sinagoga kag naglingkod.

15Sa tapus ang pagbasa sang kasogoan kag sang mga manalagna, ang mga manugdumala sang sinagoga nagpasogo sa ila, nga nagasiling, “Mga kauturan, kon may polong kamo nga laygay sa katawohan, ihambal ninyo.”

16Gani si Pablo nagtindug, kag sang nakasinyas sia sang iya kamut nagsiling: “Mga tawo sa Israel, kag kamo nga mahinadlukon sa Dios, pamati kamo.

17Ang Dios sining katawohan nga Israel nagpili sang aton mga ginikanan kag ginbayaw niya ang katawohan sang sila dumoloong sa duta sang Egipto, kag ginpagowa niya sila sa gamhanan nga butkon.

18Kag sa kap-atan ka tuig ginbatas niya sila sa kamingawan.

19Kag sang nalaglag niya ang pito ka pungsud sa duta sang Canaan, ginhatag niya sa ila ang ila duta nga panublion, sa mga apat ka gatus kag kalim-an ka tuig.

20Kag sa tapus sini ginhatagan niya sila sing mga hukom tubtub kay Samuel nga manalagna.

21Niyan nagpangayo sila sing hari; kag ginhatag sa ila sang Dios si Saul nga anak ni Cis, tawo sa kabikahan ni Benjamin, sa sulud sang kap-atan ka tuig.

22Kag sang napahalin niya sia, ginpatindug niya si David nga manginhari nila, nga sa iya man nagsaksi sia kag nagsiling, ‘Nakita ko si David nga anak ni Jese tawo nga sono sa akon tagiposoon, nga magahimo sang bug-os nakon nga kabubut-on.’

23Sa kaliwat sining tawo sono sa saad ang Dios nagdala sa Israel sing Manluluwas, si Jesus.

24Sa wala pa sia magkari si Juan nagwali sing una sang bautismo sang paghinulsul sa bug-os nga katawohan sang Israel.

25Kag sang nagahingapus si Juan sang iya buluhaton, nagsiling sia, ‘Sin-o bala ako sa banta ninyo? Indi ako sia. Apang yari karon, may nagasonod sa akon nga indi ako takus sa paghubad sang sandalias sa iya mga tiil.’

26“Mga kauturan, mga anak sa kaliwat ni Abraham, kag ang yara sa inyo nga mahinadlukon sa Dios, sa aton ginpadala ang polong sining kaluwasan.

27Kay ang mga nagapuyo sa Jerusalem kag ang ila mga manugdumala, bangud nga wala sila makakilala sa iya ukon sang mga tingug sang mga manalagna nga ginabasa sa tagsa ka adlaw nga inugpahuway, nagtuman sini paagi sa pagtagudili sa iya.

28Bisan wala sila sing nakita nga kabangdanan sang kamatayon sa iya, walay sapayan ginpangayo nila kay Pilato nga patyon sia.

29Kag sang natuman nila ang tanan nga nasulat nahanungud sa iya, ginkuha nila sia sa kahoy, kag ginbutang sia sa lulubngan.

30Apang ginbanhaw sia sang Dios;

31kag nakita sia sa madamu nga mga adlaw sang mga nagtaklad kaupud niya gikan sa Galilea pa Jerusalem, nga karon mga saksi niya sa katawohan.

32Kag kami nagadala sa inyo sang maayong balita nga ang ginsaad sang Dios sa mga ginikanan,

33ini gintuman niya sa aton nga ila mga anak sa pagbanhaw kay Jesus; subong man nga nasulat sa ikaduha nga salmo, ‘Ikaw amo ang akon Anak, karon nga adlaw nangin-amay mo ako.’

34Kag nahanungud sang kamatooran nga ginbanhaw niya sia, nga karon indi na magbalik sa kaduluntan, nagpamolong sia sa sining bagay, ‘Ihatag ko sa inyo ang balaan kag malig-on nga mga pagpakamaayo kay David.’

35Busa nagsiling man sia sa isa pa ka salmo, ‘Indi mo pag-itugut nga ang imo Balaan makakita sing kaduluntan.’

36Kay si David, sa tapus nga nakaalagad sia sang kabubut-on sang Dios sa iya kaliwatan, nagtolog, kag ginpahamtang upud sa iya mga ginikanan, kag nakakita sing kaduluntan;

37apang sia nga ginbanhaw sang Dios wala makakita sing kaduluntan.

38Busa kilalaha ninyo, mga kauturan, nga paagi sining tawo ginabantala sa inyo ang kapatawaran sang mga sala,

39kag paagi sa iya ang tagsatagsa nga magtoo ginapakamatarung sa tanan nga butang diin indi kamo mapakamatarung paagi sa kasogoan ni Moises.

40Busa, andam kamo, basi mag-abut sa inyo ang napamolong sa mga manalagna:

41‘Tan-aw, kamo nga mga mayubiton, kag magkatingala, kag magkalawala; kay nagahimo ako sing buhat sa inyo mga adlaw, buhat nga indi ninyo nga mas-a pagpatihon, kon ang isa mag-asoy sini sa inyo.’ ”

42Sang naggowa sila, nagpakilooy ang katawohan nga ining mga polong mahambal sa ila sa madason nga adlaw nga inugpahuway.

43Kag sang pagbulublag sang pagtilipon sa sinagoga, madamu sang mga Judio kag sang mga mainampoon nga pinaliso sa Judaismo nagsonod kay Pablo kag kay Bernabe, nga nagpamolong kag nagbuyok sa ila sa pagpadayon sa bugay sang Dios.

44Sa madason nga adlaw nga inugpahuway ang kalabanan sang banwa nagtipon sa pagpamati sang polong sang Dios.

45Apang sang nakita sang mga Judio ang mga kadam-an, napuno sila sing kahisa, kag ginsumpung ang mga butang nga ginpamolong ni Pablo, kag ginpasipalahan sia.

46Kag si Pablo kag si Bernabe nagpamolong sing masidla, kag nagsiling, “Kinahanglan nga ang polong sang Dios ihambal sing una sa inyo. Sanglit ginsikway ninyo ini, kag ginhukman ang inyo kaugalingon nga ditakus sang kabuhing walay katapusan, yari karon, nagaliso kami sa mga Gentil.

47Kay amo ini ang ginsogo sa amon sang Ginoo, nga nagasiling, ‘Ginbutang ko ikaw nga kapawa sang mga Gentil, agud nga magdala ka sing kaluwasan tubtub sa mga ukbung sang duta.’ ”

48Kag sang pagkabati sang mga Gentil sini, nagkasadya sila kag ginhimaya ang polong sang Dios; kag ang kapid-an nga gintangdoan sa kabuhing walay katapusan nagtoo.

49Kag ang polong sang Ginoo naglapnag sa bug-os gid nga duug.

50Apang ginsugyot sang mga Judio ang mga mainampoon kag lutaw nga mga babayi kag ang mga punoan sang banwa, kag nagsutsut sing paghingabut batok kay Pablo kag kay Bernabe, kag ginsobol sila sa ila ginsakpan.

51Apang gintaktak nila ang yab-ok sa ila mga tiil batok sa ila, kag nagkadto sa Iconio.

52Kag ang mga gintoton-an napun-an sang kalipay kag sang Espiritu Santo.