Acts 5

Ilonggo (Ang Biblia (1982))

← Chapter 4 Jump to: Chapter 6 →

1Apang ang isa ka tawo nga ginhingalanan si Ananias upud kay Safira nga iya asawa nagbaligya sing pagkabutang,

2kag ginlikman niya ang bahin sang bili, kag nahibal-an ini sang iya asawa, kag gindala ang isa ka bahin kag ginbutang ini sa tiilan sang mga pinadala.

3Apang si Pedro nagsiling, “Ananias, ngaa bala gintugub ni Satanas ang imo tagiposoon sa pagbutig sa Espiritu Santo kag paglikum sang bahin sang bili sang duta?

4Sang imo pa ini, indi bala dayon nga imo kaugalingon? Kag sa nabaligya na ini, wala bala sa imo gahum? Paano bala nga napainoino mo ini nga butang sa imo tagiposoon? Wala ka magbutig sa mga tawo, kondi sa Dios.”

5Sang pagkabati ni Ananias sining mga polong, napukan sia kag napatay. Kag gindakup sing daku nga kahadluk ang tanan nga nakabati sini.

6Ang mga pamatan-on nga lalaki nagtindug kag ginputus nila sia kag ginpagowa sia kag ginlubung.

7Sa may mga tatlo ka takna nga nagligad nagsulud ang iya asawa, nga wala makahibalo sang nahanabu.

8Kag si Pedro nagsiling sa iya, “Isugid sa akon kon ginbaligya ninyo ang duta sa amo nga bili.” Kag nagsabat sia, “Hoo, sa amo.”

9Apang si Pedro nagpamangkot sa iya, “Ngaa bala nagkasugtanay kamo sa pagtilaw sa Espiritu sang Ginoo? Pamatii, sa ganhaan ang mga tiil sang mga naglubung sang imo bana, kag dalhon ka nila sa gowa.”

10Sa gilayon napukan sia sa tiilan ni Pedro kag napatay. Sang nagsulud ang mga pamatan-on nga lalaki nakita nila sia nga patay, kag gindala nila sia sa gowa kag ginlubung sa luyo sang iya bana.

11Kag gindakup sing daku nga kahadluk ang bug-os nga iglesia, kag ang tanan nga nakabati sining mga butang.

12Karon paagi sa mga kamut sang mga pinadala madamu nga tanda kag kalatingalahan ang nahimo sa katawohan. Kag yadto sila tanan sing tingub sa Portico ni Salomon.

13Wala sang iban nga nagpangahas sa pag-impon sa ila, apang ang katawohan nagkabig sa ila sa mataas nga kadungganan.

14Kag nagdugang pa gid ang mga tomoloo sa Ginoo, mga kadam-an sang mga lalaki kag mga babayi,

15sa bagay nga gindala nila ang mga masakiton sa mga dalan, kag ginbutang sila sa mga higdaan kag sa mga langkapan, agud nga sa paglabay ni Pedro bisan ang iya landong lamang makatupa sa iban sa ila.

16Nagduguk man ang katawohan gikan sa mga banwa sa palibut sang Jerusalem, nga nagadala sing mga masakiton kag sang mga ginsakit sang mga espiritu nga dimatinlo, kag ang tagsatagsa sa ila nag-ayo.

17Apang ang pinakamataas nga sacerdote nagtindug kag ang tanan nga kaupud niya, nga amo, ang bunghay sang mga Saduceo, kag sa napuno sing kahisa

18gindakup nila ang mga pinadala kag ginsulud sila sa bilanggoan sang banwa.

19Apang sa kagab-ihon ang manugtunda sang Ginoo nagbukas sang mga ganhaan sang bilanggoan kag ginpagowa sila kag nagsiling,

20“Kadto kamo kag magtindug sa templo kag magpamolong sa katawohan sang tanan nga polong sining Kabuhi.”

21Kag sang pagkabati nila sini, nagsulud sila sa templo sa nagapamanagbanag kag nagpanudlo. Karon ang pinakamataas nga sacerdote nag-abut kag ang mga kaupud niya kag gintipon ang corte kag ang tanan nga tigulang sang Israel, kag ginpakadtoan ang bilanggoan sa pagpakuha sa ila.

22Apang ang mga tulugyanan nga nag-abut wala makakita sa ila sa bilanggoan, kag nagbalik sila kag nagsugid,

23“Ang bilanggoan nakita namon nga natakpan sing malig-on kag ang mga manugbantay nagatindug sa mga ganhaan, apang sang pagbukas namon wala kami sing nakita nga tawo sa sulud.”

24Karon sang pagkabati sang capitan sang templo kag sang puno nga mga sacerdote sining mga polong, ginlibogan sila nahanungud sa ila, kon ano ayhan ang madangtan sini.

25Kag may isa nga nag-abut kag nagsugid sa ila, “Ang mga tawo nga ginsulud ninyo sa bilanggoan yadto sa templo nagatindug kag nagapanudlo sa katawohan.”

26Niyan ang capitan nagkadto upud sang mga tulugyanan kag gindala sila, sa walay paglugus, kay nahadluk sila sa katawohan basi kon batohon sila.

27Kag sang nadala nila sila, ginpaatubang nila sila sa corte. Kag ang pinakamataas nga sacerdote nagpamangkot sa ila,

28nga nagasiling, “Gintugnan namon kamo sing maid-id nga indi magpanudlo sa sining ngalan, walay sapayan ginpuno ninyo ang Jerusalem sang inyo pagtolon-an kag buut ninyo kami pasangtan sang dugo sining tawo. ”

29Apang si Pedro kag ang mga pinadala nagsabat, “Kami kinahanglan magtuman sa Dios sang sa mga tawo.

30Ang Dios sang aton mga ginikanan nagbanhaw kay Jesus nga ginpatay ninyo paagi sa pagbitay sa kahoy.

31Sia ginbayaw sang Dios sa iya too subong nga Pangolo kag Manluluwas, sa paghatag sing paghinulsul sa Israel kag kapatawaran sang mga sala.

32Kag kami mga saksi sa sining mga butang, kag amo man ang Espiritu Santo nga nahatag sang Dios sa mga nagatuman sa iya.”

33Sang pagkabati nila sini naalipungut sila kag buut magpatay sa ila.

34Apang sa corte ang Fariseo nga ginhingalanan si Gamaliel, isa ka manunudlo sang kasogoan, nga halangdon sa bug-os nga katawohan, nagtindug kag nagsogo nga pagowaon anay ang mga tawo.

35Kag nagsiling sia sa ila, “Mga tawo sang Israel, mag-andam kamo sang himoon ninyo nahanungud sining mga tawo.

36Kay una sining mga adlaw nagtindug si Teudas, nga nagapakasin-o, kag nag-impon sa iya ang mga apat ka gatus ka tawo; apang ginpatay sia kag ang tanan nga nagtuman sa iya ginpaaplaag kag nanginwalay pulus.

37Madason sining tawo nagtindug si Judas nga taga-Galilea sa mga adlaw sang pagpanglista kag napasonod sa iya ang pila sang katawohan; sia man nawala, kag ang tanan nga nagsonod sa iya nag-aplaag.

38Gani karon nagasiling ako sa inyo, palayo kamo sa sining mga tawo kag pabayai lang sila; kay kon ining katuyoan ukon ining buhat iya sang mga tawo, mabungkag ini;

39apang kon iya sang Dios, indi kamo makasarang sa pagbungkag sa ila. Basi masapwan pa kamo nga nagapakig-away sa Dios!”

40Gani nagsugut sila sa iya, kag sang natawag nila ang mga pinadala, ginbunal nila sila kag gintugnan nga indi maghambal sa ngalan ni Jesus, kag ginbuhian sila.

41Niyan naghalin sila sa atubangan sang corte, nga nagakalipay nga naisipan sila nga takus sa pag-antus sing kahuluy-an tungud sa ngalan.

42Kag sa adlawadlaw sa templo kag sa puluy-an wala sila mag-untat sa pagpanudlo kag pagwali kay Jesus subong nga Cristo.

← Chapter 4 Jump to: Chapter 6 →