Acts 25

Ilonggo (Ang Biblia (1982))

← Chapter 24 Jump to: Chapter 26 →

1Busa si Festo sang nakaabut sa puud, sa tapus ang tatlo ka adlaw nagtaklad pa Jerusalem gikan sa Cesarea.

2Kag ang puno nga mga sacerdote kag ang pangolo sa mga Judio nagsugid sa iya batok kay Pablo; kag nagpakilooy sila sa iya,

3nga nagapangayo sing pangabay nga ipatawag niya sia sa Jerusalem, nga nagahimos sing pagpuut sa pagpatay sa iya sa dalanon.

4Si Festo nagsabat nga si Pablo ginbantayan sa Cesarea, kag nga sia iya manugkadto didto sa indi madugay.

5“Gani,” nagsiling sia, “magdolhog kaupud nakon ang mga gamhanan sa inyo, kag kon may dinagakaigo nga butang sa sining tawo, isumbung nila sia.”

6Sang nakapabilin sia sa ila sing indi kapin sa walo ukon napulo ka adlaw, nagdolhog sia sa Cesarea; kag sa madason nga adlaw nagpungko sia sa lingkoran nga hukmanan kag nagsogo nga dalhon si Pablo.

7Kag sang pag-abut niya, ang mga Judio nga nagdolhog gikan sa Jerusalem naglibut sa iya, nga nagadala sing madamu kag mabug-at nga mga sumbung batok sa iya nga indi nila mapamatud-an.

8Si Pablo nagsiling sa iya pangapin, “Wala ako makasala batok sa kasogoan sang mga Judio, ukon batok sa templo, ukon batok kay Cesar.”

9Apang si Festo, nga buut magpahamuut sa mga Judio, nagsabat kay Pablo, “Buut ka bala magtaklad pa Jerusalem, kag didto magpahukom nahanungud sining butang sa atubangan ko?”

10Apang si Pablo nagsiling, “Ako nagatindug sa atubangan sang lingkoran nga hukmanan ni Cesar, diin ako dapat paghukman; wala ako sing nahimo nga kalainan sa mga Judio, subong nga nahibaloan mo man sing maayo.

11Niyan kon ako malinapason, kag nakahimo sing butang nga takus sa kamatayon, indi ako mangindi nga mapatay; apang kon walay ano man sa sadtong ginasumbung nila sa akon, walay tawo nga makatugyan sa akon sa ila. Nagadangup ako kay Cesar.”

12Niyan si Festo, sang nakapakigsapul sa corte, nagsabat, “Nagdangup ka kay Cesar; sa kay Cesar ka makadto.”

13Karon sang nagligad ang pila ka adlaw, nag-abut sa Cesarea ang hari nga si Agripa kag si Bernice sa pag-abiabi kay Festo.

14Kag sang nagpabilin sila didto sing madamu nga adlaw, gin-asoy ni Festo ang kasaba ni Pablo sa atubangan sang hari, nga nagasiling, “May tawo nga nabilin nga binilanggo ni Felix;

15kag sang didto ako sa Jerusalem, ang puno nga mga sacerdote kag ang mga tigulang sang mga Judio nagsugid sa akon nahanungud sa iya, nga nagapangayo nga pagtagudilian sia.

16Nagsabat ako sa ila nga indi batasan sang mga Romanhon ang pagtugyan sang bisan sin-o nga tawo sa wala pa ang sinumbung mapaatubang sa mga manunumbung, kag mahatagan sing kahigayonan sa paghimo sang iya pangapin nahanungud sa butang nga ginsumbung batok sa iya.

17Busa sang pag-abut nila diri sing tingub, wala ako magpabuyanbuyan, kondi sa adlaw nga madason naglingkod ako sa lingkoran nga hukmanan kag nagsogo nga dalhon ang tawo.

18Sang nagtindug ang mga manunumbung, wala sila sing ginsumbung nahanungud sa iya kasaba sang malain nga mga butang nga akon ginbanta;

19kondi sila may pila ka kasuayon batok sa iya nahanungud sa ila kaugalingon nga diwata kag nahanungud sa isa nga si Jesus, nga napatay, apang ginpamatud-an ni Pablo nga buhi.

20Ako nga ginaligban kon paano ang pag-usisa sining mga butang, nagpamangkot kon buut sia magkadto sa Jerusalem kag didto paghukman nahanungud sining mga butang.

21Apang sang pagdangup ni Pablo nga ihulat tubtub sa paghukom sang Emperador, nagsogo ako nga bantayan sia tubtub nga mapadala ko sia kay Cesar.”

22Kag si Agripa nagsiling kay Festo, “Ako man luyag magpamati sa tawo.” Nagsiling sia, “Buwas magapamati ka sa iya.”

23Gani sa adlaw nga madason nag-abut si Agripa kag si Bernice sa daku nga kadayawan, kag nagsulud sila sa hulut nga palamatian kaupud ang mga tribuno kag ang mga pangolo sang banwa. Niyan sa sogo ni Festo ginpasulud si Pablo.

24Kag si Festo nagsiling, “Haring Agripa kag tanan nga tawo nga yari diri nagatambung kaupud namon, ginatan-aw ninyo ining tawo nga nahanungud sa iya ang bug-os nga kadam-an sang mga Judio nagdangup sa akon, sa Jerusalem kag diri, nga naga singgit nga indi dapat nga magkabuhi pa sia.

25Apang nakita ko nga wala sia sing nahimo nga takus sa kamatayon; kag bangud nga sia gid nagdangup sa emperador, nagtapat ako sa pagpadala sa iya.

26Apang nahanungud sa iya wala ako sing pat-ud nga butang nga ikasulat sa akon ginoo. Busa ginapaatubang ko sia sa inyo, kag labi na gid sa atubangan mo, Haring Agripa, agud nga, sa tapus ang pag-usisa, may ikasulat ako.

27Kay sa akon daw dinagakaigo, ang pagpadala sang isa ka binilanggo, nga indi mapahayag ang mga sumbung batok sa iya.”

← Chapter 24 Jump to: Chapter 26 →