Acts 11

Ilonggo (Ang Biblia (1982))

← Chapter 10 Jump to: Chapter 12 →

1Karon ang mga pinadala kag ang mga kauturan nga didto sa Judea nakabati nga ang mga Gentil man nagbaton sang polong sang Dios.

2Gani sang nakataklad si Pedro sa Jerusalem, ang mga sa circuncision nakigsuay sa iya,

3nga nagasiling, “Ngaa bala nagsulud ka sa mga tawo nga dicircuncidado kag nagkaon kaupud nila?”

4Apang si Pedro nagsugud kag nagtalastas sa ila sing pasonod:

5“Didto ako nga nagapangamuyo sa banwa sang Joppe; kag sa isa ka pagpanganinaw, nakakita ako sing palanan-awon, ang isa ka suludlan nga nagapaubus, nga gintonton sa apat ka pusud gikan sa langit; kag ini naglambut gid sa akon.

6Sang nahimutaran ko ini sang akon mga mata akon namulalongan ang mga sapat sa duta kag ang talonon nga mga sapat kag ang nagasalaug kag ang kapispisan sa langit.

7Kag nakabati man ako sing tingug nga nagasiling sa akon, ‘Tindug ka, Pedro; mag-ihaw kag magkaon.’

8Apang nagsiling ako, ‘Indi, Ginoo: kay wala pa sing bisan ano nga nadagtaan ukon dimatinlo nga nakasulud sa akon baba.’

9Apang sa ikaduha nagsabat ang tingug gikan sa langit, ‘Ang natinloan sang Dios indi mo pagkabigon nga nadagtaan.’

10Natabu ini sa makatlo, kag ang tanan ginbatak liwat pa langit.

11Sa sadto gid nga tion nag-abut ang tatlo ka tawo sa balay diin didto kami, nga ginpadala sa akon gikan sa Cesarea.

12Kag ang Espiritu nagsiling sa akon sa pag-upud sa ila sa walay pangduhaduha. Ining anum ka kauturan man nag-upud sa akon, kag nagsulud kami sa balay sang tawo.

13Kag nagsugid sia sa amon kon paano nga nakita niya ang manugtunda nga nagatindug sa iya balay kag nagasiling, ‘Pagpadala ka sa Joppe kag ipakuha si Simon nga gintawag si Pedro;

14sia magahambal sa imo sing mga polong nga paagi sini maluwas ka, ikaw kag ang bug-os mong panimalay.’

15Sang nagsugud ako sa pagpamolong, ang Espiritu Santo naholog sa ila subong sang sa aton sa ginsuguran.

16Kag nadumduman ko ang polong sang Ginoo, kon paano nga nagsiling sia, ‘Si Juan nagbautiso sa tubig, apang bautisohan kamo sa Espiritu Santo.’

17Niyan kon ang Dios naghatag sa ila sang amo nga hiyas subong sang sa aton sang pagtoo ta kay Ginoong Jesu-Cristo, sin-o ako bala nga makasumpung sa Dios?”

18Sang pagkabati nila sini, naghipus sila. Kag naghimaya sila sa Dios, nga nagasiling, “Niyan ang Dios naghatag sa mga Gentil man sing paghinulsul pa kabuhi.”

19Karon ang mga nag-aplaag bangud sang paghingabut nga nagdangat nahanungud kay Esteban nagpanlakatan tubtub sa Fenicia kag Cipre kag Antioquia, nga wala nagahambal sang polong sa bisan kay sin-o kondi sa mga Judio lamang.

20Apang may iban sa ila, mga tawo nga taga-Cipre kag taga-Cirene, nga sang pag-abut nila sa Antioquia nagpamolong sa mga Griego man, nga ginawali si Ginoong Jesus.

21Kag ang kamut sang Ginoo yara sa ila, kag ang madamu nga nagtoo nagliso sa Ginoo.

22Ang balita nahanungud sa ila nadunggan sang iglesia nga didto sa Jerusalem, kag ginpadala nila si Bernabe sa Antioquia.

23Sang pag-abut niya kag nakakita sang bugay sang Dios, nalipay sia; kag ginlaygayan niya sila tanan sa pagpadayon sing matutum sa Ginoo sa malig-on nga katuyoan;

24kay maayo sia nga tawo, puno sang Espiritu Santo kag sang pagtoo. Kag madamu nga tawo ang gindugang sa Ginoo.

25Gani nagkadto si Bernabe sa Tarso sa pagpangita kay Saulo;

26kag sang nakita niya sia, iya gindala sia sa Antioquia. Sa bilog nga tuig nag-impon sila sa iglesia, kag nagpanudlo sa madamu nga katawohan; kag ang mga gintoton-an gintawag sing una nga mga Cristohanon sa Antioquia.

27Karon sa sining mga adlaw nagdolhog ang mga manalagna gikan sa Jerusalem pa Antioquia.

28Kag nagtindug ang isa sa ila nga ginhingalanan si Agabo kag nagpakita paagi sa Espiritu nga magaabut ang daku nga tiggulutum sa bug-os nga kalibutan; kag ini nahanabu sa mga adlaw ni Claudio.

29Kag ang mga gintoton-an, sono sa ikasarang sang tagsa ka tawo, nagtapat sa pagpadala sing bulig sa mga kauturan nga nagapuyo sa Judea;

30kag amo ang ila ginhimo, nga ginapadala ini sa mga tigulang paagi sa kamut ni Bernabe kag ni Saulo.

← Chapter 10 Jump to: Chapter 12 →