Acts 3

Ilonggo (Ang Biblia (1982))

← Chapter 2 Jump to: Chapter 4 →

1Karon si Pedro kag si Juan nagasaka sa templo sa tion sang pangamuyo, nga ikasiam nga takna.

2Kag isa ka tawo nga piang kutub sa tiyan sang iya iloy gindala, nga ginbutang nila adlawadlaw sa gawang sang templo nga ginatawag Matahum sa pagpakilimos sa mga nagsulud sa templo.

3Sang pagkakita niya kay Pedro kag kay Juan nga manugsulud sa templo, nagpangayo sia nga limosan.

4Kag si Pedro sang nagapaungut sang iya mga mata sa iya, upud kay Juan, nagsiling, “Tolok ka sa amon.”

5Kag nagpati sia sa ila, nga nagapaabut nga may batonon sa ila.

6Apang si Pedro nagsiling, “Wala ako pilak kag bulawan, apang ang yari sa akon ginahatag ko sa imo; sa ngalan ni Jesu-Cristo nga Nazaretnon, lakat ka.”

7Kag ginkaptan niya sia sa kamut nga too kag ginpatindug sia; kag sa gilayon nagbaskug ang iya mga tiil kag mga bukobuko.

8Kag sa nagatumbo nagtindug sia kag naglakat kag nagsulud kaupud nila sa templo, nga nagalakat kag nagatumbotumbo kag nagadayaw sa Dios.

9Kag ang bug-os nga katawohan nakakita sa iya nga nagalakat kag nagadayaw sa Dios,

10kag nakilala nila sia nga amo sia ang naglingkod sa pagpakilimos sa Gawang nga Matahum sang templo; kag napuno sila sing katingala kag kahangawa sa nahanabu sa iya.

11Sang nagkaput sia kay Pedro kag kay Juan, ang bug-os nga katawohan nagduguk sa ila sa portico nga gintawag iya ni Salomon, nga nagakatingala sing daku.

12Kag sang pagkakita ni Pedro sini nagpamolong sia sa katawohan, “Kamo nga mga tawo sa Israel, ngaa bala nagakatingala kamo sa sini, ukon ngaa ginapaungutan ninyo kami sang inyo mga mata, subong nga daw sa amon kaugalingon nga gahum ukon pagkadiosnon napalakat namon sia?

13Ang Dios ni Abraham kag ni Isaac kag ni Jacob, ang Dios sang aton mga ginikanan, naghimaya sang iya alagad nga si Jesus, nga gintugyan ninyo kag ginpanghiwala sa atubangan ni Pilato, sang sia nakatapat sa pagbuhi sa iya.

14Apang ginpanghiwala ninyo ang Balaan kag Matarung, kag ginpangayo nga itugut sa inyo ang manugpatay,

15kag ginpatay ang Manunuga sang kabuhi, nga ginbanhaw sang Dios. Sa sini mga saksi kami.

16Kag ang iya ngalan, paagi sa pagtoo sa iya ngalan, nagpabaskug sining tawo, nga inyo natan-aw kag nakilala; kag ang pagtoo nga paagi kay Jesus nakahatag sa iya sining himpit nga pag-ayo sa atubangan ninyo tanan.

17“Kag karon, mga kauturan, nahibaloan ko nga ginhimo ninyo ini sa dipagkaalam, subong sang ginhimo man sang inyo mga manugdumala.

18Apang ang mga butang nga ginbantala na sang Dios sa baba sang tanan nga manalagna, nga ang iya Cristo mag-antus, amo ang gintuman niya.

19Busa hinulsul kamo, kag magliso, agud mapanas ang inyo mga sala, kag mag-abut ang mga panag-on sang pagpaumpaw gikan sa atubangan sang Ginoo,

20kag ipadala niya ang Cristo nga gintangdoan sa inyo, si Jesus,

21nga dapat pagbatonon sang langit tubtub sa tion sang pagpasag-uli sang tanan nga ginpamolong sang Dios sa baba sang iya balaan nga mga manalagna kutub sa dumaan.

22Si Moises nagsiling, ‘Ang isa ka manalagna bangonon sang Ginoong Dios sa inyo gikan sa tunga sang inyo mga kauturan kaangay sa akon. Sa iya magapamati kamo sa tanan nga ipamolong niya sa inyo.

23Kag mahanabu nga ang tagsa ka kalag nga indi magpamati sa sadtong manalagna laglagon gikan sa tunga sang katawohan. ’

24Kag ang tanan nga manalagna kutub kay Samuel kag ang mga nagsonod, nga nagpamolong, sila man nagsugid nahanungud sining mga adlaw.

25Kamo amo ang mga anak sang mga manalagna kag sang katipan nga ginhimo sang Dios sa inyo mga ginikanan, nga nagasiling kay Abraham, ‘Kag sa imo kaliwat pakamaayohon ang tanan nga panimalay sa duta.’

26Sa inyo sing una ang Dios, sang nabangon niya ang iya alagad, nagpadala sa iya, sa pagpakamaayo sa inyo sa pagpatalikud sa tagsatagsa sa inyo gikan sa pagkamalaut ninyo.”

← Chapter 2 Jump to: Chapter 4 →